​ប្រែ​សម្រួលៈ​បំណង​(​ដេល្លី​ម៉េល​,ST)៖ សហរដ្ឋ​អាម៉េរិក​កាលពី​ថ្ងៃ​ពុធ​បាន​ច្រានចោល​របាយការណ៍​នានា​ដែល​ថា រុស្ស៊ី​បាន​ដកទ័ព​ចេញពី​ព្រំដែន​អ៊ុ​យក្រែន តែ​បែរជា​បញ្ជូនទាហាន​រាប់ពាន់​នាក់​មក​កាន់តំ​​បន់​ព្រំដែន​ទៅវិញ ចំ​ពេល​ការព្រួយបារម្ភ​អំពី​ការផ្ទុះ​សង្គ្រាម​កើនឡើង​។​

​មន្ត្រី​ជាន់ខ្ពស់​ម្នាក់​នៅ​សេត​វិមាន​បាន​និយាយថា រុស្ស៊ី​បង្កើន​វត្តមាន​កងកម្លាំង​របស់​ខ្លួន​នៅ​ព្រំដែន​ជាប់​អ៊ុយ​ក្រែន​ដោយ​បន្ថែម​ទាហានប្រមា​ណ​៧.០០០​នាក់ ដោយ​ខ្លះ​ទើប​ទៅ​ដល់​កាលពី​ថ្ងៃ​ពុធ​។​លោក​​ក៏​បាន​អះអាង​ថា ការប្រកាស​របស់​រដ្ឋាភិបាល​ក្រុង​មូ​ស្គូអំពី​ការដក​ទ័ពនោះ «​ជា​ការមិនពិត ។​យើង​បន្ត​ទទួល​សញ្ញា​មក​ថា ពួកគេ​អាច​បង្ក​លេស​ក្លែងក្លាយ​នៅពេល​ណា​មួយ​ដើម្បី​ចូល​ឈ្លានពាន​ដោយ​ស្រ​​ប​ច្បាប់​»​។​

​មន្ត្រី​ដែល​សុំ​មិន​បញ្ចេញ​ឈ្មោះ​រូបនេះ​បាន​បន្ថែមថា នៅពេល​រដ្ឋាភិបាល​ក្រុង​មូ​ស្គូបា​ននិយាយថា ខ្លួន​ចង់បាន​ដំណោះស្រាយ​ការទូត​មួយ «​អំពើ​របស់​គេ​បង្ហាញ​ផ្សេង​»​។​

​មុន​នេះ​កាលពី​ថ្ងៃ​ពុធ​ដដែល ទាំង​អាម៉េរិក​និង​អង្គការ​ណា​តូ បាន​រួម​ជាមួយ​អ៊ុយ​ក្រែន​ប្រកាសថា មិន​មាន​សញ្ញា​នៃ​ការដក​ទាហាន​រុស្ស៊ី​ចេញពី​តំបន់​ព្រំដែន​ជាប់​នឹង​អ៊ុយ​ក្រែន​ដូច​អ្វី​ដែល​ប្រធានាធិបតី​​រុស្ស៊ី​បាន​ប្រកាស​កាល​ពី​មួយថ្ងៃ​មុន​នោះ​ទេ​។​

​ក្នុងពេល​ជាមួយគ្នា អធិកា​ប​តី​អាឡឺម៉ង់ និង​ប្រធានាធិបតី​អាម៉េរិក បាន​យល់ស្រប​គ្នា​ថា ស្ថានការណ៍​នៅ​អ៊ុយ​ក្រែន​ត្រូវតែ​ចាត់​ទុក​ថា​«​ធ្ងន់ធ្ងរ​ខ្លាំង​» ដោយសារ​តែ​នៅ​ប្រឈម​នឹង​ការចូល​ឈ្លានពាន​​ពី​កងទ័ព​រុស្ស៊ី ដូច្នេះ​ត្រូវតែ​ប្រុងប្រៀប​ខ្លួន​កំរិត​ខ្ពស់ ដោយសារ​មិន​មាន​សញ្ញា​នៃ​ការ​ដកទ័ព​រុស្ស៊ី​ទេ​តាំងពី​មុន​មក​។​

​មេដឹកនាំ​ទាំង​ពីរ​ក៏​ស្វាគមន៍​ការប្រកាស​របស់​ប្រធានាធិបតី​រុស្ស៊ី​ដែលថា គួរ​បន្ត​កិច្ចការ​ទូត​៕

​អាម៉េរិក​មិន​ជឿ​ង​ថា រុស្ស៊ី​ដកទ័ព​ចេញ​ពី​ព្រំដែន​ជាប់​អ៊ុយ​ក្រែនទេ តែ​បែរជា​បន្ថែម​ទ័ព​ទៅវិញ​។​ក្នុង​រូប​ទាហាន​រុស្ស៊ី​ចូលរួម​ក្នុង​សមយុទ្ធ​នៅ​តំបន់​រ៉ូស​តូវ ក្នុងប្រទេស​រុស្ស៊ី​កាលពី​ខែ​មុន​