​ប្រែ​សម្រួលៈ​បំណង​(​ដេល្លី​ម៉េល​)៖​តុលាការ​ឥណ្ឌា​មួយ​កាលពី​ថ្ងៃ​សុក្រ​ទី​១៨​កុម្ភៈ បាន​កាត់ទោស​ប្រហារជីវិត​មនុស្ស​៣៨​នាក់​ចំពោះ​ការ​បំផ្ទុះ​គ្រាប់បែក​បន្តបន្ទាប់​នៅ​ឆ្នាំ​២០០៨​ដែល​បណ្តាលអោយ​ស្លាប់​​មនុស្ស​ជាង​៥០​នាក់​និង​របួស​ប្រមាណ​២០០​នាក់​នៅក្នុង​ទីក្រុង អា​ម៉េ​ដា​បាត​(Ahmedabad)​ក្នុង​រដ្ឋ​ហ្កូ​ចា​រ៉ា​ត​(Gujarat)​។​

​វា​ជា​លើកដំបូង​ដែល​ជន​ត្រូវ​ចោទ​ច្រើន​ដូច្នេះ​ត្រូវបាន​កាត់ទោស​ប្រហារជីវិត​តែ​មួយ​លើក​នៅ​ឥណ្ឌា​។​ទោះជា​យ៉ាងណា​ការដាក់ទោស​នេះ​ត្រូវតែ​ទទួល​ការអនុម័ត​យល់ព្រម​ពី​តុលាការ​ជាន់​ខ្ពស់​ជាង​មួយ​។​

​ចៅក្រម អេ អរ ប៉ា​តែ​ល​(A. R. Patel)​ក៏​បាន​កាត់ទោស​មនុស្ស​១១​នាក់​ទៀត​អោយ​ជាប់គុក​មួយជីវិត​ក្នុងករណី​ដដែល​នេះ ដែល​ជាប់​ពាក់ព័ន្ធ​នឹង​ការផ្ទុះ​គ្រាប់បែក​ជាង​ដប់​នៅ​ផ្នែក​ផ្សេងៗ​នៃ​​ក្រុង​អា​ម៉េ​ដា​បាត​។​

​ក្រុម​សកម្មប្រយុទ្ធ​មួយ​ហៅ​ខ្លួនឯង​ថា ហា​កាត់​-​អ៊ុល​-​អាល់​-​អ៊ី​ស្លា​មី (Harkat-ul-Jihad-al-Islami )​បាន​ប្រកាស​ទទួល​ខុស​ត្រូវ​ចំ​ពោះ​ការ​បំផ្ទុះ​គ្រាប់បែក​នេះ​។​គេ​គិត​ថា​ក្រុម​នេះ​មាន​មូលដ្ឋាន​​នៅ​ប៉ា​គី​ស្ថាន តែ​ពេល​នេះ​ទំនងជា​លែង​មាន​វត្តមាន​ទៀតហើយ​។​

​រដ្ឋ​នេះ​មាន​ប្រវត្តិ​តានតឹង​រវាង​អ្នក​កាន់​សាសនា​ហិណ្ឌូ​និង​ក្រុម​ជនភាគតិច​អ៊ីស្លាម​។​វា​ក៏​ជា​កន្លែង​ផ្ទុះ​អំពើហិង្សា​ធំ​នៅ​ឆ្នាំ​២០០២​ដែល​បណ្តាលអោយ​មនុស្ស​ជាង​១.០០០​នាក់​ស្លាប់​ក្រោយឧបទ្ទវហេតុ​អគ្គិភ័យ​លើ​រថភ្លើង​ដាក់​អ្នក​ធ្វើ​ធម្ម​យាត្រា​ហិណ្ឌូ​ដ៏​ណែន​មួយ​ដែល​បាន​សម្លាប់​មនុស្ស​៦០​នាក់​។​

​មូលហេតុ​នៃ​អគ្គិភ័យ​នេះ​មិន​ត្រូវ​បាន​បញ្ជាក់ តែ​ពួក​ហិណ្ឌូ​និយម​ជ្រុល​បាន​បន្ទោស​វាទៅ​លើ​ពួក​អ៊ីស្លាម​ហើយ​បានវាយបំផ្លាញ​កាប់សម្លាប់​ពាសពេញ​តំបន់​ជន​អ៊ីស្លាម​រស់នៅ​៕

​ជនសង្ស័យ​ក្នុង​ការវាយប្រហារ​នៅ​ឆ្នាំ​២០០៨​ត្រូវបាន​ចាប់​និង​គ្រប​ក្បាល​ដើម្បី​លាក់​អត្តសញ្ញាណ​