​ប្រែ​សម្រួល : កញ្ញា​ដា​លី​ស (SCMP) ៖ យោងតាម​ប្រព័ន្ធ​ផ្សព្វផ្សាយ​រដ្ឋ​បានឱ្យដឹង​ថា​មី​ស៊ី​ល​ការពារ​ដែនអាកាស​ចល័ត​ថ្មី​របស់​ចិន​បាន​បង្ហាញ​ពី​សមត្ថភាព​ឈាន​មុខ​គេ​លើ​ពិភពលោក​​ក្នុងការ​ញែក​ដាច់​គោលដៅ​បោក​បញ្ឆោត និង​វាយប្រហារ​លើ​គោលដៅ​ពិតប្រាកដ​ក្នុងអំឡុងពេល​បាញ់​សាកល្បង​។​

QW-12 គឺជា​មី​ស៊ី​ល​ផលិត​ក្នុងស្រុក ដែល​រចនា​ឡើង​ដើម្បី​ទប់ទល់​នឹង​ឧទ្ធម្ភាគចក្រ ដ្រូ​ន និង​មី​ស៊ី​ល​ដែល​កំពុង​ហោះ​ចូលមក​។​មី​ស៊ី​ល​នេះ​បានបង្ហាញ​ភាពត្រឹមត្រូវ​ក្នុងការ​ចាប់បាន​គោលដៅ​​ដ្រូ​ន​ក្នុងចំណោម​កាំជ្រួច​ភ្លើង​បញ្ឆោត​ចំនួន​ប្រាំបី​នៅក្នុង​វីដេអូ​គ្មាន​កាលបរិច្ឆេទ​មួយ ដែល​បាន​ចេញផ្សាយ​កាលពី​សប្តាហ៍​មុន​ដោយ​ទូរទស្សន៍​រដ្ឋ CCTV ។​

​របាយការណ៍ CCTV បាន​និយាយថា “​មី​ស៊ី​ល​របស់​យើង​មិន​ត្រូវ​បាន​រំខាន​ដោយ​ការ​បោក​បញ្ឆោត​ទាល់តែសោះ ហើយ​បាន​បាញ់​ចំ​គោលដៅ​។ មិនទាន់​មាន​មី​ស៊ី​ល​ប្រភេទ​នេះ​នៅលើ​ពិភពលោក​នៅ​ឡើយ​ទេ​ដែល​បង្ហាញ​ជា​សាធារណៈ​នូវ​សមត្ថភាព​បែបនេះ​”​។​

​នៅក្នុង​វីដេអូ​នៃ​ការសាកល្បង មី​ស៊ី​ល QW-12 ត្រូវ​បាន​ដំណើរការ​ដោយ​មនុស្ស​ចំនួន​បីនាក់ ជាមួយ​ជើង​ទម្រ​បាញ់​ដាក់​នៅ​លើ​ដីគោក​។ បន្ទាប់​ពី​វា​ត្រូវបាន​បញ្ជូន​ទៅ​លើ​មេឃ​ដោយ​ប្រធាន​ប្រតិបត្តិ​ករ មី​ស៊ី​ល​នេះ​បាន​បញ្ឆេះ​ម៉ាស៊ីន​មេ​របស់​វា ដើម្បី​បង្កើន​ល្បឿន ខណៈ​ដែល​វា​ដេញតាម​សញ្ញា​អ៊ី​ន​ហ្វ្រា​រ៉េដ​នៃ​គោលដៅ​។​

​កាំជ្រួច​ភ្លើង​បោក​បញ្ឆោត​ត្រូវបាន​បញ្ចូន​ចេញ​នៅ​ពេល​ដែលមី​ស៊ីល​ការពារ​ដែន​អាកាសហោះ​ទៅជិ​តដ្រូន​គោលដៅ​ហើយក៏​មាន​ការបញ្ជូន​ឧទ្ធម្ភាគចក្រ​វាយប្រហារ​ក្លែងក្លាយ​ដោយ​ប្រើ​ត្រាប់​តាម​សញ្ញា​អ៊ី​ន​ហ្វ្រា​រ៉េដ​ផងដែរ ដើម្បី​ឱ្យ​ច្រឡំ​ជាមួយ​មី​ស៊ី​ល​ដែល​ហោះ​ចូលមក​។ ប៉ុន្តែ​វីដេអូ​ឃ្លី​បបាន​បង្ហាញ​ថា មី​ស៊ី​ល QW-12 មិន​អើពើ​នឹង​ការ​បោក​បញ្ឆោត​ឡើយ ហើយ​បាន​បំបុក​កម្ទេច​ដ្រូ​ន​បាន​យ៉ាង​ត្រឹមត្រូវ​។​

​ក្រៅ​ពី​គោលដៅ​យឺត​នៃ​ដ្រូ​ន ការបាញ់​សាកល្បង​នេះ​ក៏​រួមបញ្ចូល​ការស្ទាក់ចាប់​យ៉ាង​ជាក់លាក់​របស់​មី​ស៊ី​ល QW-12 លើ​គ្រាប់​រ៉ុក្កែត​១២២​មិល្លីម៉ែត្រ​ផងដែរ ដែល​មាន​ចលនា​លឿន​ដែល​គេ​ប្រើ​ដើម្បី​តំណាង​​ឱ្យ​មី​ស៊ី​ល ឬ​យន្តហោះ​។​

​របាយការណ៍​របស់ CCTV បាន​និយាយថា គោលដៅ​ល្បឿន​លឿន​ត្រូវបាន​បាញ់​កម្ទេច​ដោយ​មី​ស៊ី​ល QW-12 ដោយសារ​ឧបករណ៍​បំផ្ទុះ​ឡាស៊ែរ​កៀក​របស់​វា ដែល​ត្រូវបាន​ជំរុញ​ឱ្យ​ផ្ទុះ​ឡើង​នៅពេល​ដែល​មី​ស៊ី​ល QW-12 ផ្លាស់​ទី​ទៅជិត​គ្រាប់​រ៉ុក្កែត ដោយ​បង្កើតបាន​ជា​រលក​ឆក់​។​

​វីដេអូ​នេះ​បានបង្ហាញ​ថា ប្រព័ន្ធ Sensor មួយ​ត្រូវបាន​ភ្ជាប់​ទៅនឹង​ជើង​ទម្រ​បាញ់​។ របាយការណ៍​និយាយទៀតថា ឧបករណ៍ Sensor កំពុង​ត្រូវបាន​ប្រើប្រាស់​ដើម្បី​ប្រមូល​ទិន្នន័យ​ពី​លំ​ហាត់​សមយុទ្ធ​នេះ​សម្រាប់​ការវិភាគ​បន្ថែមទៀត​៕

QW-12 គឺជា​មី​ស៊ី​ល​ផលិត​ក្នុងស្រុក ដែល​រចនា​ឡើង​ដើម្បី​ទប់ទល់​នឹង​ឧទ្ធម្ភាគចក្រ ដ្រូ​ន និង​មី​ស៊ី​ល​ដែល​កំពុង​ហោះ​ចូលមក