​ប្រែ​សម្រួល : កញ្ញា​ដា​លី​ស (​ដេល្លីម៉េល​) ៖ សត្វ​កណ្តូប​ចិញ្ចឹម​មួយ​ក្បាល​បាន​ធ្វើឱ្យ​ម្ចាស់​របស់​វា​ភ្ញាក់ផ្អើល​យ៉ាងខ្លាំង នៅពេល​វា​សក ហើយ​បង្ហាញខ្លួន​វា​ជា​កណ្តូប​ឈ្មោល​ពាក់កណ្តាល​និង​កណ្តូប​ញី​ពាក់កណ្តាល​។​

​យោង​តាម​អ្នកជំនាញ​នៅ​សារមន្ទីរ​ប្រវត្តិសាស្ត្រ​ធម្មជាតិ កណ្តូប​ឈ្មោះ​ឆា​លី (Charlie) គឺជា​ប្រភេទ​សត្វល្អិត​មាន​ភេទ​ពីរ​លើក​ដំបូង​បង្អស់​ក្នុង​ប្រភេទ​សត្វ​បែបនេះ​។​

​ពួកគេ​បាន​និយាយថា កណ្តូ​ប ដែល​សក​នៅផ្ទះ​របស់​ម្ចាស់​វា​នៅ​ទីក្រុង​ស៊ូ​ហ្វ​ហ្វូក (Suffolk) របស់​អង់គ្លេស​ដើម្បី​បង្ហាញ​រាងកាយ​ពណ៌​បៃតង​ភ្លឺ​ជា​សត្វ​ញី និង​ស្លាប​ពណ៌​ត្នោត​ជា​សត្វ​ឈ្មោល គឺជា “​សត្វ​ដ៏​គួរឱ្យ​ចាប់អារម្មណ៍​បំផុត​”​។​

​ម្ចាស់​វា​ឈ្មោះ ឡូរិន ហ្គា​ហ្វៀល (Lauren Garfield) ឥឡូវ​នេះ​បាន​បរិច្ចាគ​ឆា​លី​ទៅ​សារមន្ទីរ​ទីក្រុង​ឡុង​ដ៍​សម្រាប់​ការស្រាវជ្រាវ​វិទ្យាសាស្ត្រ​។​

​ទោះយ៉ាងណា ម្ចាស់​វា​បាន​និយាយថា ជា​អកុសល សត្វល្អិត​នេះ​នឹង​ត្រូវ​សម្លាប់ចោល​ទើប​អាច​សិក្សា​បាន​នៅពេល​អនាគត ព្រោះ​ប្រសិនបើ​វា​ងាប់​តាម​ធម្មជាតិ វា “​នឹង​រួញ​ហើយ​បាត់បង់​ពណ៌​”​។​

​លោកស្រី​ហ្គា​ហ្វៀល​បាន​និយាយថា ដើមឡើយ​ឆា​លី​មើលទៅ​ដូចជា​សត្វល្អិត​ផ្សេងទៀត​ដែល​លោកស្រី​រក្សាទុក​និង​បង្កាត់​ពូជ​នៅ​ផ្ទះ​របស់​លោកស្រី​ក្នុង​សង្កាត់​វ៉ាល់ឌ្រី​ង​ហ្វៀល (Waldringfield)​។​

​ប៉ុន្តែ​នៅពេល​ដែល​វា​សក មនុស្ស​ចាប់ផ្តើម​ចាប់អារម្មណ៍ ដូច្នេះ​ហើយ​លោក​ស្រី​ក៏​ចែករំលែក “​ដំណឹង​ដ៏​ចម្លែក​” អំពី​សត្វ​កណ្តូប​នេះ​នៅលើ​ហ្វេ​សប៊ុក​។​

​លោកស្រី​បាន​សរសេរថា “​ខ្ញុំ​បាន​បង្កាត់​ពូជ​សត្វ​កណ្តូប​ពីរ​បី​ឆ្នាំ​ហើយ ហើយ​ចៃដន្យ​បាន​បង្កាត់​ពូជ​កណ្តូប​បៃតង​មាន​ភេទ​ពីរ​។ នោះ​មានន័យថា​ពាក់កណ្តាល​ជា​ញី (​ផ្នែក​ពណ៌​បៃតង​) និង​ពាក់កណ្តាល​ជា​ឈ្មោល (​ផ្នែក​ពណ៌​ត្នោត​លើ​ស្លាប​)”​។​

​កណ្តូប​ឈ្មោល​ជា​ធម្មតា​មាន​រាងកាយ​ប្រវែង​ចន្លោះ​ពី ៩ សង់ទីម៉ែត្រ ទៅ ១៣ សង់ទីម៉ែត្រ ខណៈ​កណ្តូប​ញី​មាន​រាងកាយ​ប្រវែង​ចន្លោះ​ពី ១៤ សង់ទីម៉ែត្រ​ទៅ ១៨ សង់ទីម៉ែត្រ​៕

កណ្តូប​ឈ្មោះ​ឆា​លី​មាន​ភេទ​ញី​ផង​ឈ្មោល​ផង យ៉ាង​ចម្លែក