​ប្រែ​សម្រួលៈ​បំណង​(ST,​ដេល្លី​ម៉េល​)៖ មហា​ក្សត្រិយានី អេ​លីហ្សា​បេ​តទី​ពីរ របស់​អង់គ្លេស​បាន​កើតកូ​វីដ​១៩ នេះ​បើ​តាម​ការប្រកាស​របស់​ព្រះបរមរាជវាំង​បាក់​ឃី​ង​ហែម​។​

​ព្រះមហាក្សត្រ ព្រះជន្ម ៩៥ វស្សា បាន​តេស្តិ៍​វិជ្ជមាន​កូវី​ដ​១៩​និង​ចេញ​រោគសញ្ញា​កំរិត​ស្រាល​ដូច​ផ្តាសាយ តែ​រំពឹងថា​នឹង​អនុវត្ត​ភារកិច្ច​ស្រាលៗ​នៅ​សប្តាហ៍​ខាងមុខ​។​

​ប្រមុខរដ្ឋ​រូបនេះ​បាន​ធ្លាក់ខ្លួន​ប្រឈួន​ក្រោយ​ព្រះ​អង្គ​បាន​ប៉ះពាល់​បុត្រ​ច្បង​និង​ជា​អ្នក​ស្នងរាជ្យ​ដោយ​ផ្ទាល់​គឺ​ព្រះអង្គម្ចាស់​ឆាល នៅ​សប្តាហ៍​ដែល​ទ្រង់មាន​ជំងឺ​នេះ​។​

​ការប្រកាស​ដ៏​ភ្ញាក់ផ្អើល​នេះ​ត្រូវបាន​ធ្វើឡើង​នៅ​ពីរ​សប្តាហ៍​បន្ទាប់ពី​ព្រះមហាក្សត្រ​គ្រងរាជ្យ​យូរ​បំផុត​លើ​លោក​អង្គ​នេះ​បាន​ឈាន​ចូល​ខួប​គ្រងរាជ្យសម្បត្តិ​អស់​៧០​ឆ្នាំ​កាល​ពី​ថ្ងៃ​៦​កុម្ភៈ​។​

​ព្រះបរមរាជវាំង​បាក់​ឃី​ង​ហែម​(Buckingham)​បាន​និយាយ​ក្នុង​សេចក្តីថ្លែងការណ៍​មួយ​ថា «​វិមាន​បាក់​ឃី​ង​ហែម​សូម​អះអាងថា មហាក្សត្រិយានី​នៅថ្ងៃនេះ​ត្រូវបាន​តេស្តិ៍​ឃើញកូ​វីដ​១៩​។​ព្រះករុណា​មាន​​អារម្មណ៍​ដូច​ផ្តាសាយ​ស្រាល​តែ​រំពឹងថា​នឹង​បន្ត​រាជកិច្ច​តូចតាច​នៅ​វិមាន​វីន​ស័រ​(Windsor)​នៅ​សប្តាហ៍​ខាងមុខ​។​ព្រះអង្គ​ទ្រង់​នឹង​បន្ត​ទទួល​ការព្យាបាល​វេជ្ជសាស្ត្រ​ហើយនឹង​អនុវត្ត​មាន​ការណែនាំ​សម​​ស្រប​ទាំងអស់​»​។​

​ការព្រួយបារម្ភ​ខ្លាំង​មុខ​ជា​កើត​មាន​ពេញ​មួយ​ប្រទេស​ដោយសារ​មហាក្សត្រិយ​មាន​ព្រះជន្ម​ច្រើន​និង​មាន​បញ្ហា​សុខភាព​នៅ​ប៉ុន្មាន​ខែ​មកនេះ ។​

​ប្រធាន​ក្រុម​គ្រូពេទ្យ​ប្រចាំ​ព្រះបរមរាជវាំង​បាន​និយាយថា រាជវង្ស​មាន​ក្រុមគ្រូពេទ្យ​ផ្ទាល់​របស់​ខ្លួន ហើយ​ពួក​វេជ្ជបណ្ឌិត​របស់​ម​ហា​ក្សត្រិយ​នឹង​មើលថែ​តាមដាន​ព្រះរាជសុខភាព​របស់​ទ្រង់​។​

​សូមបញ្ជាក់​ថា មហា​ក្សត្រិយានី អេ​លីហ្សា​បេ​ត ដែល​បាន​ចាក់​វ៉ាក់សាំង​កូវី​ដ​១៩​ចំនួន​បី​ដង បាន​ជួប​ព្រះអង្គម្ចាស់​ឆាល​កាលពី​ថ្ងៃ​អង្គារ​ទី​៨​កុម្ភៈ​និង​ប៉ុន្មាន​ថ្ងៃ​ក្រោយមក​ព្រះអង្គម្ចាស់​រជ្ជទាយាទ​​បាន​តេស្តិ៍​ឃើញកូ​វីដ​១៩ តែ​បាន​ជាសះស្បើយ​ពី​ជំងឺ​នេះ​យ៉ាង​លឿន​។​មហេសី​របស់​ព្រះអង្គម្ចាស់​ឆាល​ក៏​កើតកូ​វីដ​និង​រហូតមកទ​ល់​ថ្ងៃ​១៤​កុម្ភៈ​នៅ​ដាក់ខ្លួន​ដាច់ដោយឡែក​ពី​គេ​នៅឡើយ​។​

​វា​ជា​លើក​ទី​២​ដែល​អនាគត​ស្តេច​អង់គ្លេស​រូបនេះ​បាន​ឆ្លងកូវី​ដ ដោយ​កាលពី​ខែ​មីនា​ឆ្នាំ​២០២០​ព្រះ​អង្គ​បាន​ឆ្លង​វា​ម្តង​៕

​មហា​ក្សត្រិយានី ដែល​ស្វាមី​របស់​ទ្រង់​បាន​សោយ​ទិវង្គត​កាលពី​១០​ខែ​មុន បាន​ចំណាយពេល​ភាគច្រើន​ក្នុងអំឡុង​ផ្ទុះ​កូវី​ដ​ពីរ​ឆ្នាំ​មកនេះ​នៅក្នុង​វិមាន​វីន​ស័រ​។​ព្រះ​អង្គ​ជា​មហាក្សត្រ​អង់គ្លេស​ទី​១​ដែល​​គ្រងរាជ្យ​ដល់​៧០​ឆ្នាំ​