​ប្រែ​សម្រួល : កញ្ញា​ដា​លី​ស (​ដេល្លីម៉េល​) ៖ ប្រធានាធិបតី​អាម៉េរិក​លោក ចូ បៃ​ដិន មាន​ឆន្ទៈ​ជួប​ជាមួយ​លោក វ្ល៉ា​ឌី​មៀ ពូ​ទីន របស់​រុស្ស៊ី “​ពេល​ណា​ក៏​បាន​ដែរ​” ដើម្បី​ទប់ស្កាត់​សង្គ្រាម​នៅក្នុង​ប្រទេស​អ៊ុ​យក្រែន នេះ​បើ​យោង​តាម​អ្នកការទូត​កំពូល​របស់​គាត់​ដែល​និយាយ​កាលពី​ថ្ងៃអាទិត្យ​ទី​២០​កុម្ភៈ​ថា ប្រទេស​រុស្ស៊ី​ហាក់​កំពុង​ជិត​បើក​ការឈ្លានពាន​អ្នកជិតខាង​របស់​ខ្លួន​ហើយ​។​

​នៅក្នុង​កម្មវិធី​ជជែក​ដ៏​ក្តៅគគុក រដ្ឋមន្ត្រីការបរទេស​លោក អ៊ែន​ថូ​នី ប្លីង​កិន បាន​ប្រាប់​ទូរទស្សន៍ CNN ថា “​អ្វី​គ្រប់​យ៉ាង​ដែល​យើង​កំពុង​ឃើញ​បង្ហាញ​ថា​នេះ​គឺជា​ស្ថានភាព​ដ៏​ធ្ងន់ធ្ងរ​ដែល​យើង​កំពុង​​ជិត​ឃើញ​ការឈ្លានពាន​”​។​

​សកម្មភាព​យោធា​ដ៏​គឃ្លើន​បានចាប់ផ្តើម​រួចហើយ​នៅក្នុង​និង​ជុំវិញ​អ៊ុយ​ក្រែន​ដែល​កំពុង​ប្រឈម​នឹង​ការបាញ់​ផ្លោង​កាន់តែខ្លាំង​ពី​ក្រុម​ឧទ្ទាម​បំបែក​ខ្លួន​គាំទ្រ​ដោយ​រុស្ស៊ី​និង​កងកម្លាំង​នៃ​អ្វី​ដែល​លោក​​ប្លីង​កិន​និង​រដ្ឋធានី​នានា​របស់​លោក​ខាងលិច​និយាយថា​ជា​ទាហាន​រុស្ស៊ី​ជាង ១៥០.០០០ នាក់​នៅ​តាម​ព្រំដែន​របស់​ខ្លួន​។​

​លោក​ប្លីង​កិន​បាន​និយាយថា “​ប៉ុន្តែ​រហូត​ដល់​ពេលរ​ថ​ក្រោះ​រំកិល​ចូល​និង​យន្តហោះ​ចាប់ផ្តើម​ហោះចូល​យើង​នឹង​ប្រើ​គ្រប់​ឱកាស​និង​គ្រប់​នាទី​ដែល​យើង​មាន​ដើម្បី​មើល​ថា​តើ​ការទូត​នៅ​តែ​អាច​រារាំង​​ប្រធានាធិបតី​ពូ​ទីន​ពី​ការ​រុលទៅមុខ​ដែរ​ឬ​អត់​”​។​

​លោក​បាន​ប្រាប់​កម្មវិធី Face the Nation​របស់​ទូរទស្សន៍ CBS ថា លោកបៃ​ដិនបាន​បញ្ជាក់​យ៉ាង​ច្បាស់​ថា​លោក​ត្រៀម​ខ្លួន​ជួប​ជាមួយ​ប្រធានាធិបតី​ពូ​ទីន​គ្រប់​ពេល​ក្នុង​ទម្រង់​ណាមួយ​ក៏បាន ប្រសិនបើ​នោះ​អាច​ជួយ​ទប់ស្កាត់​សង្គ្រាម​។​

​យោង​តាម​សេត​វិមាន មេដឹកនាំ​ទាំង​ពីរ​បាន​និយាយ​គ្នា​ចុង​ក្រោយ​តាម​ទូរស័ព្ទ​កាលពី​ថ្ងៃទី ១២ ខែ​កុម្ភៈ​។​

​នៅ​អ៊ុ​យក្រែន ការបាញ់​ផ្លោង​បន្ថែម​ទៀត​ត្រូវបាន​ស្តាប់​ឮ​ដោយ​អ្នកយក​ព័ត៌មាន​របស់ AFP ពេញ​មួយ​យប់​នៅ​ជិត​ខ្សែត្រៀម​ជួរ​មុខ​រវាង​កងកម្លាំង​រដ្ឋាភិបាល និង​ក្រុម​ឧទ្ទាម​គាំទ្រ​ដោយ​ទីក្រុង​មូ​ស្គូ ដែល​កាន់កាប់​ផ្នែក​ខ្លះ​នៃ​ស្រុក​លូ​ហ្គានស៍ (Lugansk)​និង​ដូណិត​ស៍ (Donetsk)​។​

​រដ្ឋាភិបាល​ក្រុង​មីនស៍ (Minsk)​បាន​ប្រកាស​កាលពី​ថ្ងៃអាទិត្យ​ថា នៅ​ប្រទេស​បេឡា​រូស ដែល​មាន​ព្រំប្រទល់​ជាប់​ទាំង​រុស្ស៊ី​និង​អ៊ុ​យក្រែន សមយុទ្ធ​យោធា​រុស្ស៊ី​កំពុង​បន្ត​។​

​លោក​ប្លីង​កិន​បាន​និយាយថា នោះ​គ្រាន់តែ​ជា​សញ្ញា​មួយ​ក្នុងចំណោម​សញ្ញា​មួយចំនួន​ដែល​ថា​ទីក្រុង​មូ​ស្គូ​កំពុង​ត្រៀម​ខ្លួន​សម្រាប់​ការ​លុកលុយ​ប៉ុណ្ណោះ ដោយ​លោក​ពូ​ទីន​”​ធ្វើតាម​ស្គ្រីប​ស្ទើរតែ​​ទាំងអស់​ហើយ​”​។​

​លោក​ប្លីង​កិន​បាន​និយាយថា “​វា​ប្រាប់​យើង​ថា សៀវភៅ​ល្បិចកល់​ដែល​យើង​បាន​ដាក់ចេញ​, ខ្ញុំ​បាន​ដាក់​ទៅ​ក្រុមប្រឹក្សា​សន្តិសុខ​អង្គការសហប្រជាជាតិ​កាលពី​សប្តាហ៍​មុន​អំពី​ប្រទេស​រុស្ស៊ី​ព្យាយាម​បង្កើត​​ការ​ញុះញង់​ជា​បន្តបន្ទាប់​ដើម្បី​ជា​លេស​សម្រាប់​ការឈ្លានពាន​ប្រឆាំងនឹង​អ៊ុ​យក្រែន កំពុង​ដំណើរការ​ទៅមុខ​ហើយ​”៕

​រដ្ឋមន្ត្រីការបរទេស​អាម៉េរិក​លោក​អាន​ថូ​នី ប្លីង​កិន​