​ដោយ​: បាយ័ន​/​សៀមរាប​: ក្រុមការងារ​ចម្រុះ​ចុះ​រឹតបន្តឹង​ច្បាប់​ចរាចរណ៍​ផ្លូវគោក និង​ត្រួតពិនិត្យ​យានយន្ត​កែច្នៃ​ខុស​លក្ខណៈ​បច្ចេកទេស នៃ​មន្ទីរ​សាធារណការ និង​ដឹកជញ្ជូន​ខេត្ត សហការ​ជាមួយ​នគរបាល​ចរាចរណ៍ សមត្ថកិច្ច​ប្រឆាំង​បទ​ល្មើ​ស​គ្រឿងញៀន នៃ​ស្នងការ​នគរបាល​ខេត្ដ​សៀមរាប កម្លាំង​កងរាជអាវុធហត្ថ​(​អ​.​ហ​) និង​មន្ត្រី​ជំនាញ​មូលដ្ឋាន ដឹកនាំ​ដោយ លោក ពិន ប្រាកដ អភិបាលរង​ខេត្ត សៀមរាប និង​មានការ​ចូលរួម​ពី​លោក ជួត ច័ន្ទ​តារា អនុប្រធាន​មន្ទីរ​សាធារណការ​និង​ដឹកជញ្ជូន​ខេត្តសៀមរាប​ទទួលបន្ទុក​ការអនុវត្ត​ការងារ​ជាប្រចាំ​តាម​ដងផ្លូវ​ជាតិ​លេខ​៦ នៅ​ភូមិ​រលួស​លិច ឃុំ​រលួស ស្រុក​ប្រាសាទបាគង ខេត្តសៀមរាប​។ នេះ​បើតាម​ការ​ផ្យា​យ​របស់​សាលាខេត្ត​សៀមរាប​នៅថ្ងៃនេះ​។​

​ក្រុមការងារ​ចម្រុះ​ចុះ​រឹតបន្តឹង​ច្បាប់​ចរាចរណ៍​ផ្លូវគោក និង​ត្រួតពិនិត្យ​យានយន្ត​កែច្នៃ​ខុស​លក្ខណៈ​បច្ចេកទេស​បាន​ត្រួតពិនិត្យ​យានយន្ត​សរុប​ចំនួន ៧២​គ្រឿង យានយន្ត​ត្រឹមត្រូវ​ចំនួន ៦៥​គ្រឿង យានយន្ត​ខុស​លក្ខណៈ​បច្ចេកទេស​ចំនួន ០៧​គ្រឿង ដោយបាន​ដោះ​រាន​ត​ក្រោយ​រថយន្ត​ចំនួន ០១​គ្រឿង ដោះ​ភ្លើង​បំពាក់​រថយន្ត​ខុស​លក្ខណៈ​បច្ចេកទេស​ចំនួន ០១​គ្រឿង ពិន័យ​ម្ចាស់​រថយន្ត​មិន​យក​ឯកសារ​មក​ចំនួន ០១​នាក់ (០១​គ្រឿង​) បាន​ពិន័យ​ម្ចាស់​រថយន្ត​ទៅលើ​ឈៀក​ផុត​សុពលភាព​ចំនួន ០១​នាក់​(០១​គ្រឿង​) បាន​ពិន័យ​ម្ចាស់​រថយន្ត​ទៅលើ​អាជីវកម្ម​ផុត​សុពលភាព​ចំនួន ០១​នាក់​(០១​គ្រឿង​) និង​បាន​ពិន័យ​អ្នកបើកបរ​រថយន្ត​មិន​ពាក់​ខ្សែក្រវ៉ាត់​សុវត្ថិភាព​ចំនួន ០១​នាក់​(០១​គ្រឿង​) ត្រួតពិនិត្យ​រក​សារធាតុ​ញៀន​សរុប ចំនួន ១៦​នាក់ មាន​សារធាតុ​ញៀន​ក្នុង​ខ្លួន​ចំនួន ០១​នាក់​(​អ្នកបើកបរ ០១​នាក់ )​។

​ជាមួយគ្នា​នោះដែរ ក្រុមការងារ​ក៏បាន​ចែក​ខិត្តប័ណ្ណ​អប់រំ​ផ្សព្វផ្សាយ មានដូចជា សៀវភៅ​អ្វីដែល​អ្នកបើកបរ​ម៉ូតូ​ត្រូវ​យល់ដឹង ៣០​ក្បាល ឯកសារ​ជំនួយស្មារតី​អ្នកបើកបរ ៣០​សន្លឹក និង​សៀវភៅ​ច្បាប់​ចរាចរណ៍​ផ្លូវគោក ៣០​ក្បាល​៕​