​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ ប្រ៊ែត ភី​ត កំពុង​ប្តឹង​អ៊ែន​ជេ​លីណា ចូ​លី រឿង​លក់​ភាគហ៊ុន​របស់​នាង​ក្នុង​ចម្ការ​ទំពាំងបាយជូរ​នៅ​បារាំង ទី​ដែល​ពួកគេ​បាន​រៀបការ​។​

​កំពូល​តារាភាពយន្ត​ភី​ត​និង​ចូលី ដែល​ធ្លាប់​ជា​គូស្នេហ៍​លេចធ្លោ​បំផុត​របស់​ហូលីវូដ បាន​ទិញ​ភាគហ៊ុន​គ្រប់គ្រង​ក្រុមហ៊ុន​ចម្ការ​ទំពាំងបាយជូ​រ ហ្សា​ទូ​មី​ហា​វ៉ា​ល់ (Chateau Miraval) នៅ​ភាគខាងត្បូង​ប្រទេស​បារាំង​ក្នុង​ឆ្នាំ ២០០៨ ហើយ​បាន​រៀបការ​នៅ​ទី​នោះ​នៅ​ប្រាំមួយ​ឆ្នាំ​ក្រោយមក​។​

​ប៉ុន្តែ​ពួកគេ​បាន​ប្តឹង​រំលាយ​អាពាហ៍ពិពាហ៍​របស់​ពួកគេ​នៅ​ឆ្នាំ ២០១៦ ហើយ​នៅតែ​ជាប់គាំង​នៅ​ក្នុង​ក្តីក្តាំ​តុលាការ​ចាប់តាំងពី​ពេលនោះ​មក រួមទាំង​សិទ្ធិ​ឃុំគ្រង​កូន​ទាំង​ប្រាំមួយ​នាក់​របស់​ពួកគេ​។​

​យោងតាម​ពាក្យបណ្តឹង​ដែល​ប្តឹង​ដោយ​ភី​ត​នៅ​រដ្ឋ​កាលីហ្វ័​រញ៉ា​កាលពី​ថ្ងៃ​ព្រហស្បតិ៍ គូស្នេហ៍​គូ​នេះ​បាន “​យល់ព្រម​ថា​ពួកគេ​នឹង​មិន​លក់​ផលប្រយោជន៍​រៀងៗ​ខ្លួន​នៅក្នុង​ក្រុមហ៊ុន Chateau Miraval ដោយ​គ្មាន​ការយល់ព្រម​ពី​គ្នា​នោះឡើយ​”​។​

​ប៉ុន្តែ​កាលពី​ខែតុលា​ឆ្នាំ​មុន ចូលី​បាន​លក់​ភាគហ៊ុន​របស់​នាង​ឱ្យទៅ “​ក្រុមហ៊ុន​ផលិត​ស្រា​ដែលមាន​មូលដ្ឋាន​នៅ​ប្រទេស​លុច​សំបួរ​ដែល​គ្រប់គ្រង​ដោយ​មហាសេដ្ឋី​រុស្សី​ឈ្មោះ យូ​រី សេ​ហ្វ​ភ្ល័​រ (Yuri Shefler)” នេះ​យោងតាម​ឯកសារ​តុលាការ ដែល​ទទួល​បាន​ដោយ​ទីភ្នាក់ងារ​សារព័ត៌មាន AFP​។​

​ឯកសារ​របស់​ភី​ត​បាន​ចោទប្រកាន់​ថា ចូលី​បាន​រំលោភ​លើ​លក្ខខណ្ឌ​នៃ​កិច្ចព្រមព្រៀង​ដើម​របស់​ពួកគេ ដោយ​មិន​បាន​ផ្តល់ឱ្យ​គាត់​នូវ​ការបដិសេធ​ជា​លើក​ដំបូង​សម្រាប់​ភាគហ៊ុន​របស់​នាង​ហើយ​ថា​នាង​​កំពុង​ស្វះស្វែង “​ទាញ​យក​ប្រាក់​ចំណេញ​ស្រួលៗ​សម្រាប់​ខ្លួន​នាង​ខណៈ​ធ្វើឱ្យ​ខាត​ប្រយោជន៍​របស់​ភី​ត​”​។​

​ឯកសារ​របស់​ភី​ត​និយាយថា “​ចូ​លីឈប់​រួមចំណែក​ដល់​ក្រុមហ៊ុន Chateau Miraval ជា​យូរ​មក​ហើយ ខណៈ​ដែល​ភី​ត​បាន​បន្ត​ចាក់​លុយ​និង​ការវិនិយោគ​ភាគហ៊ុន​ទៅក្នុង​អាជីវកម្ម​ស្រា​ដោយ​បង្កើត​​វា​ទៅ​ជា​ក្រុមហ៊ុន​ដែល​រីកចម្រើន​ដូច​សព្វថ្ងៃ​”​។​

​បណ្តឹង​របស់​ភី​ត​ស្នើសុំ​ការកាត់ក្តី​ដោយ​គណៈវិនិច្ឆ័យ​។​

​បណ្តឹង​នោះ​ពណ៌នា​អំពី​ចម្ការ​ទំពាំងបាយជូរ​នោះ​ថា​ជា “​អាជីវកម្ម​ស្រា​ខ្នាត​តូច​មិនមាន​ផលចំណេញ​” ដែល​ត្រូវការ​ការជួសជុល​” មុន​ពេល​ប្តី​ប្រពន្ធ​ទាំង​ពីរ​ទិញ​វា​ក្នុង​ឆ្នាំ ២០០៨​។​

​អ្នក​ទាំង​ពីរ​បាន​ចំណាយ “​ប្រហែល ២៨ លាន​ដុល្លារ​” ដោយ​ភី​ត​រួមចំណែក ៦០ ភាគរយ និង ចូ​លី ៤០ ភាគរយ​។​

​ប៉ុន្តែ​ភី​ត​បាន​បន្ត​ចំណាយ​លើ​ការជួសជុល “​ក្នុង​លក្ខណៈ​មិន​សមាមាត្រ​នឹង​ចំណែក​កម្មសិទ្ធិ​របស់​គាត់​” ដោយ​យល់​ថា​ចូ​លីនឹង​មិន​ដក​ខ្លួន​ចេញពី​ការវិនិយោគ​ដោយ​គ្មាន​ការយល់ព្រម​ពី​គាត់​។​

​បណ្តឹង​នេះ​បន្តថា ភី​ត​បាន​ជួល​លោក ម៉ាក ភៀ​រីន (Marc Perrin) ដែលជា​អ្នក​ផលិត​ស្រា​កំពូល​ម្នាក់​របស់​បារាំង​ឱ្យ​ជួយ​ប្រែក្លាយ​អាជីវកម្ម​នេះ​ទៅ​ជា​ក្រុមហ៊ុន​ផលិត​ស្រា​ទំពាំងបាយជូរ​ឈានមុខ​គេ ប៉ុន្តែ “​ចូ​លី​មិន​មាន​ជាប់ពាក់ព័​ន្ធ​ក្នុង​កិច្ចខិតខំ​ប្រឹងប្រែង​ទាំងនេះ​ទេ​”​។​

​ប្រាក់ចំណូល​ត្រូវបាន​រាយការណ៍​ថា​បាន​កើនឡើង​ពី​ប្រហែល ៣ លាន​ដុល្លារ​ក្នុង​ឆ្នាំ ២០១៣ ដល់​ជាង ៥០ លាន​ដុល្លារ​កាលពី​ឆ្នាំមុន ដោយ​ក្រុមហ៊ុន Miraval​ថ្មីៗ​នេះ​បាន​ចេញ​លក់​ស្រា​សាំ​ប៉ា​ញ​ផ្កាឈូក​​ថ្មី​ផង​ដែរ​៕

​ភី​ត​និង​ចូលី​បាន​រៀបការ​នៅ​ចម្ការ​ទំពាំងបាយជូរ Chateau Miraval កាលពី​ឆ្នាំ​២០១៤ ដែល​ឥឡូវ​បាន​ក្លាយជា​ក្រុមហ៊ុនស្រា​ដ៏​រីកចម្រើន​មួយ