​ប្រែ​សម្រួលៈ​បំណង​/​ដុន​ណិ​ត​ស៍​,​អ៊ុ​យក្រែន​,​មូ​ស្គូ​(ST)៖​កងកម្លាំង​នុយក្លេអ៊ែរ​យុទ្ធសាស្ត្រ​របស់​រុស្ស៊ី​កាលពី​ថ្ងៃ​សៅរ៍​ទី​១៩​កុម្ភៈ បាន​ធ្វើ​សមយុទ្ធ​ក្រោម​ការត្រួត​មើល​របស់​ប្រធានាធិបតី​រុស្ស៊ី​លោក​វ្ល៉ា​ឌី​មៀ ពូ​ទីន​​ហើយ​រដ្ឋាភិបាល​ក្រុង​វ៉ាស៊ីនតោន​បាន​អះអាងថា ទាហាន​រុស្ស៊ី​កំពុង​ប្រមូលផ្តុំ​នៅក្បែរ​ព្រំដែន​អ៊ុយ​ក្រែន​ដែល​ប្រុង​តែ​វាយលុក​ចូល​។​

​ដោយ​ការព្រួយបារម្ភ​នៅ​លោកខាងលិច​កាន់តែ​កើនឡើង ពួក​រដ្ឋមន្ត្រីការបរទេស​មក​ពី​ក្រុម​G-7​បាន​និយាយថា​ពួកគេ​មិន​បាន​ឃើញ​ភស្តុ​ង​តាង​នៃ​ការកាត់បន្ថយ​សកម្មភាព​យោធា​រុស្ស៊ី​នៅក្នុង​តំបន់​​ក្បែរ​ព្រំដែន ហើយ​«​នៅតែ​ព្រួយបារម្ភ​ជាខ្លាំង​»​អំពី​សភាពការណ៍​នេះ​។​​ពួក​គេបាន​អំពាវនាវ​អោយ​រុស្ស៊ី​ជ្រើស​យក​ផ្លូវ​ការទូត និង​បន្ថយ​ភាព​តានតឹង​។​

​ក្នុងពេល​ជាមួយគ្នា បារាំង​និង​អាឡឺម៉ង់ បាន​អំពាវនាវ​អោយ​ពលរដ្ឋ​របស់​ខ្លួន​ទាំងអស់​ឬ​ខ្លះ​ដែល​កំពុង​នៅ​អ៊ុយ​ក្រែន​ចាកចេញ បន្ទាប់​ពី​រដ្ឋាភិបាល​ក្រុង​គៀវ​និង​មូ​ស្គូ​ចោទប្រកាន់គ្នា​អំពី​ការបាញ់​ផ្លោង​​នៅតាម​ព្រំដែន​។​

​ដោយ​អះអាង​ថា នឹង​មាន​ការចូល​ឈ្លានពាន​មួយ​ដោយ​ជៀស​មិន​ផុត រដ្ឋមន្ត្រី​ការពារជាតិ​អាម៉េរិក​លោក​ឡយ អូ​ស្ទីន បាន​និយាយថាកងកម្លាំង​រុស្ស៊ី​បាន​«​ចាប់ផ្តើម​បំបែកហ្វូង​និង​រុល​មក​កៀក​ព្រំដែន​ ហើយ​យើង​សង្ឃឹមថាលោកពូ​ទីន​ថយ​ចេញពី​មាត់ជ្រោះ​នៃ​ជម្លោះ​នេះ​»​។​

​រុស្ស៊ី​បាន​បញ្ជា​អោយ​បង្កើន​កងកម្លាំង​យោធា​នៅក្បែរ​ព្រំដែន​អ៊ុ​យក្រែន នៅ​ពេល​ខ្លួន​ទាមទារ​អោយ​អង្គការ​ណា​តូ​រារាំង​កុំអោយ​អ៊ុយ​ក្រែន​ចូលរួម​ក្នុង​សម្ពន្ធភា​ព​យោធា​ដឹកនាំ​ដោយ​អាម៉េរិក​នេះ តែ​លោក​​ខាងលិច​បាន​ច្រានចោល​និង​ព្រមាន​ថា ការចូល​ឈ្លានពាន​អ៊ុយ​ក្រែន​គ្រោះថ្នាក់ បង្ក​មហន្តរាយ​និង​នាំអោយ​រុស្ស៊ី​បង់​​តំលៃ​សែន​ខ្ពស់​។​

​រដ្ឋាភិបាល​ក្រុង​មូ​ស្គូ​អះអាងថា ខ្លួន​កំពុង​ដកទ័ព តែ​រដ្ឋាភិបាល​ក្រុង​វ៉ាស៊ីនតោន​និង​សម្ពន្ធមិត្ត​និយាយថា​រុស្ស៊ី​កំពុង​បង្កើន​កម្លាំង​ទ័ព​។​

​រដ្ឋាភិបាល​វិមាន​ក្រឹម​ឡាំង​បាន​និយាយថា ខ្លួន​បាន​បាញ់​សាកល្បង​កាំជ្រួច​លឿន​ជាង​សម្ល​ង​និង​កាំជ្រួច​បណ្តែត​បញ្ជា​គោលដៅ​ចេញពី​សមុទ្រ​ដោយ​ជោគជ័យ​ក្នុង​សមយុទ្ធ​កងកម្លាំង​នុយក្លេអ៊ែរ​យុទ្ធសាស្ត្រ​​របស់ខ្លួន​កាលពី​ថ្ងៃ​សៅរ៍​។​

​ពួក​អ្នកវិភាគ​បាន​និយាយថា សមយុទ្ធ​នេះ​មាន​បំណង​បញ្ជូន​សារ​មួយ​អោយ​លោក​ខាងលិច​ទទួលយក​ការទាមទារ​របស់​រុស្ស៊ី​អំពី​ការធានា​សន្តិសុខ​របស់​ខ្លួន នៅពេល​អង្គការ​ណា​តូ​កាន់តែ​ពង្រីក​សមាជិក​​ភាព​ចូលមក​កៀក​ព្រំដែន​រុស្ស៊ី​។​

                 ​លោកពូ​ទីន រួម​ជាមួយ​សម​ភាគី​បេឡា​រូ​ស បាន​ត្រួត​មើល​សមយុទ្ធ​នេះ​តាម​កញ្ចក់​ទូរទស្សន៍​ចេញពី​វិមាន​ក្រឹម​ឡាំង​

​សមយុទ្ធ​នុយក្លេអ៊ែរ​នេះ​ត្រូវបាន​ធ្វើឡើង​ក្រោយ​សមយុទ្ធ​របស់​កងកម្លាំង​រុស្ស៊ីអ​ស់​បួន​ខែ​មកនេះ ដែល​រួម​មាន​ការបង្កើន​កម្លាំង​ដែល​លោក​ខាង​លោក​ថា​មាន​ដល់​១៥០.០០០​នាក់​ទៅ​កាន់​ភាគ​ខាងជើង​​ខាងកើត​និង​ខាងត្បូង​ប្រទេស​អ៊ុ​យក្រែន​។​ឧទ្ធម្ភាគចក្រ​ថ្មី​និង​ក្រុម​រថក្រោះ រថ​ពាស​ដែល​ប្រយុទ្ធ រួម​ទាំង​សម្ភារ​គាំទ្រក៏​ត្រូវបាន​បញ្ជូន​ទៅកាន់​តំបន់​ក្បែរ​ព្រំដែន​។​

​កាលពី​ថ្ងៃ​សៅរ៍ អង្គការ​ណា​តូ​ក៏​បាន​រើ​បុគ្គលិក​ខ្លួន​ចេញពី​ទីក្រុង​គៀវ​ទៅ​កាន់​ទីក្រុង​អេ លី​វីវរបស់អ៊ុយក្រែនជាប់ប៉ូឡូញ​(Lviv)​និង​ព្រុច​សែ​ល​(Brussels)​សំរាប់​ហេតុផល​សុវត្ថិភាព​។​

​សូម​រំលឹក​ថា ពួក​ឧទ្ទាម​គាំទ្រ​ដោយ​រុស្ស៊ី​បាន​ចាប់​យក​ទឹកដី​មួយ​ចំណិត​នៅ​អ៊ុយ​ក្រែន​ខាងកើត ហើយ​រុស្ស៊ី​បាន​ចាប់យក​និង​ដាក់​ជា​ឧបសម្ពន្ធ​តំបន់​គ្រី​មេ​របស់​អ៊ុយ​ក្រែន​នៅ​ឆ្នាំ​២០១៤​ក្រោយ​មាន​ការប្រ​​ឆាំង​តវ៉ា​និង​ទម្លាក់​មេដឹកនាំ​អ៊ុយ​ក្រែន​ដែល​គាំទ្រ​រុស្ស៊ី​។​អ៊ុយ​ក្រែន​បាន​អះអាង​ថា មនុស្ស​ជាង​១៤.០០០​នាក់​បាន​ស្លាប់​ក្នុង​ជម្លោះ​បំបែក​ទឹកដី​នេះ​ចាប់​តាំងពី​ពេលនោះ​៕

​ពួក​មេដឹកនាំ​ផ្តាច់ខ្លួន​នៅ​អ៊ុយ​ក្រែន​ខាងកើត​បានប្រកាសច​ល័ត​ទ័ព​ទូទៅ​និង​បញ្ជា​ជម្លៀស​អោយ​ក្មេង​និង​ស្ត្រី​ទៅកាន់​រុស្ស៊ី​។​បណ្តា​ទីភ្នាក់ងារសារព័ត៌មាន​រុស្ស៊ី​បាន​និយាយថា គិត​ត្រឹម​ថ្ងៃ​សៅរ៍​មនុស្ស​ជាង​១០.០០០​នាក់​បាន​មក​ដល់​រុស្ស៊ី​នៅ​ពេល​ពួក​មេដឹកនាំ​ផ្តាច់ខ្លួន​និយាយថា ពួកគេ​នឹង​ជម្លៀស​មនុស្ស​៧០០.០០០​នាក់​