​ប្រែ​សម្រួល : កញ្ញា​ដា​លី​ស (​ដេល្លីម៉េល​) ៖ ប៉ូលិស​បាន​បញ្ជាក់ថា ស្ត្រី​និង​ក្មេងស្រី​១៣​នាក់​បាន​ស្លាប់​បន្ទាប់ពី​ធ្លាក់​ចូល​អណ្តូង​ដោយ​ចៃដន្យ​ក្នុងពេល​ចូលរួម​ពិធី​អាពាហ៍ពិពាហ៍​នៅ​ភាគ​ខាងជើង​​ប្រទេស​ឥណ្ឌា​។​

​មន្ត្រីប៉ូលិស​ជាន់ខ្ពស់​លោក អា​ឃី​ល កុមារ (Akhil Kumar)​បាន​ប្រាប់​អ្នកយកព័ត៌មាន​នៅ​ទីក្រុង​គូ​ស៊ី​ណាហ្គា (Kushinagar) រដ្ឋ​អ៊ុត​ថា​ប្រា​ដេស ថា​ជនរងគ្រោះ​កំពុង​អង្គុយ​នៅលើ​បន្ទះ​ដែក​គ្រប​​មាត់​អណ្តូង​នៅពេល​វា​បាក់​ចុះក្រោម​។​

​មនុស្ស​ពីរ​នាក់​ទៀត​បាន​រងរ​បួស​ធ្ងន់​ក្នុង​ឧបទ្ទវហេតុ​ដែល​បាន​កើតឡើង​កាលពី​ល្ងាច​ថ្ងៃ​ពុធ​ទី​១៦​កុម្ភៈ​។​

​ចៅក្រម​ក្នុង​ស្រុក​លោក អេស រ៉ា​ចា​លីន​ហ្គាម (S. Rajalingam) បាន​និយាយថា អណ្តូង​នោះ​ចាស់​ណាស់​ហើយ​មិន​អាច​ទ្រ​ទម្ងន់​អ្នក​អង្គុយ​លើ​គម្រប​បានទេ​។​

​លោក​បាន​និយាយថា “​ជនរងគ្រោះ​បាន​ធ្លាក់​ចុះ​ក្រោម ហើយ​ស្លាប់​នៅ​ក្រោម​គំនរ​បាក់បែក​”​។​

​ស្ត្រី​និង​កុមារ​បាន​ប្រមូលផ្តុំ​គ្នា​ដើម្បី​ចូលរួម​ក្នុង​ពិធី​អាពាហ៍ពិពាហ៍​មួយ​នៅក្នុង​ភូមិ​របស់​ពួកគេ​ដើម្បី​ផាត់ម្សៅ​លើ​មុខ​កូនក្រមុំ​និង​កូនកំលោះ​ជា​សញ្ញា​នៃ​ភាព​ចម្រុងចម្រើន​។​

​នាយករដ្ឋមន្ត្រី​ឥណ្ឌា​លោក ណារិ​នដ្រា ម៉ូ​ឌី បាន​និយាយថា គ្រោះថ្នាក់​នេះ​ពិតជា​ធ្វើឱ្យ​ខូចចិត្ត​ខ្លាំងណាស់​។​លោក​បាន​សរសេ​រលើ Twitter ថា “​រដ្ឋបាល​ក្នុង​តំបន់​កំពុង​ចូលរួម​ក្នុង​ការជួយ​ដែល​អាច​ធ្វើទៅបាន​ទាំងអស់​”​។​

​អ្នក​ជួយ​សង្គ្រោះ​ម្នាក់​បាន​និយាយថា អណ្តូង​នោះ​មាន​ជម្រៅ​ប្រហែល ១៥ ម៉ែត្រ​៕

​វីដេអូ​ឃ្លី​បបាន​បង្ហាញ​អ្នកស្រុក​ប្រមូលផ្ដុំ​គ្នា​ជុំវិញ​អណ្តូង ដោយ​មាន​មនុស្ស​ជា​ច្រើន​ស្រែក​យំទួញសោក​យ៉ាងខ្លាំង បន្ទាប់​ពី​គ្រោះមហន្តរាយ​នេះ​