ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ វា​ជា​ពេជ្រ​ពណ៌​ខៀវ​ដ៏​ធំ​បំផុត​និង​មានតម្លៃ​បំផុត​មិន​ធ្លាប់​យក​មក​ដេញថ្លៃ​ពីមុនមក​។ ហើយ​វា​ជា​ពេជ្រ​ទើប​រកឃើញ​ថ្មីៗ​នេះ​ផង​ដែរ​។​

​ពេជ្រ​ដឺ បៀ ស្គូលី​ណាន ប្ល៊ូ​( De Beers Cullinan Blue) ជាង ១៥ កា​រ៉ាត់​នេះ​ត្រូវបាន​ជីក​បាន​ក្នុង​ឆ្នាំ ២០២១ នៅ​អណ្តូងរ៉ែ​ត្បូង​ខល់​លី​ណាន (Cullinan Mine) របស់​អាហ្វ្រិក​ខាងត្បូង ដែល​ជា​ប្រភព​កម្រ​បំផុត​មួយ​នៅលើ​ពិភពលោក​សម្រាប់​ពេជ្រ​ពណ៌​ខៀវ​ដ៏​កម្រ​នេះ​។​

​វា​នឹង​ត្រូវបាន​ផ្តល់ជូន​នៅក្នុង​ការដេញថ្លៃ​នៅ​ក្រុមហ៊ុន Sotheby’s Hong Kong នៅ​ខែ​មេសា ហើយ​ត្រូវបាន​គេ​ប៉ាន់ស្មាន​ថា​នឹង​មាន​តម្លៃ​លើសពី ៤៨ លាន​ដុល្លារ​អាម៉េរិក​។​

​អនុប្រធាន​ក្រុមហ៊ុន Sotheby’s និង​ជា​នាយក​ផ្នែក​លក់​គ្រឿងអលង្កា​រលោក ហ្វ្រែង អេ​វើ​រ៉េត (Frank Everett) បាន​និយាយថា គ្រឿង​ពេជ្រ​នេះ​គឺ​គួរឱ្យ​កត់សម្គាល់​លើ​កម្រិត​ជាច្រើន​។​

​លោក​បាន​និយាយថា “​វា​កម្រ​ណាស់ ដោយសារ​ទំហំ​។ វា​មាន​ទម្ងន់​ជាង ១៥ កា​រ៉ាត់​។ វា​មាន​ពណ៌​ខៀវ​រស់​រវើក​។ វា​ជា​ពេជ្រ​ល្អឥតខ្ចោះ​គ្មាន​ប្រតាក​ខាងក្នុង​។​ហើយ​ទិដ្ឋភាព​ដ៏​កម្រ​បំផុត​មួយ​របស់​វា​គឺ​​ការ​កាត់​ច្នៃ​ចេញ​ជា​រូបរាង​ដ៏​ល្អ​ឯក​”​។​

​លោក​បន្តថា “​ខ្ញុំ​គិតថា​យើង​នឹង​ឃើញ​ការចាប់អារម្មណ៍​យ៉ាងខ្លាំង​ចំពោះ​ពេជ្រ​នេះ​នៅពេល​ដែល​ថ្ងៃ​ដេញថ្លៃ​មកដល់​”៕

ពេជ្រ De Beers Cullinan Blue រំពឹង​លក់​ដេញថ្លៃ​បាន​ជាង ៤៨ លាន​ដុល្លារ​នៅ​ខែ​មេសា​ខាង​មុខ​នៅ​ហុងកុង