ដោយៈ គង់​ហេង​/ កំពង់ចាមៈ ខ្សែភាពយន្ត​ដែលមាន​ចំណងជើង «​កូនប្រុស​ក្រោម​ពន្លឺ​ព្រះ​ចន្ទ​ពេញបូណ៌មី​» មាន​ប្រមាណ ៥២ ភាគ​បាន​ពណ៌​នាពី​ខ្សែជីវិត​ពិត​របស់​សម្តេច​អគ្គមហាសេនាបតី​តេ​ជោ ហ៊ុន សែន និង​សម្តេច​កិត្តិ​ព្រឹទ្ធ ប៊ុន រ៉ានី ហ៊ុន សែន ដែល​ប្រើប្រាស់​រយៈពេល​ផលិត​ចំនួន មួយ ឆ្នាំ​នោះ គឺ​បាន​ចាប់​ថត ចេញពី​ទឹកដី​ខេត្តកំពង់ចាម​។​
នេះ​បើ​យោងតាម​ការបញ្ជាក់​ឱ្យដឹង​នៅក្នុង​របាយការណ៍​រប​ស់​គណៈកម្មការ​ផលិត​ខ្សែភាពយន្ត​រឿង​ភាគ​ជា​ប្រ​ត្តិ​សាស្ត្រ​មួយ​នេះ ជូន​ដល់​រដ្ឋបាល​ខេត្តកំពង់ចាម ដឹកនាំ​សំណេះសំណាល​ជាមួយ​គណៈកម្មការ​នេះ ដោយ​លោក អ៊ុន ចាន់​ដា ជា​អភិបាលខេត្ត នៅ​វត្ត​កោះគល់ ឃុំ​កោះ​ទន្ទឹម ស្រុក​កំពង់សៀម​នា​រសៀល​ថ្ងៃទី ១៦ កុម្ភៈ​ម្សិលមិញ​នេះ​។​

​ប្រភពព័ត៌មាន​នោះបាន​បញ្ជាក់ទៀតថាៈ ការដែល​គណៈកម្មការ​បានសម្រេច​ជ្រើស​រើសយក​ទីតាំង​ចំនួន​បួន​ស្រុក របស់​ខេត្តកំពង់ចាម​ចុះ​ថត​ដំបូង​គេ​នេះ គឺ​ដោយសារ​សាច់រឿង « កូនប្រុស​ក្រោម​ពន្លឺ​ព្រះ​ពេញបូណ៌មី​» ទាំង ៥២ ភាគ​នេះ ខេត្តកំពង់ចាម​បាន​គ្របដណ្តប់​ពី ៧០ ទៅ ៨០ ភាគរយ​។ តាមពិត​ទីតាំង​សាច់រឿង​មួយចំនួន ត្រូវ​ថត​នៅ​ខេត្ត​ត្បូងឃ្មុំ​តែដោយសារ​សំណង់ ជា​ផ្ទះ​បុរាណ​ចំនួន​ច្រើន ដែល​នឹងត្រូវ​ក្នុង​សាច់រឿង ត្រូវ​នឹង​បរិបទ សម័យ​កាលនោះ​។​

​ប្រភព​ដដែល​បាន​បន្ថែមថាៈ ការថត​វគ្គ​ទី​១ នេះ​ចាប់ផ្តើម​ពីថ្ងៃ​ទី ១៥ ដល់ ២៤ កុម្ភៈ និង​វគ្គ​ទី​២ ពីថ្ងៃ​ទី ១ ដល់ ៩ មីនា និង​ការសម្រេច​ជ្រើស​រើសយក​ទីតាំង​ថត នៅ​ស្រុក​កំពង់សៀម​, ស្រុក​កងមាស​, ស្រុក​ស្ទឹងត្រង់ និង​ស្រុក​កោះសូទិន គឺ​បាន​ចុះ​សិក្សា​ស្រាវជ្រាវ​ពី​បួន ទៅ​ប្រាំ​ខែ​មុន​។​

​សូមបញ្ជាក់ថា នៅក្នុង​ដំណើរ​ចុះសួរសុខទុក្ខ និង​សំណេះសំណាល​គណៈកម្មការ​ផលិតភាព​យន្ត​រឿង «​កូនប្រុស​ក្រោម​ពន្លឺ​ព្រះ​ចន្ទ​ពេញបូណ៌មី​» បានផ្តល់​ថវិកា​ចំនួន ៤០​លាន រៀល សម្រាប់​ផ្គត់ផ្គង់​ដល់​គណៈកម្មការ​នេះ​៕​