ដោយៈមុនីរ័ត្ន/​ភ្នំពេញៈគណបក្ស​ប្រជាជន​កម្ពុជា មិនមាន​ការព្រួយបារម្ភ​ចំពោះ​ការ​ចងសម្ព័ន្ធភាព​រប​ស់គណបក្ស នយោបាយ​មួយចំនួន ដែល​ទើបតែ​បង្កើត​ថ្មី ដើម្បី​ប្រកួត​ជាមួយ​គណបក្ស​ខ្លួន​នៅក្នុង​ការបោះឆ្នោត​នាពេលខាងមុខ​នេះ​ទេ​។ ការមិន​ព្រួយបារម្ភ គឺ​ដោយសារតែ​បក្ស​ទាំងនោះ កើតចេញពី​គណបក្ស​ដែល​ចាញ់​រួចមកហើយ​។​នេះបើតាមការបញ្ជាក់របស់លោក សុខ ឥសាន អ្នកនាំពាក្យ​គណបក្ស​ប្រជាជន​កម្ពុជា។

លោក សុខ ឥសាន្ត អ្នកនាំពាក្យគណបក្សប្រជាជនកម្ពុជា(រូបថតឯកសារ)

​លោកបានប្រាប់រស្មីកម្ពុជាកាលពី​ព្រឹក​ថ្ងៃទី​១៩ ខែកុម្ភៈ នេះ​ថា ការ​ចងសម្ព័ន្ធភាព​នេះ អត់​មានអី​ទំនាស់​នឹង​ច្បាប់​ដែល​ត្រូវ​ហាមឃាត់​ទេ។​ការ​ចងសម្ព័ន្ធភាពរ​វា​ង​គ្នា​គាត់​និង​គ្នា​គាត់​នេះ គឺ​ឲ្យ​តែ​គេ​ឯកភាពគ្នា វា​អត់​មាន​បញ្ហា​អី​ទេ​។លោក​បាន​បញ្ជាក់ថា “​ការ​ចងសម្ព័ន្ធភាព​នេះ មិនមែនជា​រឿង​ចម្លែក​ទេ។ វា​ជា​រឿង​ធម្មតា​សម្រាប់​គណបក្ស​ប្រជាជន​កម្ពុជា ពីព្រោះ​ក្នុងចំណោម​គណបក្ស​ដែល​ចង់សម្ព័ន្ធភាព​ជាមួយគ្នា​នេះ គឺជា​ឫសគល់​តែមួយ​ទេ​។ បើ​ឫសគល់​តែមួយ​មេខ្លោង​ធំ​ចាញ់ ហើយ​ត្រូវ​រលំរលាយ​រួចហើយ ហើយ​ប្រាំមួយ​គណបក្ស​ដែល​ចេញពី​ក្នុង​ពាង​ដែល​បែកខ្ទេច​ខ្ទី គឺ​វា​គ្មាន​កម្លាំង​អី​ដែល​នឹង​មក​ប្រកួតប្រជែង​ជាមួយ​គណបក្ស​ប្រជាជន​កម្ពុជា​ទេ ឬមួយ​ក៏​ធ្វើ​ឲ្យ​គណបក្ស​ប្រជាជន​កម្ពុជា​មានការ​ប្រួល​បារម្ភ​ទេ​”​។​

​អ្នកនាំពាក្យ​ដដែលបន្តថា “​គណបក្សប្រឆាំង​កន្លង​ទៅនេះ វា​ជា​ពាង​ធំ​មួយ​ហើយ ដោយ​ពាង​នឹង​វា​បែក​រួចហើយ ក៏ប៉ុន្តែ ១១៨​នាក់​បាន​ចេញពី​ក្នុង​ពាង​នឹង​ហើយ ក៏ប៉ុន្តែ​ក្នុងចំណោម ១១៨​នាក់​នឹង វា​មាន​២៩​ត្រឡោក​មក​បង្កើត​គណ​បក្សនយោបាយ និង​ទទួលបាន​នីតិសម្បទា​ធ្វើ​នយោបាយ​រួចហើយ។ អីចឹង​វា​មិនមែនជា​រឿង​អី​គួរ​ឲ្យ​ភ័យព្រួយ​ទេ។ ប្រាំមួយ​​ត្រ​គោល​បូក​ចូលគ្នា​ទៅ​វា​មិនបាន​ស្មើ​ទឹក​ពាង​ខាងដើម​ទេ។ ទឹក​ពាង​ខាងដើម​នៅ​ប្រកួត​មិន​ឈ្នះ​គណបក្ស​ប្រជាជន​កម្ពុជា​ផង ចុះ​ទម្រាំប្រាំមួយ​ត្រឡោក​មក​ប្រកួតប្រជែង​ជាមួយ​គណបក្ស​ប្រជាជន​កម្ពុជា​”​។

​គួររំលឹកគណបក្សនយោបាយ​ចំនួនប្រាំមួយដែល​លោក អ៊ូ ច័ន្ទ​រ័ត្ន សហ​ស្ថាបនិក​គណបក្ស​កែទម្រង់​កម្ពុជា បាន​អះអាងថា ចងសម្ព័ន្ធភាព​នឹង​គ្នា​ដើម្បី​ត្រៀម​បង្កើត​គណបក្ស​ធំ​មួយ​ប្រកួត​ជាមួយ​គណបក្ស​ប្រជាជន​កម្ពុជា នៅក្នុង​ការបោះឆ្នោត​នាពេល​ខាងមុខនេះ មានដូចជាៈ ១. គណបក្ស​កម្ពុជា​និយម របស់លោក​យ៉ែម បុញ្ញឫទ្ធិ​។ ២. គណបក្ស​ប្រជាធិបតេយ្យ​មូលដ្ឋាន​របស់លោក យ៉េ​ង វិ​រៈ​។ ៣. គណបក្ស​កែទម្រង់​កម្ពុ​ជា របស់លោក​អ៊ូ ច័ន្ទ​រ័ត្ន​។ ៤. គណបក្ស​ភ្លើងទៀន ។ ៥. គណបក្ស​បំណង​ពលរដ្ឋ របស់លោក អ៊ិត សារ​ម្យ និង​ទី​៦. គណបក្ស​កម្លាំង​ប្រជាធិបតេយ្យ របស់លោក អ៊ុន វិ​សិទ្ធ​គុន​៕
សរន