​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ ក្រុមមន្ត្រី​បាន​និយាយ​កាលពី​ថ្ងៃ​ពុធ​ទី​១៦​កុម្ភៈ​ថា មនុស្ស​យ៉ាង​ហោច​ណាស់​ចំនួន ៧៨ នាក់​បាន​ស្លាប់​នៅក្នុង​គ្រោះទឹកជំនន់​ភ្លាមៗ​និង​ការ​រអិល​បាក់​ដី ដែល​បាន​វាយប្រហារ​ទីក្រុង​ដ៏​ស្រស់ត្រកាល ប៉េ​ត្រូប៉ូលីស (Petropolis)​របស់​ប្រេ​ស៊ីល ដោយ​បាន​ប្រែក្លាយ​ផ្លូវ​ទៅ​ជា​ទន្លេ​ដ៏​ហូរហៀរ និង​បំផ្លាញ​ផ្ទះសម្បែង​អស់​ជាច្រើន​ខ្នង​។​

​ក្រុម​អ្នក​ជួយសង្គ្រោះ​កំពុង​ប្រញាប់ប្រញាល់​ស្វែងរក​អ្នក​នៅ​រស់រាន​មានជីវិត​ដែល​កប់​ក្នុង​ភក់​និង​បំណែក​បែកបាក់​បន្ទាប់ពី​ព្យុះ​ដ៏​ខ្លាំង​កាលពី​ថ្ងៃ​អង្គារ​បាន​ធ្វើឱ្យ​មាន​ទឹក​ភ្លៀង​ធ្លាក់​ស្មើ​នឹង​មួយខែ​​ក្នុង​រយៈពេល​ត្រឹមតែ​បី​ម៉ោង​នៅ​ទីក្រុង​ទេសចរណ៍​ដ៏​ស្រស់​ស្អាត​នៅ​តំបន់ភ្នំ​ភាគ​ខាងជើង​នៃ​ទីក្រុង​រី​យ៉ូ​ដឺ​ហ្សា​ណេ​រ៉ូ (Rio de Janeiro) ។​

​មាន​ការបារម្ភ​ថា​ចំនួន​អ្នក​ស្លាប់​អាច​កើនឡើង​បន្ថែមទៀត ខណៈ​ក្រុម​ពន្លត់​អគ្គិភ័យ​និង​អ្នក​ស្ម័គ្រចិត្ត​បាន​ជីក​សំណល់​នៃ​ផ្ទះ​ជាច្រើន​ខ្នង​ដែល​ទាញ​ទៅ​បាត់​ដោយ​ភក់​ដែល​ផ្ទះ​ភាគច្រើន​គឺ​នៅក្នុង​តំបន់​​អនាធិបតេយ្យ​ក្រីក្រ​នៅលើ​ភ្នំ​។​

​វា​ជា​ព្យុះ​ចុងក្រោយបង្អស់​ដែល​បាន​វាយប្រហារ​ប្រទេសប្រេ​ស៊ីល​ជា​បន្តបន្ទាប់​ក្នុង​រយៈពេល​បី​ខែ​កន្លងមកនេះ ដែល​អ្នកជំនាញ​និយាយ​ថា​កំពុង​ធ្វើ​ឱ្យ​កាន់តែ​អាក្រក់​ទៅៗ​ដោយ​ការប្រែប្រួល​អាកាសធាតុ​។​

​រដ្ឋាភិបាល​បាន​និយាយថា មនុស្ស​យ៉ាង​ហោច​ណាស់ ២១ នាក់​ត្រូវបាន​ជួយសង្គ្រោះ​ទាំង​នៅរស់​។ ដោយ​ប្រើ​សត្វ​ឆ្កែ អេស្កាវ៉ាទ័រ និង​ឧទ្ធម្ភាគចក្រ អ្នក​ជួយ​សង្គ្រោះ​កំពុង​ស្វែងរក​អ្នក​នៅ​រស់​ជា​បន្ទាន់ មុន​ពេល​វា​យឺត​ពេល​។​

​ក្រុមមន្ត្រី​បាន​និយាយថា មនុស្ស​ប្រហែល ៣០០ នាក់​កំពុង​ស្ថិតនៅ​ទីជម្រក​បណ្តោះអាសន្ន ដែល​ភាគច្រើន​គឺ​នៅ​សាលារៀន​។ អង្គការ​សប្បុរសធម៌​នានា​បាន​អំពាវនាវ​សុំ​អំណោយ​ជា ពូក អាហារ ទឹក សម្លៀក​បំពាក់ និង​ម៉ាស់​សម្រាប់​ជនរងគ្រោះ​៕

ទីក្រុង​ប៉េ​ត្រូប៉ូលីស​ត្រូវ​បាន​វាយប្រហា​រដោ​យ​ភ្លៀង​ធ្លាក់​ខ្លាំង​កាលពី​ថ្ងៃ​ពុធ