​ប្រែ​សម្រួលៈ​បំណង​(VnExpress)៖ កុងតេ​នឺ​ទំនិញ​វៀតណាម​ជិត​២.០០០ ដែល​ជាង​៨០​ភាគរយ​ដឹក​កសិផល​ស្រស់ កំពុង​ជាប់​នៅ​ច្រក​ព្រំដែន​វៀតណាម​-​ចិន​ចំនួន​បី​នៅក្នុង​ខេត្ត​ឡាង សឺ​ន​( Lang Son)​ភាគ​ខាងជើង​នៅពេល​អាជ្ញាធរ​ចិន​បន្ត​រឹតបន្តឹង​វិធានការ​ទប់ស្កាត់​កូវី​ដ​១៩​។​

​មន្ត្រី​នាយកដ្ឋាន​ឧស្សាហកម្ម​និង​ពាណិជ្ជកម្ម​ខេត្ត​បាន​និយាយថា វា​ត្រូវ​ចំណាយពេល​១០​ទៅ​១៥​ថ្ងៃ​ទម្រាំ​កុងតេ​នឺមួយៗ​ឆ្លង​ផុត​ការត្រួតពិនិត្យ​។​ខេត្ត​បាន​រាយការណ៍​ករណី​នេះ​ទៅ​កាន់​ក្រសួង​ឧស្សាហកម្ម​​និង​ពាណិជ្ជកម្ម ហើយ​បាន​សុំ​ធ្វើការ​ចរចា​កំរិត​ខ្ពស់​ជាមួយ​ភាគី​ចិន​ដើម្បី​បញ្ចប់​ការកកស្ទះ​។​

​អាជ្ញាធរ​ខេត្ត​ឡាង​សឺ​ន​បាន​បញ្ឈប់​ការបញ្ជូន​ទំនិញ​ផ្លែឈើ​ថ្មី​រហូត​ដល់​ថ្ងៃ​២៥​កុម្ភៈ​។​

​សូមបញ្ជាក់​ថា ការកកស្ទះ​ឡាន​កុងតេ​នឺ​នៅ​ព្រំដែន​បាន​កើតឡើង​ចាប់តាំងពី​ចុងឆ្នាំ​មុន តែ​ត្រូវបាន​ដោះស្រាយ​បាន​មួយ​ចំនួន​ក្នុងអំឡុងពេល​ចូលឆ្នាំថ្មី​កាលពីដើម​ខែ​នេះ​។​

​ការកកស្ទះ​ជា​ថ្មី​នា​ពេល​ឥឡូវ​នាំ​អោយ​ពួក​អ្នក​នាំ​ចេញ​កសិផល​និង​ក្រុមហ៊ុន​ដឹកជញ្ជូន​ខាតបង់​។​

​ចិន​ជា​ទីផ្សារ​នាំចេញ​ធំ​ផុត​ទី​២​របស់​វៀតណាម សំរាប់​កសិផល​រួម​មាន​បន្លែ​ផ្លែឈើ ជលផល​និង​ព្រៃឈើ បន្ទាប់​ពី​សហរដ្ឋ​អាម៉េរិក ដោយ​រកចំណូលបាន​៨,៤​ពាន់​លាន​ដុល្លារ​នៅ​១១​ខែ​ដំបូង​កាលពី​ឆ្នាំមុន​៕

​កុងតេ​នឺជាប់​នៅ​ព្រំដែន​វៀតណាម​-​ចិន​ក្នុង​ខេត្ត​ឡាង​សឺ​ន​កាលពី​ថ្ងៃ​១៤​កុម្ភៈ​