​ប្រែ​សម្រួលៈ​បំណង​/​គៀ​វ​(​ដេល្លី​ម៉េល​)៖ ពួក​មេដឹកនាំ​បំបែក​ខ្លួន​នៅ​អ៊ុយ​ក្រែន​ខាងកើត​បាន​បញ្ជា​អោយ​មាន​ការ​ចល័ត​ទ័ព​ទូទៅ​មួយ​កាលពី​ថ្ងៃ​សៅរ៍ ចំ​ពេល​អំពើហិង្សា​កើន​ឡើង​ខ្លាំង​នៅក្នុង​តំបន់​ហែក​​ហួរ​ដោយ​សង្គ្រាម​ផ្តាច់ខ្លួន​មួយ​នេះ និង​ចំពេល​មាន​ការបារម្ភ​នៅ​លោកខាងលិច​ថា រុស្ស៊ី​អាច​នឹង​នឹង​ប្រើ​អំពើហិង្សា​នេះ​ជា​លេស​ដើម្បី​ចូល​ឈ្លានពាន​អ៊ុ​យក្រែន​។​

​ដេននី​ស ពូ​ស៊ី​លីន (Denis Pushilin)​ប្រមុខ​រដ្ឋាភិបាល​ផ្តាច់ខ្លួន​គាំទ្រ​ដោយ​រុស្ស៊ី​នៅ​តំបន់​ដុន​ណិ​ត​ស៍​(Donetsk)​របស់​អ៊ុ​យក្រែន បាន​ចេញ​ការប្រកាស​អំពី​ការ​ចល័ត​ទ័ព​ទូទៅ​មួយ​និង​បាន​​អំពាវនាវ​អោយ​ទាហាន​បំរុង​បង្ហាញ​ខ្លួន​នៅ​តាម​ការិយាល័យ​យោធា​។​

​ការប្រកាស​ស្រដៀង​គ្នា​មួយ​បាន​កើត​មាន​តាម​ក្រោយ​ភ្លាម​ចេញពី​លោក ឡេ​អូនី​ដ ប៉ា​សេច​នី​ក​(Leonid Pasechnik) មេដឹកនាំ​ផ្តាច់ខ្លួន​នៅ​តំបន់ លុន​ហា​នស៍​(Luhansk)​។​

​ពូ​ស៊ី​លីន បាន​យោង​ដល់​ការ​គំរាម​ពី​ការឈ្លានពាន​របស់​កង​កម្លាំង​អ៊ុយ​ក្រែន​ដើម្បី​ចេញ​ការប្រកាសនេះ ។​

​សូមបញ្ជាក់​ថា ពួក​បំបែក​ទឹកដី​និង​កងកម្លាំង​អ៊ុយ​ក្រែន​បាន​និង​កំពុ​ង​ប្រយុទ្ធ​គ្នា​អស់​ពេល​ជិត​ប្រាំបី​ឆ្នាំ តែ​អំពើ​ហិង្សា​នៅតាម​ខ្សែត្រៀម​ក្នុង​តំបន់​ផ្តាច់ខ្លួន​បាន​ផ្ទុះ​ឡើង​ខ្លាំង​នៅ​ពីរ​បី​ថ្ងៃ​មកនេះ រួម​​មានការ​បំផ្ទុះ​គ្រាប់បែក​បង្កប់​ក្នុង​រថយន្ត​នៅ​ទីក្រុង​ដុន​ណិ​ត​ស៍ និង​ក្បួន​រថយន្ត​ដឹក​ជំនួយ​មនុស្សធម៌​រួម​ទាំង​សាលា​មត្តេយ្យ​ត្រូវ​គ្រាប់ផ្លោង​។​

​តាម​ការប៉ាន់ស្មាន​របស់​លោក​ខាងលិច ទាហាន​រុស្ស៊ី​ដល់​ទៅ​១៥០.០០០​នាក់​កំពុង​ឈរជើង​ក្បែរ​ព្រំដែន​នៅ​ជុំវិញ​អ៊ុ​យក្រែន ហើយ​ជម្លោះ​នៅ​តំបន់​ផ្តាច់ខ្លួន​នេះ​អាច​ផ្តល់​ជា​លេស​សំរាប់​រុស្ស៊ី​ចូល​អន្តរាគមន៍​។​

​ប្រជាជន​នៅ​តំបន់​ដុន​ណិ​ត​ស៍​ត្រូវបាន​ជម្លៀស​ចូល​ទឹកដី​រុស្ស៊ី​ខាងត្បូង​កាលពី​ថ្ងៃ​សុក្រ​ទី​១៨​កុម្ភៈ នៅពេល​មាន​ការបាញ់​ផ្លោង​ដាក់គ្នា

​ក្នុងការ​វាយ​តំលៃ​បែប​បំភ័យ​មួយ ប្រធានាធិបតី​អាម៉េរិក​លោក ចូ បៃ​ដិន កាលពី​ថ្ងៃ​សុក្រ​បាន​អះអាងថា លោក​ជឿ​ង​ថា ប្រធានាធិបតី​រុស្ស៊ី​លោក វ្ល៉ា​ឌី​មៀ ពូ​ទីន បាន​សំរេចចិត្ត​ចូល​ឈ្លានពាន​អ៊ុ​យក្រែន​​និង​វាយប្រហា​រដ្ឋធានី​គៀវ​។​

​បៃ​ដិន ដែល​ប៉ុន្មាន​សប្តាហ៍​មក​ហើយ​នៅតែ​និយាយ​ថា​លោក​មិន​ប្រាកដ​ថា​លោក​ពូ​ទី​ន​បាន​សំរេចចិត្ត​ចុងក្រោយ​ហើយ​ឬ​នៅ​នោះ ពេលនេះ​បាន​និយាយថា​ការ​វិនិច្ឆយ​របស់លោក​បាន​ផ្លាស់ប្តូរ​ទៅ​តាមព័ត៌​​មាន​ស៊ើបការណ៍​អាម៉េរិក​។​

​ក្នុងពេល​ជាមួយគ្នា រដ្ឋាភិបាល​វិមាន​ក្រឹម​ឡាំង បានប្រកាសថា ខ្លួន​នឹង​ធ្វើ​សមយុទ្ធ​សព្វាវុធ​នុយក្លេអ៊ែរ​នៅ​ថ្ងៃ​សៅរ៍ ហើយ​លោកពូ​ទី​ន​បាន​សន្យា​ការពារ​ផលប្រយោជន៍​រុស្ស៊ី​ទល់នឹង​ការ​គំរាម​កាន់តែ​ទន្ទ្រាន​​ចូលមក​ពី​លោក​ខាងលិច​។​

​លោកបៃ​ដិនបាន​គំរាម​ដាក់ទ​ណ្ឌកម្ម​សេដ្ឋកិច្ច​និង​ការទូត​ដ៏​អន្តរាយ​ប្រឆាំង​រុស្ស៊ី បើសិនជា​រដ្ឋាភិបាល​ក្រុង​មូ​ស្គូ​ហ៊ាន​ចូល​ឈ្លានពាន និង​ជំរុញ​អោយ​លោកពូ​ទីន​គិត​សាជាថ្មី និង​ថា​អាម៉េរិក​និង​សម្ព​ន្ធ​​មិត្ត​លោកខាងលិច​របស់ខ្លួន​ពេល​នេះ​សាមគ្គី​គ្នា​ខ្លាំ​ជា​ពេល​ណា​ទាំងអស់ ដើម្បី​ធានា​ថា រុស្ស៊ី​នឹង​សង​តំលៃ​មហា​ខ្ពស់​មួយ​ចំពោះ​ការចូល​ឈ្លានពាន​ប្រទេស​ជិតខាង​ខ្លួន​៕

​មន្ត្រី​អាម៉េរិក​ម្នាក់​បាន​និយាយថា កងកម្លាំង​ជើងគោក​រុស្ស៊ី ៤០​ទៅ​៥០​ភាគរយ​កំពុង​ឈរជើង​នៅ​ទីតាំង​ដែល​អាច​មើលឃើញ​ពី​ព្រំដែន​អ៊ុ​យក្រែន​