ដោយៈ ស៊ា ថាំង / ភ្នំពេញៈ ក្រសួង​សេដ្ឋកិច្ច និង​ហិរញ្ញវត្ថុ បានប្រកាស​អោយដឹងថា ក្រសួង​នឹង​រៀបចំ​វេទិកាសាធារណៈ ស្តីពី​គ្រប់គ្រង​ម៉ាក្រូសេដ្ឋកិច្ច និង​ច្បាប់​ស្តីពី​ហិរញ្ញវត្ថុ សម្រាប់​ការគ្រប់គ្រង ឆ្នាំ​២០២២ ដូច​រាល់​ឆ្នាំ កន្លងមក នៅ​ថ្ងៃ​សុក្រ ទី​១៨ ខែកុម្ភៈ ឆ្នាំ ២០២២ ស្អែក​នេះ នៅ​សណ្ឋាគារ សូ​ហ្វី​តែ​ល ភ្នំពេញ​ភូ​គី​ត្រា ដើម្បី​ធ្វើការ​ផ្សព្វផ្សាយ ឱ្យ​កាន់តែ​ទូលំទូលាយ ដល់​សាធារណជន​ទូទៅ បាន​ស្វែងយល់​លំអិត អំពី​ការគ្រប់គ្រង ម៉ាក្រូសេដ្ឋកិច្ច និង​ច្បាប់​ថវិកា ឆ្នាំ​២០២២ បន្ថែមទៀត​។

​វេទិកាសាធារណៈ​នេះ នឹង​ប្រព្រឹត្តទៅ​ក្រោម​អធិបតីភាព លោក វ​ង្សី វិស្សុត រដ្ឋមន្ត្រី​ប្រតិភូ​អម​នាយករដ្ឋមន្ត្រី និង​ជា​រដ្ឋលេខាធិការ ប្រចាំការ នៃ​ក្រសួង​សេដ្ឋកិច្ច និង​ហិរញ្ញវត្ថុ ដោយមាន​ការចូលរួម ពី​តំណាង​ក្រសួង​-​ស្ថាប័ន​នានា​, ដៃគូ​អភិវឌ្ឍន៍​, សង្គម​ស៊ីវិល​, ស្ថាប័ន​ស្រាវជ្រាវ​, គ្រឹះស្ថាន​ឧ​ត្ត​មសិ​ក្សា​, វិស័យ​ឯកជន​, បណ្តាញសារព័ត៌មាន និង​អ្នកសារព័ត៌មាន ជាតិ​-​អន្តរជាតិ ព្រមទាំង​អ្នកសិក្សា​ស្រាវជ្រាវ​, និស្សិត និង​យុវជន​ផងដែរ​។

​គួរ​បញ្ជាក់ដែរថា ច្បាប់​ស្តីពី​ហិរញ្ញវត្ថុ សម្រាប់​ការគ្រប់គ្រង ឆ្នាំ​២០២២ ឬ​ច្បាប់​ថវិកា ឆ្នាំ​២០២២ ត្រូវបាន​រដ្ឋសភា ផ្តល់​ការអនុម័ត កាលពី​ថ្ងៃទី ២៥ ខែវិច្ឆិកា ឆ្នាំ​២០២១ នា​សម័យប្រជុំ​ពេញអង្គ​រដ្ឋសភា លើក​ទី​៦ នីតិកាល​ទី​៦ និង​ត្រូវបាន​ព្រឹទ្ធសភា បាន​ពិនិត្យ​ចប់សព្វគ្រប់ លើ​ទម្រង់ និង​គតិ​ច្បាប់​នេះ​ទាំងស្រុង កាល​ថ្ងៃទី ២ ខែ ធ្នូ ឆ្នាំ ២០២១ នា​សម័យប្រជុំ​វិសាមញ្ញ នីតិកាល​ទី​៤ ហើយ​ត្រូវបាន​ព្រះមហាក្សត្រ ទ្រង់​ឡាយព្រះហស្តលេខា ប្រកាស​ឱ្យប្រើ​ដោយ ព្រះរាជក្រម ចុះ​ថ្ងៃទី ១៥ ខែ ធ្នូ ឆ្នាំ ២០២១ ៕/V​