​ប្រែ​សម្រួលៈ​បំណង (ST/THE STAR/ASIA NEWS NETWORK)៖​ម៉ាឡេស៊ី​កាលពី​ថ្ងៃ​ពុធ​បាន​រក​ឃើញ​អ្នក​ឆ្លងកូវី​ដ​១៩​ថ្មី​ខ្ពស់បំផុត​ចំនួន ២៧.៨៣១​នាក់ តែ​ជាង​៩០​ភាគ​ក្នុងចំណោម​ពួក​គេ​បង្ហាញ​​រោគសញ្ញា​ស្រាល​និង​មធ្យម​ចំ​ពេល​វីរុស​អូ​មី​ក្រុង​កំពុង​វាយប្រហារ​។​

​ការឆ្លង​ខ្ពស់បំផុត​កាលពី​មុន​នៅ​ម៉ាឡេស៊ី គឺ​ចំនួន​២៤.៥៩៩​នាក់​ដែល​ត្រូវបាន​កត់ត្រា​ឃើញ​កាលពី​ថ្ងៃ​២៦​សីហា ឆ្នាំ​២០២១​។​

​បូករួម​នឹង​ចំនួន​ថ្មី​នេះ ម៉ាឡេស៊ី​មាន​អ្នក​កើតកូ​វីដ​១៩​សរុប ៣.១១១.៥១៤​នាក់ ចាប់តាំងពី​ដើមឆ្នាំ​២០២០​មក​។​

​នៅ​ប្រទេស​ឥណ្ឌូនេស៊ី​ក្បែរ​ខាង​ឯណោះ​វិញ ការ​ឆ្លងកូវី​ដ​១៩​ក៏​ហក់​ឡើង​ខ្ពស់​បំផុត​ផងដែរ ដោយ​កាលពី​ថ្ងៃ​អង្គារ​ប្រទេស​អាស៊ី​អាគ្នេយ៍​មួយ​នេះ​បាន​រាយការណ៍​ចំនួន​ឆ្លង​ថ្មី​ជាង​៥៧.០០០​នាក់ ដោយ​កើន​​ហួស​ចំនួន​ឆ្លង​ខ្ពស់​បំផុត​ពី​មុន​៥៦.៧៥៧​នាក់ ដែល​ត្រូវបាន​កត់ត្រា​ឃើញ​កាលពី​ខែ​កក្កដា​ឆ្នាំ​២០២១ ពេល​វីរុស​ដែល​តា​វាយលុក​ខ្លាំង​។​

​ឥណ្ឌូនេស៊ី​ក៏​បាន​រាយការណ៍​អ្នក​ស្លាប់​ដោយកូវី​ដ​១៩​ចំនួន​១៣៤​នាក់​ទៀត​កាលពី​ថ្ងៃ​អង្គារ ។​

​ទោះ​ជា​ចំនួន​ឆ្លង​កើនឡើង ក៏​ចំនួន​ស្លាប់​ប្រចាំថ្ងៃ​បាន​ធ្លាក់ចុះ និង​អត្រា​ចូល​ដេកពេទ្យ​ធ្លាក់​មក​នៅ​៣៣​ភាគរយ​នៃ​គ្រែពេទ្យ​ដែលមាន​។​កាល​ពី​ក្នុងអំឡុង​វីរុស​ដែល​តា​វាយលុក​ខ្លាំង អ្នកជំងឺ​កូវី​ដ​បាន​ចូល​​ដេក​អស់​៧៧​ភាគ​នៃ​គ្រែពេទ្យ​ដែលមាន​។​

​គិត​មក​ត្រឹម​ថ្ងៃ​អង្គារ ឥណ្ឌូនេស៊ី​មាន​អ្នក​កើតកូ​វីដ​១៩​សរុប ៤,៩​លាន​នាក់ និង​ជាង​១៤៥.០០០​នាក់​ស្លាប់​។​

​សូមបញ្ជាក់​ថា ការចាក់​វ៉ាក់សាំង​កូវី​ដ​១៩​ហាក់​នៅ​យឺត ដោយ​ក្នុងចំណោម​ប្រជាជន​២៧០​លាន​នាក់​របស់​ខ្លួន មាន​តែ​ពាក់កណ្តាល​បាន​ចាក់​វ៉ាក់សាំង​ការពារ​ជំងឺឆ្លង​រាតត្បាត​សកល​នេះ​បាន​ពី​រដូស​៕

​ចំនួន​ឆ្លងកូវី​ដ​១៩​ប្រចាំ​ថ្ងៃ​នៅ​ឥណ្ឌូនេស៊ី​បាន​ឡើង​ដល់​ជាង​៥៧.០០០​នាក់​