ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ ប្រភព​ច្បាប់​មួយ​បាន​និយាយ​កាលពី​ថ្ងៃ​សុក្រ ទី​១៨ កុម្ភៈ​ថា ជំទាវ​ទី​មួយ​របស់​បារាំង​លោកស្រី ព្រី​ហ្សីត ម៉ា​ក្រុង (Brigitte Macron)​បាន​ដាក់ពាក្យ​ប្ដឹង​ស្ត្រី​​ពីរ​នាក់​ដែល​អះអាង​ថា លោកស្រី​ជា​មនុស្ស​កែ​ភេទ ដោយ​បង្ក​ឱ្យ​មាន​រលក​នៃ​ពាក្យ​ចចាមអារ៉ាម​ពេញ​អ៊ី​ន​ធឺ​ណេត​នៅ​ប៉ុន្មាន​សប្តាហ៍​មុន​យុទ្ធនាការ​បោះឆ្នោត​ឡើង​វិញ​របស់​ស្វាមី​លោកស្រី​។​

​សវនាការ​លើកដំបូង​ត្រូវបាន​កំណត់​នៅ​ថ្ងៃទី ១៥ ខែ​មិថុនា​នៅ​ទីក្រុង​ប៉ារីស​សម្រាប់​ដំណើរការ​នីតិវិធី​រដ្ឋប្បវេណី ដែល​នឹង​កាត់ក្តី​អំពី​ការរំលោភ​លើ​សិទ្ធិ​ឯកជន និង​សិទ្ធិ​ផ្ទាល់​ខ្លួន​ជា​មូលដ្ឋាន​និង​ការ​​ប្រើប្រាស់​រូបភាព​របស់​លោក​ស្រី​ដោយ​ខុសច្បាប់​។​

​មេធាវី​របស់​លោកស្រី​ព្រី​ជីត ម៉ា​ក្រុង គឺ​លោក ហ្ស​ង់ អេ​ណូឈី (Jean Ennochi) បាន​ប្រាប់​ទីភ្នាក់ងារ​សារព័ត៌មាន AFP​ថា លោកស្រី​និង​បងប្រុស​របស់​លោកស្រី​គឺ​លោក ហ្ស​ង់​-​មី​សែ​ល ត្រូ​ញូ (Jean-Michel Trogneux) ក៏​បាន​ដាក់ពាក្យ​ប្តឹង​ពី​បទ​បរិហារកេរ្តិ៍​ផងដែរ ដែល​ការចោទប្រកាន់​នេះ​អាច​ជំរុញ​ឱ្យ​រដ្ឋអាជ្ញា​បើក​សំណុំរឿង​ព្រហ្មទណ្ឌ​។​

​ចំណាត់ការ​ផ្លូវច្បាប់​នេះ​ត្រូវបាន​រាយការណ៍​លើកដំបូង​ដោយ​ទូរទស្សន៍ M6 ដែល​និយាយថា បណ្តឹង​នេះ​ត្រូវ​បាន​សហការ​ប្តឹង​ដោយ​កូន​បី​នាក់​របស់​លោកស្រី​ព្រី​ហ្សីត​ពី​អាពាហ៍ពិពាហ៍​មុនក៏​ដូចជា​បងប្រុស​របស់​លោកស្រី​។​

​ក្នុង​រយៈពេល​ប៉ុន្មាន​ខែ​ថ្មីៗ​នេះ សារ​ជា​ច្រើន​បាន​លេចឡើង​ពេញ​បណ្តាញ​សង្គម​ដែល​អះអាង​ថា ជំទាវ​ទីមួយ ដែល​មានឈ្មោះ​ដើម​ថា ព្រី​ហ្សីត ត្រូ​ញូ (Brigitte Trogneux) គឺជា​ស្ត្រី​កែ​ភេទ ដែល​មាន​ឈ្មោះ​ពី​កំណើត​ថា ហ្ស​ង់ មី​សែ​ល (Jean-Michel)​។​

​ស្ត្រី​ពីរ​នាក់ ដែល​ជា​គោលដៅ​នៅក្នុង​បណ្តឹង​នោះ ដែល​ម្នាក់​ជា​អ្នក​ផ្សព្វផ្សាយ​សាសនា​និង​ម្នាក់​ទៀត​ជា​អ្នកកាសែត​ឯករាជ្យ បាន​បង្ហោះ​ពាក្យ​ចចាមអារ៉ាម​នេះ រួមជាមួយ​នឹង​រូបភាព​របស់​ជំទាវ​ទី​មួយ​និង​គ្រួសារ​របស់​លោកស្រី​នៅលើ YouTube កាលពី​ខែ​ធ្នូ​។​

​ការ​បង្ហោះ​នេះ​កើតឡើង​គាប់​ជួន​នឹង​ការកើនឡើង​នៃ​សារ​អមដោយ​ទ្រុង​ជ្រូក​ថា “#JeanMichelTrogneux” នៅលើ Twitter និង​បណ្តាញ​ផ្សេងទៀត​។​

​ការិយាល័យ​របស់​លោក អេម​ម៉ានុយ​អែល ម៉ា​ក្រុង មិន​ឆ្លើយតប​ទៅ​នឹង​សំណើ​សុំ​ការបំភ្លឺ​នោះទេ​។​

​ទំនាក់ទំនង​របស់​ប្រធានាធិបតី​ជាមួយ​ភរិយា​របស់​គាត់ ដែល​មាន​អាយុ​បង​គាត់ ២៤ ឆ្នាំ ដែល​គាត់​បាន​ជួប​នៅ​ពេល​លោកស្រី​នៅ​ជា​គ្រូបង្រៀន​របស់​គាត់​ហើយ​គាត់​នៅ​ជា​ក្មេង​ជំទង់​នោះ​គឺជា​ប្រភព​​នៃ​ការចាប់អារម្មណ៍​ពី​ប្រព័ន្ធ​ផ្សព្វផ្សាយ​ក្នុងប្រទេស​បារាំង​និង​ក្រៅប្រទេស​។​

​វា​មិនមែន​ជា​លើក​ទី​មួយ​ទេ​ដែល​គូស្នេហ៍​នេះ​ក្លាយជា​គោលដៅ​វាយប្រហារ​ដោយ​ពាក្យ​ចចាមអារ៉ាម​អំពី​យេនឌ័រ​ឬ​ទំនោរ​ផ្លូវភេទ​។ ក្នុងអំឡុង​យុទ្ធនាការ​បោះឆ្នោត​ប្រធានាធិបតី​ឆ្នាំ ២០១៧ លោក អេម​ម៉ានុយ​អែល ម៉ា​ក្រុង បាន​ទាត់ចោល ការអះអាង​ថា​គាត់​ប្រុស​ខ្ទើយ​៕

​ជំទាវ​ទី​មួយ​របស់​បារាំង​លោកស្រី ព្រី​ហ្សីត ម៉ា​ក្រុង