ដោយៈ​រ៉ា​ម៉ន​/​ភ្នំពេញៈ​លោក ឃឹម ស៊ុន​សូ​ដា អភិបាលខណ្ឌ​កំបូល និង​ជា​អនុប្រធាន​គណបក្ស​ប្រជាជន​កម្ពុជា ខណ្ឌ​កំបូល​នៅ​ព្រឹក​ថ្ងៃទី​១៩​ខែកុម្ភៈ​ឆ្នាំ​២០២២​នេះ បាន​ដឹកនាំ​មន្ត្រីក្រោមឱវាទ និង​ក្រុមការងារ​ចុះទៅពិនិត្យ​ការ​ការដ្ឋាន ជួសជុល​ផ្លូវ​ក្រាល​ថ្ម​មិច​មួយ​ខ្សែ​ជា​បណ្តោះអាសន្ន ដែលមាន​ទទឹង​ប្រាំបី​ម៉ែត្រ​និង​បណ្តោយ​ប្រវែង​១៥០០​ម៉ែត្រ ស្ថិតក្នុង​ភូមិ​ដូន​កុក សង្កាត់​បឹង​ធំ ខណ្ឌ​កំបូល ។​

​ក្នុងពេល​ចុះ​ពិនិត្យ​ការ​ឈូស​ត្រាស​ផ្លូវ​ខាងលើនេះ លោក ឃឹម ស៊ុន​សូ​ដា បានឱ្យដឹងថា​ដោយ​មើលឃើញ​ពី​បញ្ហាលំបាក របស់​បងប្អូន​ប្រជាពលរដ្ឋ លោក​ឃួ​ង ស្រេង អភិបាល​រាជធានី​ភ្នំពេញ​បាន​ចាត់​ឱ្យ​លោក​និង​ក្រុមការងារ​បច្ចេកទេស ធ្វើការ​ជួសជុល​ជា​បណ្តោះអាសន្ន​នៅ​កំណាត់​ផ្លូវ​មួយ​នេះ​ដោយ​ចាក់​ក្រាល​ថ្ម​មិច ឲ្យ​បាន​ស្អាត​បង្ក​ភាពងាយស្រួល ដល់​ក្មួយ​សិក្សា​នុ​សិស្ស ប្រជាពលរដ្ឋ​ធ្វើដំណើរ​ឆ្លងកាត់​តំបន់​នេះ អាច​ប្រកប​កិច្ចការ​រកស៊ី​បាន​ប្រសើរ​។​ជាពិសេស តំបន់​នេះ ក៏មាន​តំបន់​ទេសចរណ៍​មួយ​ដែរ​ព្រោះតែ​ផ្លូវ​នេះ​តាម​បណ្តោយ​បឹង​ធំ​។ ក្រោយពេល​ផ្លូវ​នេះ​ជួសជុល​រួចហើយ លោក​សង្ឃឹមថា នឹងមាន​ប្រជាពលរដ្ឋ​មក​លំហែ​កម្សាន្ត​នៅតាម​រមណីយដ្ឋាន​នេះ​ច្រើនជាង​មុន​ដោយសារ​ផ្លូវ​ងាយ ស្រួល​ធ្វើដំណើរ ហើយ​ទីតាំងនៅ​ជិត​អាចមក​លំហែ​ដោយ​សប្បាយរីករាយ​៕

អ្នកស្រី រៀល យឺន បាន​ឲ្យ​ដឹងថា​ផ្លូវ​នេះ​ក្រោយពេល​រង​ផលប៉ះពាល់​ដោយ​ជំនន់​គឺ​ពិបាក​ក្នុងការ​ធ្វើដំណើរ​នៅ​រដូវវស្សា ម្ដងៗ មាន​ជំនន់​ខ្លាំង ផ្លូវ​នេះ​រង​ការលិចលង់ ។ អ្នកស្រី​រំពឹងថា ក្រោយពេល​ជួសជុល​ជា​បណ្ដោះអាសន្ន​នេះ​នឹងធ្វើ​ឲ្យ ប្រជាពលរដ្ឋនៅក្នុង​តំបន់​នេះ មាន​ភាពងាយស្រួល​ក្នុងការ​ធ្វើដំណើរ​។​អ្នកស្រី​ថ្លែងអំណរគុណ​ដល់​លោក​អភិបាលខណ្ឌ លោក​អភិបាល​រាជធានី​ភ្នំពេញ​ជាពិសេស​ប្រមុខ​រាជរដ្ឋាភិបាល​ដែល​តែងតែ​យកចិត្តទុកដាក់​ក្នុង​ការជួយ​ដល់​ប្រជាពលរដ្ឋ នៅតាម​ទីជនបទ​នានា​ទូទាំងប្រទេស​៕​សរន​