ដោយ​: សុវណ្ណ​កុម្ភៈ​/​ភ្នំពេញ​: ការប្រកួត​ប្រដាល់​គុន​ខ្មែរ​ជើងឯក​ជាតិ​ឆ្នាំ​២០២១ ដែល​ចាប់ផ្ដើម​ពីថ្ងៃ​ទី​១៤ មក​នោះ បានបញ្ចប់​ហើយ​នៅ​ល្ងាច​ថ្ងៃទី​១៨ កុម្ភៈ បន្ទាប់ពី​ដំណើរការ​ប្រកួត​អស់​រយៈពេល​៥​ថ្ងៃ​។​

នេះ​ជាការ​ប្រកួត​ដោយ​ប្រើប្រាស់​ថវិកា​របស់​ក្រសួង​អប់រំ​យុវជន​និង​កីឡា​។ សម្រាប់​វិញ្ញ​សា​បុរស​មាន​ចំនួន​៩​ប្រភេទ​ទម្ងន់​គឺ ៤៥​គីឡូក្រាម ៤៨​គីឡូក្រាម ៥១​គីឡូក្រាម ៥៤​គីឡូក្រាម ៥៧​គីឡូក្រាម ៦០​គីឡូក្រាម ៦៣,៥០​គីឡូក្រាម ៦៧​គីឡូក្រាម និង ៧១​គីឡូក្រាម​។ ចំពោះ​​នារី​ដែលមាន​៥​ប្រភេទ​ទម្ងន់ គឺ​ទម្ងន់​៤៨​គីឡូក្រាម ៥១​គីឡូក្រាម ៥៤​គីឡូក្រាម ៥៧​គីឡូក្រាម និង​៦០​គីឡូក្រាម តែ​នៅពេល​ប្រកួត​ជាក់ស្ដែង​
​មានតែ​៤​ប្រភេទ​ទម្ងន់​ប៉ុណ្ណោះ ។

ក្រសួងការពារជាតិ​ប្រជែង​បាន​មេ​ដាស​ចំនួន​៧​គ្រឿង​ក្នុងនោះ​កីឡាការិនី​ប្រជែង​បាន​មេដាយមាស​ចំនួន​៣​គ្រឿង​គឺ​ធាន់ ចាន់​ដេ​ង​​ដែល​ប្រកួត​ក្នុង​ប្រភេទ​ទម្ងន់​៤៨​គីឡូក្រាម កីឡាការិនី វី ស្រី​ឆាយ ប្រកួត​ក្នុង​ប្រភេទ​ទម្ងន់​៥៧​គីឡូក្រាម និង កីឡាការិនី ទួន ស្រី​ភី​ន ដែល​ប្រកួត ក្នុង​ប្រភេទ​ទម្ងន់​៦០​គី​ឡី​ក្រាម​។ ចំពោះ​បុរស​ដែល​ឈ្នះ​មេដាយមាស​ចំនួន​៤​គ្រឿង​វិញ​នោះ​មាន​កីឡាករ វ៉ាន់ វឿន ទម្ងន់​៥៧​គីឡូក្រាម កីឡាករ​ឃុន បូរ៉ា ទម្ងន់​៦០​គីឡូក្រាម កីឡាករ តា​ញ់ មករា ទម្ងន់​ទម្ងន់​៦៣,៥០​គីឡូក្រាម និង កីឡាករ​ឡៅ ចិ​ត្រា​ប្រកួត​ក្នុង​ប្រភេទ​ទម្ងន់​៦៧​គីឡូក្រាម ។​

ចំពោះ​សមាគម​ដែល​ដណ្ដើមបាន​មេដាយមាស​ដែរនោះ​មាន​ក្រសួងមហាផ្ទៃ​ឈ្នះ​មេដាយមាស ១​គ្រឿង​ដែល​រកបាន​ដោយ​កីឡាការិនី នូវ ស្រី​ពៅ ទម្ងន់​៥៤​គីឡូក្រាម​។ សមាគម​ខេត្តបន្ទាយមានជ័យ​បានទទួល​មេដាយមាស​១​គ្រឿង​ដែល​រកបាន​ដោយ​កីឡាករ គឹម សុថា​ត់ ទម្ងន់​៤៥​គីឡូក្រាម​។ ខេត្តកោះកុង​រកបាន​មេដាយមាស​១​គ្រឿង​ដែរ​ដែល​រកបាន​ដោយ​កីឡាករ ធឿន ធារ៉ា ទម្ងន់​៧១​គីឡូក្រាម ។​

​លោក​ហេង សុឃន​ដែលជា​អគ្គលេខាធិការ​របស់​ស​ហ​ព័ន្ធ​បាន​ឲ្យ​ដឹងថា​ការប្រកួត​ជើងឯក​នេះ​មាន​កីឡាករ កីឡាការិនី​ចូលរួម​ចំ​នួន​១១៣​នាក់​ដែល​ក្នុងនោះ​កីឡាការិនី​ចំនួន​១៣​នាក់​។ ការប្រកួត​តាម​រូបមន្ដ​ជម្រុះ​គឺ​អ្នកចាញ់​ត្រូវ​ធ្លាក់​ដែល​សរុប​ការប្រកួត​ទាំងអស់​មាន​ចំ​
​នួន​៧៥​ប្រកួត​។​

​ក្នុងឱកាស​បិទ​ការប្រកួត​មានការ​អញ្ជើញ​ចូលរួម​ពី​សំណាក់​លោក អ៊ុក សិទ្ធិ​ជាតិ អគ្គនាយក​អគ្គនាយក​ដ្ឋា​ន​កីឡា​នៃ​ក្រសួង​អប់រំ​​យុវជន និង កីឡា លោក​ឧ​ត្ត​ម​សេនីយ៍​ឯក តែម ម៉ឺន ប្រធាន​សហព័ន្ធ​កីឡាប្រដាល់​គុន​ខ្មែរ ៕​