​ប្រែ​សម្រួល : កញ្ញា​ដា​លី​ស (​បាល់ទាត់​) ៖ ការប្រកួត​បាល់ទាត់​ដណ្តើមពាន​អឺរ៉ុប​លំដាប់​ទី​២​និង​ទី​៣ គឺ UEFA Europa League និង UEFA Conference League នៅ​រាត្រី​ថ្ងៃ​ព្រហស្បតិ៍​នេះ គឺ​ឈាន​ចូល​ដល់​វគ្គ ១៦ ក្រុម​ចុង​ក្រោយ​ជើង​ទីមួយ ដោយ​មាន​សុទ្ធតែ​ក្រុម​ខ្លាំងៗ​ចូលរួម មិន​ចាញ់​ការប្រកួត​ក្នុង CL ប៉ុន្មាន​នោះ​ទេ​។ គូ​ធំជាងគេ​នៅ​រាត្រី​នេះ​គឺ រវាង Barcelona និង Napoli​។​

Sevilla ដែល​គេ​ដាក់​រហស្សនាម​ឱ្យ​ថា​ស្តេច Europa League មាន​ភាគរយ​ឈ្នះ​ខ្ពស់​ណាស់​នៅ​រាត្រី​នេះ នៅពេល​ទទួល​ក្រុម Dinamo Zagreb មក​ពី​ក្រូ​អាស៊ី​។

​ដោយឡែក​នៅ​ក្របខ័ណ្ឌ UEFA Conference League ក៏​មាន​គូ​ខ្លាំងៗ​ប្រកួត​គ្នា​នៅ​យប់​នេះ​ផង​ដែរ ជាពិសេស Leicester, Celtic និង Marseille ដែល​សុទ្ធសឹង​រំពឹង​ទទួល​ជ័យជម្នះ​។

​ទោះយ៉ាងណា យើង​នឹង​លើកយក​តែ​២​គូ​ប៉ុណ្ណោះ​ក្នុង EL មក​វិភាគ​ជូន​ដូចខាងក្រោម ៖

– Barcelona vs Napoli

Barcelona និង Napoli នឹង​ប៉ះគ្នា​នៅ​កីឡដ្ឋាន Camp Nou ក្នុង​ការប្រកួត Europa League វគ្គ​១៦​ក្រុម​ចុង​ក្រោយ​នៅ​រាត្រី​ថ្ងៃ​ព្រហស្បតិ៍​នេះ ក្នុង​ការប្រកួត​មួយ ដែល​គេ​ធ្លាប់​តែ​ឃើញ​ប៉ះ​គ្នា​ក្នុង​ការប្រកួត​ជម្រុះ Champions League​។​

Barcelona បាន​ធ្លាក់​មក​លេង​ក្នុង​ការប្រកួត​នេះ​ជា​លើកដំបូង​ចាប់តាំងពី​ឆ្នាំ ២០០៤ បន្ទាប់ពី​បាន​បញ្ចប់​ក្នុង​ចំណាត់ថ្នាក់​លេខ ៣ ក្នុង​ពូ​ល E នៃ​ក្របខ័ណ្ឌ Champions League តាម​ពីក្រោយ​ក្រុម Bayern Munich និង Benfica ប៉ុន្តែ​បាន​នាំមុខ​ក្រុម Dynamo Kiev ។​

​បើ​និយាយ​ពី​ក្របខ័ណ្ឌ​កំពូល​របស់អេ​ស្ប៉ាញ ក្លិប​អ្នក​មាន​បុណ្យ​កំពុង​កាន់កាប់​តំណែង​លេខ​៤ ដោយ​ដេញ​តាម​ពីក្រោយ​ក្រុម​កំពូល​តារាង Real Madrid រហូត ១៥​ពិន្ទុ​។​

​ទន្ទឹមនឹងនោះ Napoli បាន​ឈរ​ត្រឹម​ចំណាត់ថ្នាក់​លេខ ២ ក្នុង​ពូ​ល​របស់​ពួកគេ​ក្នុង​ក្របខ័ណ្ឌ Europa League ខណៈ​ដែល​ពួកគេ​បាន​បញ្ចប់​នៅ​ពីក្រោយ​ក្រុម Spartak Moscow បើទោះបីជា​មាន​ពិន្ទុ​ស្មើ​គ្នា​ក៏​ដោយ​។​

​នៅក្នុង​ក្របខ័ណ្ឌ Serie A ក្លិប Napoli កំពុង​ស្ថិត​ក្នុង​ការប្រណាំង​ប្រជែង​រវាង​ក្រុម​ខ្លាំងៗ​ទាំង​៣​សម្រាប់​ពាន​លី​ក​កំពូល ដោយ​ឥឡូវ​កំពុង​ឈរ​នៅ​ចំណាត់ថ្នាក់​លេខ ៣ តាម​ពីក្រោយ AC Milan និង Inter Milan ។​

Napoli នឹង​ឈាន​ចូល​ការប្រកួត​ទាំង​កំពុង​មាន​ទម្រង់​លេង​ល្អ​ដូច​ផ្កា ខណៈ​ដែល​ពួកគេ​មិន​ស្គាល់​ចាញ់​សោះ​ក្នុង​ការប្រកួត​លី​ក​ចំនួន ៦ លើកចុងក្រោយ ដោយ​ឈ្នះ ៤ ស្មើ ២ ។​

​ប្រវត្តិ​ជួបគ្នា

– ក្រុម​ទាំង​ពីរ​ធ្លាប់​ជួប​គ្នា​នៅ​វគ្គ ១៦ ក្រុម​ចុង​ក្រោយ​ក្នុង CL រដូវ​កាល ២០១៩/២០​។​
– Napoli លេង​ស្មើ ១-១ ក្នុង​ទឹកដី​។​
– ទោះយ៉ាងណា Barcelona ឈ្នះ​វិញ ៣-១ នៅក្នុង​ទឹកដី ឡើង​ទៅ​វគ្គ​បន្ទាប់​។

​ត្បិត Barcelona មាន​ប្រវត្តិ​ល្អ​ជាង Napoli ក៏ពិតមែន ប៉ុន្តែ​ប្រៀបធៀប​កម្រិត​លេង​បច្ចុប្បន្ន គេ​អាច​និយាយបាន​ថា​ក្រុម​អ្នក​មាន​បុណ្យ​ពិបាក​នឹង​យកឈ្នះ​លើ Napoli ខ្លាំងណាស់​។

Napoli កំពុង​ឡើង​ជើង ខណៈ Barcelona កំពុង​ព្យាយាម​ស្វែងរក​ទម្រង់​លេង​ឱ្យបាន​ល្អ​ដូច​កាលពី​មុន ដូច្នេះ​គេ​ពិបាក​ស្រមៃ​ណាស់​ថា ពួកគេ​នឹង​អាច​យកឈ្នះ​លើ​ក្រុម​យក្ស​អ៊ីតាលី​នៅថ្ងៃនេះ​។

​លទ្ធផល​ព្យាករណ៍ Napoli ឈ្នះ ១-០​។​

– Sevilla vs Dinamo Zagreb

​ទីបំផុត Sevilla ដណ្តើម​បាន​ជ័យជម្នះ​ក្នុង​ក្របខ័ណ្ឌ La Liga កាលពី​ល្ងាច​ថ្ងៃ​សុក្រ នៅពេល​ដែល​កីឡាករ Papu Gomez និង Rafa Mir រក​បាន​គ្រាប់​បាល់​បញ្ចូល​ទី​យក​ឈ្នះ​ក្នុង​លទ្ធផល ២-០ នៅផ្ទះ​ខ្លួនឯង​ទល់នឹង Elche ។​

​ជ័យជម្នះ​នេះ​បាន​ជួយ​ឱ្យ Sevilla កាត់បន្ថយ​គម្លាត​តាម​ពីក្រោយ​ក្រុម Real Madrid នៅត្រឹម ៤ ពិន្ទុ​នៅលើ​កំពូល​តារាង​លី​ក​ក្នុងស្រុក​។​

​វា​ក៏​ជំរុញ​ស្មារតី​របស់​ក្រុម​នៅមុន​ការប្រកួត​ក្នុងផ្ទះ​ជាមួយនឹង​ក្រុម​ជើងឯក​ក្រូ​អាស៊ី Dinamo Zagreb ក្នុង​ពានរង្វាន់ UEFA Europa League វគ្គ ១៦ ក្រុម​ចុង​ក្រោយ​ផង​ដែរ​។​

Sevilla មាន​យុទ្ធនាការ​ដ៏​ខកចិត្ត​ក្នុង​វគ្គ​ចែក​ពូ​ល​នៃ UEFA Champions League ខណៈ​ដែល​ពួកគេ​បាន​បរាជ័យ​ក្នុង​ការ​បន្ត​ឡើង​វគ្គ​បន្ទាប់​ចេញពី​ពូ​ល​ជាមួយ Lille, Salzburg និង Wolfsburg ដោយ​ឈ្នះ​តែ​ម្តង​គត់​ក្នុង​ការប្រកួត​ចំនួន​៦​ជុំ​។​

​កូនក្រុម​របស់លោក Julen Lopetegui រក​បាន​តែ​៥​គ្រាប់​ប៉ុណ្ណោះ​ក្នុង​ការប្រកួត Champions League ចំនួន​៦​ជុំ​។ ពួកគេ​ត្រូវ​ប្រឹង​ឱ្យ​បានល្អ​ជាង​នេះ​ដើម្បី​លើ​កពាន Europa League ឆ្នាំនេះ​។​

​គូប្រជែង​ដំបូង​របស់​ពួកគេ​ថ្ងៃនេះ​គឺ Dinamo Zagreb ដែល​បាន​ឈាន​ដល់​វគ្គ​ជ្រៅ​បំផុត​របស់​ខ្លួន​នៅក្នុង Europa League ឆ្នាំនេះ​។​

​ក្រុមក្រូ​អាស៊ី​មួយ​នេះ​បាន​ពង្រឹង​ខ្លួនឯង​ជា​កម្លាំង​ខ្លាំង​មួយ​នៅក្នុង​ការប្រកួត​អឺរ៉ុប​រដូវ​កាល​នេះ ខណៈ​ពួកគេ​មាន​ក្រុម​ខ្លាំង​ល្មម​អាច​បង្ក​ព្យុះ​ភ្លៀង​ក្នុង Europa League ។​

​ក្រុម​នេះ​បាន​យក​ឈ្នះ​លើ​ក្រុម West Ham United នៅក្រៅ​ដី​ក្នុង​ទីក្រុង​ឡុង​ដ៍ (០-១) ក្នុង​ការប្រកួត​វគ្គ​ចែក​ពូ​ល ដើម្បី​ឈរ​នៅ​ចំណាត់ថ្នាក់​លេខ​២​ក្នុង​ពូ​ល H​។​

Dinamo ក៏​ស្ថិត​នៅលើ​កំពូល​តារាង​លី​ក​កំពូលក្រូ​អាស៊ី​ផង​ដែរ ដែល​ក្នុងនោះ​ពួកគេ​បាន​ឈ្នះ ៦ លើ​ក​ជាប់ៗ​គ្នា រួម​ទាំង​ការ​ឈ្នះ ២-១ កាលពី​ចុង​សប្តាហ៍​លើ​ក្រុម Gorica ។​

​ប្រវត្តិ​ជួបគ្នា​

– ក្រុម​ទាំង​ពីរ​ធ្លាប់​ប៉ះគ្នា​នៅ​វគ្គ​ចែក​ពូ​ល CL កាលពី ៥ ឆ្នាំមុន​។​
– Sevilla ដណ្តើមបាន ៦ ពិន្ទុ​ពេញ​ពី​ការប្រកួត​ទាំង​២​ជើង ដោយ​មិន​របូត​សូម្បី​១​គ្រាប់​។​
– Sevilla ឈ្នះ ៤-០ ទាំង​ក្នុង​និង​ក្រៅ​ទឹកដី​។​

​ផ្អែក​លើ​ប្រវត្តិ និង​គុណភាព​ក្រុម ព្រមទាំង​ប្រៀប​ក្នុង​ទឹកដី យើង​រំពឹង Sevilla ឈ្នះ​យ៉ាងតិច​ក៏ ២-០ ដែរ​៕

Barcelona មិន​រំពឹង​ឈ្នះ Napoli ដែល​កំពុង​ឡើង​ជើង​នៅ​អ៊ីតាលី​