​ប្រែ​សម្រួល : កញ្ញា​ដា​លី​ស (​ដេល្លីម៉េ​ល​) ៖ ការបារម្ភ​អំពី​សង្គ្រាម​ថ្មី​នៅ​អឺរ៉ុប​បាន​ផ្ទុះឡើង​កាលពី​ថ្ងៃ​ព្រហស្បតិ៍​ទី​១៧​កុម្ភៈ ខណៈ​ប្រធានាធិបតី​អាម៉េរិក ចូ បៃ​ដិន បាន​ព្រមាន​ថា​រុស្ស៊ី​អាច​ឈ្លានពាន​​អ៊ុយ​ក្រែន​ក្នុង​រយៈពេល​ប៉ុន្មាន​ថ្ងៃ​ខាងមុខ ។​

​ឥស្សរជន​ពិភពលោក​កំពុង​ស្វះស្វែង​រក​ដំណោះស្រាយ ប៉ុន្តែ​ការសង្ស័យ​រវាង​លោក​ខាងកើត​និង​លោក​ខាងលិច​ហាក់​បន្ត​កើនឡើង ខណៈ​សម្ពន្ធមិត្ត​ណា​តូ​បាន​ច្រាន​ចោល​ការអះអាង​របស់​រុស្ស៊ី​ថា ខ្លួន​កំពុង​ដកទ័ព​ចេញពី​សមយុទ្ធ​។

​រុស្ស៊ី​ត្រូវបាន​គេ​ជឿ​ថា​បាន​បង្កើន​កម្លាំងយោធា​ប្រមាណ ១៥០.០០០ នាក់​ជុំវិញ​ព្រំដែន​អ៊ុ​យក្រែន​។​

​ក្តីបារម្ភ​បាន​កើន​ឡើង​នៅ​លោកខាងលិច​ជុំវិញ​អ្វី​ដែល​រុស្ស៊ី​កំពុងតែ​ធ្វើ​ជាមួយ​កងទ័ព​ទាំងអស់នោះ ដែល​រួម​មាន​កងកម្លាំង​ជើងគោក​សរុប ៦០ ភាគរយ​របស់​រុស្ស៊ី​។​វិមាន​ក្រឹម​ឡាំង​នៅតែ​និយាយថា​ខ្លួន​​មិន​មាន​ផែនការ​ឈ្លានពាន​នោះទេ ប៉ុន្តែ​ខ្លួន​បានចាត់ទុក​អ៊ុយ​ក្រែនជា​ផ្នែក​នៃ​ឥទ្ធិពល​របស់​ខ្លួន​ជា​យូរ​មក​ហើយ​ហើយ​ការពង្រីក​ទៅ​ភាគ​ខាងកើត​របស់​អង្គការ​ណា​តូ​គឺជា​ការគំរាមកំហែង​ដល់​សន្តិ​​សុខ​រុស្ស៊ី​។​

​រដ្ឋាភិបាល​អាម៉េរិក​បានចេញ​ការព្រមាន​លម្អិត​បំផុត​មួយចំនួន​របស់​ខ្លួន​អំពី​អ្វី​ដែល​អាច​នឹង​កើតឡើង​បន្ទាប់​។​

​ថ្លែង​នៅ​ឯ​ក្រុមប្រឹក្សាសន្តិសុខ​អង្គការសហប្រជាជាតិ រដ្ឋមន្ត្រីការបរទេស​អាម៉េរិក​លោក អ៊ែន​ថូ​នី ប្លីង​កិន​បានបង្ហាញ​ពី​ការសន្និដ្ឋាន​មួយចំនួន​នៃ​ចារកម្ម​អាម៉េរិក​នៅក្នុង​យុទ្ធសាស្ត្រ​ដែល​សហរដ្ឋ​អា​​ម៉េ​រិក​និង​អង់គ្លេ​សសង្ឃឹមថា​នឹង​បង្ហាញ​ចេញ​មក​និង​ទប់ស្កាត់​ផែនការ​ឈ្លានពាន​ណាមួយ​។ សហរដ្ឋ​អាម៉េរិក​បាន​បដិសេធ​មិន​លាតត្រដាង​ភស្តុតាង​ភាគច្រើន ដែល​ស្ថិតក្រោម​ការអះអាង​របស់​ខ្លួន​ទេ​។​

​លោក​ប្លីង​កិន​បានប្រាប់​អ្នកការទូត​ថា ព្រឹត្តិការណ៍​ដែល​មើលទៅ​ហាក់ដូចជា​ហិង្សា​មួយ​រំពេច ដែល​ធ្វើឡើង​ដោយ​រុស្ស៊ី ដើម្បី​យក​លេស​ឈ្លានពាន​នឹង​នាំ​ឱ្យ​អាម៉េរិក​បញ្ចេញ​ភស្តុតាង​ទាំងអស់​។ លោក​បាន​លើកឡើង​ពី “​ការវាយប្រហារ​ដោយ​គ្រាប់បែក​របស់​ភេរ​វករ​” នៅក្នុង​ប្រទេស​រុស្ស៊ី ការវាយប្រហារ​ដោយ​ដ្រូ​ន “​ការវាយប្រហារ​ក្លែងក្លាយ សូម្បី​ការវាយប្រហារ​ពិតប្រាកដ​… ដោយ​ប្រើ​អាវុធ​គីមី​”​។​

​លោក​បាន​និយាយថា ការវាយប្រហារ​នេះ​នឹង​បើក​ឱ្យមាន​ការវាយប្រហារ​តាម​អ៊ី​ន​ធឺ​ណេត រួមជាមួយ​នឹង​មី​ស៊ី​ល​និង​គ្រាប់បែក​នៅ​ទូទាំង​ប្រទេស​អ៊ុ​យក្រែន​។ ​លោក​ប្លីង​កិន​បាន​ពណ៌នា​អំពី​ការ​ចូលលុកលុយ​របស់​ទាហាន​រុស្ស៊ី​ឆ្ពោះទៅ​កាន់​ទីក្រុង​គៀវ ជា​ទីក្រុង​ដែល​មាន​មនុស្ស​រស់​នៅ​ជិត ៣ លាន​នាក់ និង​គោលដៅ​សំខាន់ៗ​ផ្សេងទៀត​។​

​លោក​ប្លីង​កិន​បាន​និយាយថា ទីភ្នាក់ងារ​ស៊ើបការណ៍​សម្ងាត់​របស់​ស​ហ​រដ្ឋ​អាម៉េរិក​បានចង្អុលបង្ហាញ​ថា រុស្ស៊ី​ក៏​នឹង​កំណត់​គោលដៅ​វាយប្រហារ​លើ “​ក្រុម​ជាក់លាក់​” នៃ​ជនជាតិ​អ៊ុយ​ក្រែន​ផងដែរ ប៉ុន្តែ​ជា​ថ្មី​ម្តងទៀត​មិន​បាន​ផ្តល់​ព័ត៌មាន​លម្អិត​ទេ​៕

​ទាហាន​រុស្ស៊ី​ធ្វើ​សមយុទ្ធ​នៅ​បេឡា​រូស​កាលពី​ថ្ងៃ​ព្រហស្បតិ៍