​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ បារាំង​បាន​ប្រកាស​កាលពី​ថ្ងៃ​ព្រហស្បតិ៍​ទី​១៧​កុម្ភៈ​ថា​ខ្លួន​នឹង​ដក​កងទ័ព​ចេញពី​ប្រទេស​ម៉ាលី​បន្ទាប់​ពី​ការបែកបាក់​ក្នុង​ទំនាក់ទំនង​ជាមួយ​រប​ប​យោធា​​កំពុងកាន់​អំណាច​របស់​ប្រទេស​នេះ ដោយ​បញ្ចប់​ការ​ដាក់​ពង្រាយ​ទ័ព​ជិត ១០ ឆ្នាំ​ប្រឆាំងនឹង​ក្រុម​ជី​ហាដ ដែល​បង្ក​ការគំរាមកំហែង​កាន់តែ​ខ្លាំង​ឡើង​នៅ​អាហ្វ្រិក​ខាងលិច​។​

​បារាំង​បាន​បញ្ជូន​ទាហាន​ទៅកាន់​អតីត​អាណានិគម​របស់​ខ្លួន​ក្នុង​ឆ្នាំ ២០១៣ ដើម្បី​វាយបក​លើ​ក្រុម​ជ្រុលនិយម​អ៊ីស្លាម​ដែល​ពង្រីក​ខ្លួន​ទៅ​មុខ​យ៉ាង​លឿន​ប៉ុន្តែ​ភាពជោគជ័យ​នៃ​សមរភូមិ​ដំបូង​​នេះ​បែរជា​ត្រូវ​ប្រឈម​នឹង​ប្រតិបត្តិការ​ប្រឆាំង​ការបះបោរ​និង​ការកើនឡើង​អរិភាព​ពី​ប្រជាជន​ម៉ាលី​។​

​កំហឹង​នៅ​ទីក្រុង​ប៉ារីស​អំពី​ការមកដល់​នៃ​ទាហាន​ស៊ីឈ្នួល​រុស្ស៊ី​ពី​ក្រុម​វ៉ា​ក​ណឺ (Wagner)​ក៏ដូចជា​ការធ្វើឱ្យ​ទំនាក់ទំនង​កាន់តែ​ស៊ីជម្រៅ​រវាង​របប​យោធា​ម៉ាលី​និង​ទីក្រុង​មូ​ស្គូ​ក៏​បាន​ពន្លឿន​ការចាក​​ចេញ​របស់​បារាំង​ផងដែរ​។​

​លោក​ប្រធានាធិបតីអេម​ម៉ានុយ​អែល ម៉ា​ក្រុង បាន​ប្រាប់​សន្និសីទ​សារព័ត៌មាន​មួយ​ថា “​យើង​មិន​អាច​បន្ត​ចូលរួម​ផ្នែក​យោធា​ជាមួយ​អាជ្ញាធរ​ជាក់ស្តែង​ដែល​យុទ្ធសាស្ត្រ​និង​គោលបំណង​លាក់​កំបាំង​​របស់​ពួកគេ​មិន​បាន​ចែករំលែក​ជាមួយ​យើង​នោះទេ​”​។​

​ការសម្រេចចិត្ត​របស់​បារាំង​នឹង​ឃើញ​ការចាកចេញ​របស់​កង​ទ័ព​ចំនួន ២.៤០០ នាក់​ពី​ប្រទេស​ម៉ាលី​ប៉ុន្តែ​បណ្តា​ប្រទេស​សហភាព​អឺរ៉ុប​ក៏​បាន​ប្រកាស​ថា​ពួកគេ​នឹង​ដក​ទាហាន​ជាច្រើន​រយ​នាក់​នៅ​​ក្នុង​កងកម្លាំង​អឺរ៉ុប​តា​គូ​បា (Takuba) ដែល​ត្រូវបាន​បង្កើតឡើង​ក្នុង​ឆ្នាំ ២០២០ ផងដែរ​។​

​លោក​ម៉ា​ក្រុង “​បាន​ច្រានចោល​ទាំងស្រុង​” នូវ​គំនិត​ដែល​ថា​បារាំង​បាន​បរាជ័យ​ក្នុង​បេសកកម្ម​របស់​ខ្លួន​នៅក្នុង​ប្រទេស​ម៉ាលី ដែល​បាន​ធ្វើឱ្យ​បាត់បង់​ជីវិត​ទាហាន ៤៨ នាក់ និង ៥​នាក់​ទៀត​​បាន​ស្លាប់​នៅ​ទូទាំង​តំបន់​សា​ហ៊ែ​ល (Sahel) ។​

​លោក​បាន​និយាយថា “​តើ​មាន​អ្វី​កើតឡើង​ក្នុង​ឆ្នាំ ២០១៣ ប្រសិនបើ​បារាំង​មិន​ជ្រើសរើស​ធ្វើ​អន្តរាគមន៍​? អ្នក​ប្រាកដជា​នឹង​ឃើញ​ការដួលរលំ​នៃ​រដ្ឋ​ម៉ាលី​” ហើយ​គាត់​បាន​បន្ថែមថា​ទាហាន​បារាំង​​ក៏​បាន​សម្លាប់​មេដឹកនាំ​នៃ​ក្រុម​អាល់​កៃ​ដា​ក្នុង​តំបន់​និង​មេដឹកនាំ​ក្រុម​សម្ពន្ធមិត្ត​របស់​រដ្ឋ​អ៊ីស្លាម​ផងដែរ​៕

ទាហាន​បារាំង​ប្រយុទ្ធប្រឆាំង​នឹង​ពួក​ជី​ហាដ​ជិត​១០​ឆ្នាំ