ដោយៈ មុនី​រ័ត្ន​/ភ្នំពេញៈ ប្រធាន​វិទ្យាស្ថាន​ទំនាក់ទំនង​អន្តរជាតិ នៃ​រាជបណ្ឌិត្យសភាកម្ពុជា លោក​បណ្ឌិត គិ​ន ភា បាន​មានប្រសាសន៍ប្រាប់​រស្មី​កម្ពុជា​នៅ​ថ្ងៃទី​១៧ ខែកុម្ភៈឆ្នាំ២០២២ នេះ​ថា ដំណើរ​ទស្សនកិច្ច​រប​ស់​លោកបណ្ឌិត ហ៊ុន ម៉ា​ណែ​ត នៅ​ប្រទេស​ជប៉ុនមាន​សារៈសំខាន់​ណាស់ ។គឺ​បានរួម​ចំណែក​យ៉ាងសំខាន់​នៅក្នុង​ការលើកកម្ពស់​ព​ង្រឹ​ង​និង​ពង្រីក​ទំនាក់ទំនង​រវាង​ប្រទេស​កម្ពុជា និង​ជប៉ុន និង​លើកកម្ពស់​កិច្ចសហប្រតិបត្តិការ​លើ​វិស័យ​ការពារជាតិ ពីព្រោះ​លោក​បណ្ឌិត ហ៊ុន ម៉ា​ណែ​ត អគ្គ​មេបញ្ជាការរង នៃ​កងយោធពល​ខេមរភូមិន្ទ និង​ជា​មេបញ្ជាការ​កងទ័ពជើងគោក និង​បង្ហាញ​ឲ្យ​ឃើញ​ពី​ការផ្តល់​តម្លៃ​ខ្ពស់​ពី​សំណាក់​ប្រទេស​ជប៉ុន​ចំពោះ​លោក​បណ្ឌិត ហ៊ុន ម៉ា​ណែ​ត​ ហើយ​ដំណើរ​ទស្សនកិច្ច​នេះ នឹងធ្វើ​ឲ្យ​ទំនាក់ទំនង​រវាង​ប្រទេស​កម្ពុជា និង​ជប៉ុន​កាន់តែ​មានការ​រីកចំរើន​កាន់តែ​រឹងមាំ​ថែមទៀត​។

រូបថតៈលោក ហ៊ុន ម៉ាណែត ត្រូវបានស្វាគមន៍ដោយលោកនាយករដ្ឋមន្រ្តីជប៉ុន ក្នុងអំឡុងពេលបំពេញទស្សនកិច្ចនៅប្រទេសជប៉ុន

​លោក​បណ្ឌិត គិ​ន ភា បាន​បញ្ជាក់ថា ពីអំឡុង​ឆ្នាំ​២០១០ រហូតមកដល់​បច្ចុប្បន្ន​លោក​បណ្ឌិត ហ៊ុន ម៉ា​ណែ​ត អាច​ចាត់ទុកថា ជា​អ្នក​បន្តវេន​តែមួយគត់​ដែល​បំពេញ​ទស្សនកិច្ច​ផ្លូវការ​ច្រើនជាងគេ​ទៅកាន់​ប្រទេស​ជប៉ុន ហើយក៏​ជួប​ជាមួយ​នាយករដ្ឋមន្ត្រី​ជប៉ុន​ច្រើន​រូប​ផងដែរ​។ លោក​គិតថា មាន​សារៈសំខាន់​សម្រាប់​ទំនាក់​ទំនង​ការទូត​រវាង​ប្រទេស​ទាំងពីរ កម្ពុជា​-​ជប៉ុន ដែល​លោក​បណ្ឌិត​កាន់​តួនាទី​សំខាន់​នាពេល​បច្ចុប្បន្ន ហើយក៏​ជា​អ្នក​ត្រូវ​បន្តវេន​ក្នុងការ​ដឹកនាំ​ប្រទេស​កម្ពុជា​ផងដែរ​។

លោកបន្ថែមថា ​ដំណើរ​ទស្សនកិច្ច​នេះ គឺ​ពិតជា​រួមចំណែក​យ៉ាងសំខាន់​ជា​វិជ្ជមាន​ក្នុងការ​ពង្រឹង​និង​ពង្រីក​ទំនាក់ទំនង​រវាថ​ប្រទេស​ទាំងពីរ​។ ជប៉ុន​ផ្តល់​តម្លៃ​ខ្ពស់​ចំពោះ​វត្តមាន​លោកបណ្ឌិត ហ៊ុន ម៉ា​ណែ​ត​។ការរៀបចំ​ដំណើរ​ទស្សនកិច្ច និង​របៀប​បដិសណ្ឋាកិច្ច​ដែល​ប្រទេស​ជប៉ុន​ធ្វើ​សម្រាប់​ទទួល​លោក​បណ្ឌិត ហ៊ុន ម៉ា​ណែ​ត គឺ​បានបង្ហាញ​ឲ្យ​ឃើញ​ពី​កម្រិត​នៃ​ទំនាក់ទំនង និង​ការផ្តល់​តម្លៃ​ខ្ពស់​។លោក​បណ្ឌិត ហ៊ុន ម៉ា​ណែ​ត បាន​ជួប​ជាមួយ​ឥស្សរជន​សំខាន់ៗ ជាច្រើន​នៃ​ប្រទេស​ជប៉ុន រាប់ចាប់តាំងពី​រដ្ឋមន្ត្រីការបរទេស រដ្ឋមន្ត្រី​ការពារជាតិ រហូតដល់​នាយករដ្ឋមន្ត្រី​ជប៉ុន ន​ជ​សបញ្ជាក់​ឲ្យ​ឃើញថា ទស្សនកិច្ច​នេះ គឺមាន​សារៈសំខាន់​ណាស់​។​

លោក គិន ភា ប្រធាន​វិទ្យាស្ថាន​ទំនាក់ទំនង​អន្តរជាតិនៃ​រាជបណ្ឌិត្យសភាកម្ពុជា​(រូបថតឯកសារ)

​ប្រធាន​វិទ្យាស្ថាន​ទំនាក់ទំនង​អន្តរជាតិនៃ​រាជបណ្ឌិត្យសភាកម្ពុជា​បាន​បញ្ជាក់ថា “​ដំណើរ​ទស្សនកិច្ច​នេះ គឺជា​ចំណុច​ចាប់ផ្តើម​ដ៏​សំខាន់​មួយដែល​យើង​ឃើញ​តាមរយៈ​ជំនួប​របស់​ឯកអគ្គរាជទូត​ជប៉ុន​នាពេល​កន្លងមក​ជាមួយ​សម្តេច​តេ​ជោ ហ៊ុន សែន ក៏​ឯកអគ្គរាជទូត​បាន​ជម្រាបជូន​សម្តេច​តេ​ជោ​ថា ប្រទេស​ជប៉ុន​មានបំណង​អញ្ជើញ​លោក​បណ្ឌិត ហ៊ុន ម៉ា​ណែ​ត ទៅ​បំពេញ​ទស្សនកិច្ច​ផ្លូវការ​នៅ​ប្រទេស​ជប៉ុន​ ហើយ​ក្រោយ​មក​ឃើញថា អ្វីដែល​បានលើកឡើង​ដោយ​ឯកអគ្គរាជទូត​ជប៉ុន​ក៏​ក្លាយជា​ការពិត​។​ទន្ទឹមនឹងនោះ​វា​អាច​បញ្ជាក់​ឲ្យ​ឃើញ​អំពី​ការគាំទ្រ ការ​សាទរ​របស់​ប្រទេស​ជប៉ុន​ចំពោះ​បេក្ខជន​នាយករដ្ឋមន្ត្រី នៃ​ប្រទេស​កម្ពុជា នាពេល​អនាគត ដែល​អាច​ចាត់ទុកថា ជា​ចំណុច​ចាប់ផ្តើម​ដ៏​មាន​សារៈសំខាន់ នៃ​លោក​បណ្ឌិត ហ៊ុន ម៉ា​ណែ​ត នៅក្នុង​តួនាទី​ជា​អ្នក​បន្តវេន​របស់​គណ​បក្ស​ប្រជាជន​កម្ពុជា នៅក្នុង​កិច្ចការ​អន្តរជាតិ ។ គេ​ហៅថា ទំនាក់ទំនង​ការទូត​របស់​កម្ពុជា​ជាមួយនឹង​ប្រទេស​ផ្សេងៗ​។​អាច​ចាត់ទុកថា ជប៉ុន​ជា​ប្រទេស​ទី​១ ដែល​យកចិត្តទុកដាក់​នៅ​បេក្ខជន​នាយករដ្ឋមន្ត្រី​ថ្មី នៃ​ប្រទេស​កម្ពុជា​នាពេល​អនាគត​នេះ​”​។​

​គួរ​បញ្ជាក់ថា តប​តាម​ការអញ្ជើញ​របស់​រា​ជ​រដ្ឋាភិបាល​ជប៉ុន តាមរយៈសម្តេច​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជាឧ​ត្ត​ម​សេនីយ៍​ឯក ហ៊ុន ម៉ា​ណែ​ត អគ្គ​មេបញ្ជាការរង នៃ​កងយោធពល​ខេមរភូមិន្ទ មេបញ្ជាការ​កងទ័ពជើងគោក កំពុង​ដឹកនាំ​គណៈប្រតិភូ​ជាន់ខ្ពស់​កងទ័ពជើងគោក បំពេញ​ទស្សនកិច្ច​ផ្លូវការ​រយៈពេលបួនថ្ងៃ ចាប់ពី​ថ្ងៃទី​១៤ ដល់​ថ្ងៃទី​១៧ ខែកុម្ភៈ ឆ្នាំ​២០២២ នៅក្នុង​ប្រទេស​ជប៉ុន ស្រប​ពេលដែល​ប្រមុខ​រាជរដ្ឋាភិបាល​នៃ​ប្រទេស​ទាំងពីរ​កម្ពុជា​-​ជប៉ុន បាន​ឯកភាពគ្នា​ប្រារព្ធ​ខួប​ទី​៣០ ឆ្នាំ នៃប្រតិបត្តិ​ការរក្សា​សន្តិភាព (PKO) របស់​ជប៉ុន​នៅ​កម្ពុជា ហើយ​ដែល​ប្រតិបត្តិការ​នេះ ជា​ប្រតិបត្តិការ​ក្រៅប្រទេស​លើក​ទី​១ របស់​កងកម្លាំង​ស្វ័យការពារ​ជប៉ុន ក្នុង​ក្របខ័ណ្ឌអង្គការសហប្រជា ជាតិ​៕ សរន