​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ ប្រធានាធិបតី​រុស្ស៊ី វ្ល៉ា​ឌី​មៀរ ពូ​ទីន កាលពី​ថ្ងៃ​សុក្រ​ទី​១៨​កុម្ភៈ បាន​បញ្ជា​ឱ្យ​រដ្ឋាភិបាល​រុស្ស៊ី​ផ្តល់​ជម្រក​និង​អាហារ​ដល់​ប្រជាជន​ដែល​ចាកចេញ​ពី​សាធារណរដ្ឋ​ផ្តាច់​​ខ្លួន​នៅ​ភាគ​ខាងកើត​អ៊ុ​យក្រែន ដែល​ប្រកាស​ដោយ​ខ្លួនឯង នៅពេលដែល​ពួកគេ​បាន​ទៅ​ដល់​ភាគ​ខាងត្បូង​ប្រទេស​រុស្ស៊ី​។​

​ក្រុម​បំបែក​ខ្លួន​ដែល​គាំទ្រ​ដោយ​រុស្ស៊ី​បានប្រកាស​ពី​ការជម្លៀស​ភ្លាមៗ​ចេញពី​តំបន់​របស់​ពួកគេ​នៅ​ព្រឹក​ថ្ងៃ​សុក្រ​ជា​ចំណាត់ការ​ដ៏​គួរឱ្យភ្ញាក់ផ្អើល​មួយ​នៅក្នុង​ជម្លោះ​ដែល​លោក​ខាងលិច​ជឿ​ថា​ទីក្រុង​មូ​ស្គូ​​គ្រោង​នឹង​ប្រើប្រាស់​ដើម្បី​ជា​លេស​ដើម្បី​លុកលុយ​ពេញទំហឹង​លើ​ប្រទេស​ជិតខាង​របស់​ខ្លួន​។​

​សេចក្តីថ្លែងការណ៍​របស់​វិមាន​ក្រឹ​ម​ឡាំង​បាន​និយាយថា​លោក​ពូ​ទី​ន​បាន​បញ្ជា​ឱ្យ​រដ្ឋមន្ត្រី​ទទួលខុសត្រូវ​ក្នុង​ការដោះស្រាយ​ស្ថានការណ៍​គ្រាអាសន្ន​ឱ្យ​ធ្វើ​ដំណើរ​ទៅកាន់​ភាគ​ខាងត្បូង​ប្រទេស​រុស្ស៊ី​ដើម្បី​​រៀបចំ​កន្លែង​ស្នាក់នៅ​សម្រាប់​អ្វី​ដែល​វិមាន​ក្រឹម​ឡាំង​ហៅថា “​ជនភៀសខ្លួន​មកពី​តំបន់​ដុន​បាស (Donbass)”​។​

​សេចក្តីថ្លែងការណ៍​បាន​និយាយថា “​ប្រធានាធិបតី​…​បាន​ណែនាំ (​រដ្ឋមន្ត្រី​) ឱ្យ​ហោះ​ជា​បន្ទាន់​ទៅ​កាន់​តំបន់​នេះ​ដើម្បី​រៀបចំ​ការងារ​ដើម្បី​បង្កើត​លក្ខខណ្ឌ​សម្រាប់​ទទួល​ប្រជាជន ផ្តល់​អាហារ​ក្តៅៗ និង អ្វីៗ​គ្រប់បែប​យ៉ាង​ដែល​ត្រូវការ រួម​ទាំង​ការថែទាំ​សុខភាព​”​។​

​លោកពូ​ទីន​ក៏​បាន​បញ្ជា​ឱ្យ​ផ្តល់ប្រាក់​ចំនួន ១០.០០០ រូប (១២៩ ដុល្លារ​) ដល់​មនុស្ស​គ្រប់រូប​ដែល​មកពី​តំបន់​ដុន​បាស​ផងដែរ​៕

​លោកពូ​ទីន​ឱ្យ​រដ្ឋមន្ត្រី​របស់​គាត់​ត្រៀម​ទទួល​ជនភៀសខ្លួន​ពី​តំបន់​ដុន​បាស