ដោយៈ វណ្ណៈ / ព្រះសីហនុៈ ហ្វូង​ត្រី​ផ្សោត​សមុទ្រ ច្រើន​ក្បាល ត្រូវបាន​ពលរដ្ឋ ប្រទះឃើញ បង្ហាញខ្លួន​នៅ​ដងព្រែក​ទឹកសាប ក្នុងស្រុក​ព្រៃនប់ ខេត្ត​ព្រះសីហនុ កាលពី​រសៀល ថ្ងៃទី​១៦ ខែកុម្ភៈ ឆ្នាំ​២០២២ នេះ​។

​បើតាម​ពលរដ្ឋ ប្រាប់ថា ត្រី​ផ្សោត​ច្រើន​ក្បាល បណ្តែត​ខ្លួន​លេង​ទឹក នៅ​ព្រែក​ទឹកសាប ហើយ​វត្តមាន​ត្រី​ផ្សោត​នេះ បានបង្ហាញ​ឲ្យ​ឃើញថា តំបន់​នេះ មាន​សុវត្ថិភាព មិនមាន​ការរំខាន ឬ​សម្លាប់ តាមរយៈ​ការចូលរួម​ថែរក្សា អភិរក្ស​ពី​ពលរដ្ឋ ។​

​មន្ត្រី​ជំនាញ​ខាង​ជលផល បាន​ថ្លែងថាៈ វត្តមាន​ត្រី​ផ្សោត តាម​ដងព្រែក​ទឹកសាប​នេះ ជា​ផ្នែក​មួយ ជួយ​ដល់​វិ​ស​យ័​ទេសចរណ៍ធម្មជាតិ អាច​ឲ្យ​អ្នក​ទេសចរណ៍ ដែល​ធ្វើដំណើរ កម្សាន្ត តាម​ដងព្រែក ទស្សនា​ផងដែរ​។​

​សូមបញ្ជាក់ថា ដងព្រែក​ទឹកសាប ស្ថិតនៅតាម​ដងផ្លូវ​ជាតិ​លេខ​៤ ក្នុងភូមិ​ទឹកសាប ឃុំ​រាម ស្រុក​ព្រៃនប់ ខេត្ត​ព្រះសីហនុ ។ ដងព្រែក​ទឹកសាប លាតសន្ធឹង​កាត់​ផ្លូវជាតិ​លេខ​៤ ត្រង់​ស្ពាន​ទឹកសាប ភ្ជាប់​ទៅដល់​សមុទ្រ​រាម​តែម្តង ។ ព្រែក​ទឹកសាប​នេះ មាន​ទឹកសាប លាយ​ជាមួយ​ទឹកប្រៃ មាន​ព្រៃកោងកាង ដុះ​អម​ដៃ​ព្រែក សម្បូរ​ជីវចម្រុះ និង​ក៏​ជាទី​តាំង ជម្រក ក្តាម​, ខ្យង​, បង្គា​, និង​ត្រី​សមុទ្រ គ្រប់​ប្រភេទ​ផងដែរ​៕/V​