​ប្រែ​សម្រួលៈ​បំណង (BLOOMBERG)៖ នាយករដ្ឋមន្ត្រី​អូស្ត្រាលី លោក​ស្កត់ ម៉ូ​រី​សុន​(Scott Morrison)​បាន​ហៅ​ការដែល​នាវា​កងទ័ពជើងទឹក​ចិន​តម្រង់​កាំរស្មី​ឡា​ហ្សែ​រ​(laser)​ដាក់​យន្តហោះ​ស៊ើប​​ការណ៍​មួយ​របស់​អូស្ត្រាលី​នៅ​ឯនាយ​ឆ្នេរ​ខាងជើង​នោះ​ថា​ជា​«​អំពី​បំភិតបំភ័យ​»​មួយ​។​

​ឧបទ្ទវហេតុ​នេះ​បាន​កើតឡើង​កាល​ពី​បី​ថ្ងៃមុន​នៅពេល​យន្តហោះ​ល្បាត ភី​-​អេច​អេ ផូសា​យ​ដិ​ន​(P-8A Poseidon)​ចាប់​បាន​កម្ម​រស្មី​ឡា​ហ្សែ​រ​ចេញពី​នាវាចម្បាំង​ចិន​មួយ​ដែល​បើក​កាត់​សមុទ្រ​អា​រ៉ា​ហ្វូ​រ៉ា​(Arafura) នេះ​បើ​តាម​ក្រសួង​ការពារជាតិ​អូស្ត្រាលី​បាន​និយាយ​នៅក្នុង​សេចក្តីថ្លែងការណ៍​មួយ​កាលពី​ថ្ងៃ​សៅរ៍​ទី​១៩​កុម្ភៈ​។​

​លោក​ម៉ូ​រី​សុន បាន​ឆ្លើយតប​កាលពី​ថ្ងៃអាទិត្យ​ក្នុង​ការបញ្ចេញមតិ​ក្នុង​ទូរទស្សន៍​នៅ​ក្រុង​មែ​ល​ប៊​ន​។​

​លោក​បាន​និយាយថា « ខ្ញុំ​មាន​ការព្រួយបារម្ភ​ជាខ្លាំង​អំពី​អំពើ​ប្រើ​ឡា​ហ្សែ​រ​។​ខ្ញុំ​មិន​អាច​មើលឃើញ​វិធី​ណា​ផ្សេង​ក្រៅពី​ចាត់ទុក​វា​ជា​អំពើ​បំភិតបំភ័យ បង្ករឿង មិន​ត្រឹមត្រូវ​មួយ ហើយ​អូស្ត្រាលី​គ្មាន​ពេល​​នឹង​ទទួល​អំពើ​បំភិតបំភ័យ​ដូច្នេះ​ឡើយ​»​។​

​សូមបញ្ជាក់​ថា ទំនាក់ទំនង​រវាង​អូស្ត្រាលី​និង​ចិន​កាន់តែ​ធ្លាក់​ចុះ​ដុនដាប​នៅ​ប៉ុន្មាន​ឆ្នាំ​ថ្មីៗ​នេះ ដោយសារ​បញ្ហា​ចាប់ពី​ការវិនិយោគ កូវី​ដ​១៩ បក្ខ​សម្ពន្ធ​យោធា​រហូតដល់​ការជ្រៀតជ្រែក​របស់​បរ​ទេស​​ក្នុង​នយោបាយ​ក្នុងស្រុក​។​វា​បាន​ដាំ​ក្បាល​ចុះ​ខ្លាំង​នៅ​ពេល​លោក​ម៉ូ​រី​សុន អំពាវនាវ​អោយ​មាន​ការស៊ើបអង្កេត​មួយ​លើ​ប្រភព​ដើម​នៃ​ជំងឺ​កូវី​ដ​១៩ ដែល​ធ្វើអោយ​ចិន​ខឹងក្រេវក្រោធ​ខ្លាំង​។​ជា​ការឆ្លើយតប ​ចិន​បាន​ចាត់វិធានការ​ពាណិជ្ជកម្ម​បែប​ដាក់ពិន័​យ​ដោយ​ផ្តោត​លើ​ទំនិញ​អូស្ត្រាលី​ចាប់ពី​ធ្យូង​ថ្ម ស្រូវ​សាឡី បង្កង​និង​ស្រា​៕

​លោក​ម៉ូ​រី​សុន​បាន​និយាយថា​លោក​នឹង​លើក​បញ្ហា​ឡា​ហ្សែ​រ​នេះ​ទៅ​និយាយ​ជាមួយ​ចិន​ដោយ​ផ្ទាល់​តាមរយៈ​បណ្តាញ​ការទូត​និង​យោធា​

​ក្រសួង​ការពារជាតិ​អូស្ត្រាលី​បាន​និយាយថា នាវា​កងទ័ពជើងទឹក​ចិន​ដែល​បាន​ប្រើ​ឡា​ហ្ស៊ែ​រ​នេះ អមដំណើរ​នាវា​ចិន​មួយ​ទៀត​និង​បាន​បើក​ឆ្លងកាត់​ចក្រ​សមុទ្រថ័​រ​រេស​ស្ត្រេត​(Torres Strait)​នៅ​​ទឹកដី​ខាងជើង​របស់​អូស្ត្រាលី​កាលពី​ថ្ងៃ​១៨​កុម្ភៈ​