ដោយៈមុនីរ័ត្ន/ភ្នំពេញ​: ក្នុងពេលបំពេញទស្សនកិច្ចផ្លូវការនៅប្រទេសជប៉ុន ឧ​ត្ត​ម​សេនីយ៍​ឯក ហ៊ុន ម៉ា​ណែ​ត អគ្គមេបញ្ជាការ​រង​នៃ​កងយោធពល​ខេមរភូមិន្ទ មេបញ្ជាការ​កងទ័ពជើងគោក និង​គណៈប្រតិភូ​កងទ័ពជើងគោក​កម្ពុជា បាន​ជួប​​ពិភាក្សា​ការងារ​ជាមួយ​លោក មីយ៉ាកេ ស៊ីហ្គោ(Miyake Shingo) អនុរដ្ឋមន្ត្រី​ការបរទេស​នៃ​ប្រទេស​ជប៉ុនកាលពី​ថ្ងៃទី​១៧ ខែកុម្ភៈ ឆ្នាំ​២០២២​។

​ ក្នុងសវនាការនេះលោកអនុរដ្ឋមន្ត្រីបាន​សម្តែង​នូវ​ការស្វាគមន៍​យ៉ាង​កក់ក្តៅ​ចំពោះ​ដំណើរ​ទស្សនកិច្ច​របស់​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត និង​គណៈប្រតិភមកកាន់​ប្រទេស​ជប៉ុន​។លោកមាន​ការ​ជឿជាក់ថា នាពេល​ខាងមុខនេះ ចំណងមិត្តភាព សាមគ្គីភាព​នៃ​ប្រទេស​ទាំងពីរ នឹង​កាន់តែរឹងមាំ និង​ស៊ីជម្រៅថែមទៀត ជាពិសេស​ការ​ជំរុញ​អ្នកវិនិយោគ​ជប៉ុន​មក​កម្ពុជា​។​

​ចំណែកឧ​ត្ត​ម​សេនីយ៍​ឯក ហ៊ុន ម៉ា​ណែ​ត បាន​អរគុណ​ចំពោះ​ការស្វាគមន៍​យ៉ាង​កក់ក្តៅ​ដែល​បានផ្តល់​ជូន​គណៈប្រតិភូ​កងទ័ពជើងគោក​កម្ពុជា និង​អរគុណរដ្ឋាភិបាល កងកម្លាំង​ស្វ័យការពារ និង​ប្រជាជន​ជប៉ុន ដែល​តែងតែ​រក្សា​ចំណង មិត្តភាព ល្អ​ជាមួយ​កម្ពុជា​ជាប់​រហូតមក​។ លោកក៏បាន​គាំទ្រ​ចំពោះ​សកម្មភាព​វិនិយោគ​របស់​ក្រុមហ៊ុន​ជប៉ុន​នៅ​កម្ពុជា ដោយ​ក្រុមហ៊ុន​តែង​បាន​គោរព​ច្បាប់ និង​អនុវត្ត​ការលើកកម្ពស់​លក្ខខណ្ឌ​ការងារ​សម្រាប់​កម្មករ​និយោជិត​បាន​យ៉ាង​ល្អប្រសើរ​។​

​ក្នុងជំនួប​នេះ​ភាគី​ទាំង​ពីរបាន​ព្រមព្រៀង​ក្នុងការ​សិក្សា​លើ​លទ្ធភាព​ក្នុងការ​ពង្រីក​វិសាលភាព​នៃ កិច្ចសហប្រតិបត្តិការ​លើ​វិស័យ​នានា​បន្ថែមទៀត ដើម្បី​បង្កើន​ឱ្យមាន​សកម្មភាពទំនាក់ទំនងកាន់តែខ្លាំងក្លាទ្បើង​៕សរន​