​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ មន្ត្រី​កំពង់ផែ​បាន​និយាយថា អ្នក​ពន្លត់​អគ្គិភ័យ​កំពុង​ព្យាយាម​ពន្លត់ភ្លើង​ដែល​បាន​ឆាបឆេះ​កាលពី​ថ្ងៃ​ពុធ​ទី​១៦​កុម្ភៈ​នៅ​លើ​នាវា​ដឹក​រថយន្ត​ទំនើប​​ៗ​រាប់ពាន់​គ្រឿង ដែល​រសាត់​ចេញពី​ឆ្នេរសមុទ្រ​នៃ​កោះ​អា​ហ្សូ​រ៉េស (Azores) របស់​ព័រ​ទុយ​ហ្គាល់ ដោយ​បន្ថែម​ថា​គេ​នៅ​មិន​ទាន់​ច្បាស់​ទេ​ថា​ពេល​ណា​ទើប​អាច​ពន្លត់ភ្លើង​បាន​ជោគជ័យ​។

​នាវា Felicity Ace ដែល​ផ្ទុក​រថយន្ត​ប្រណីត​ប្រហែល ៤.០០០ គ្រឿង រួម​ទាំង​រថយន្ត Porsch, Audi និង Bentley ដោយ​រថយន្ត​អគ្គិសនី​មួយ​ចំនួន​បាន​បំពាក់​ជាមួយ​អាគុយ​លី​ចូ​មនោះ បាន​ឆាបឆេះ​នៅ​កណ្តាល​មហាសមុទ្រ​អា​ត្លង់​ទិក​កាលពី​ថ្ងៃ​ពុធ​។​

​សមាជិក​នាវិក ២២ នាក់​នៅ​លើ​នាវា​ត្រូវបាន​ជម្លៀសចេញ​នៅ​ថ្ងៃ​ដដែល​។​

​លោក ចា​វ មេនដេស កាបេ​កាស (João Mendes Cabeças)​ជា​ប្រធាន​កំពង់ផែ​ជិត​បំផុត​នៅ​ទីក្រុង​ហ្វៃ​អាល់ (Faial) នៃ​កោះ​អា​ហ្សូ​រ៉េ​សបាន​ប្រាប់​ទីភ្នាក់ងារ​សារព័ត៌មាន​រ៉​យ​ទ័រ​កាលពី​ល្ងាច​​ថ្ងៃ​សៅ​រ៍ថា “​អន្តរាគមន៍​ដើម្បី​ពន្លត់ភ្លើង​ត្រូវបាន​ធ្វើឡើង​សន្សឹមៗ​។ វា​នឹង​ចំណាយ​ពេល​យូរ​បន្តិច​”​។​

​លោក​កាបេ​កាសបា​ននិយាយថា អាគុយ​លី​ចូម​-​អ៊ីយ៉ុង​នៅក្នុង​រថយន្ត​អគ្គិសនី​នៅ​លើ​នាវា​កំពុង “​រក្សា​ភ្លើង​ឱ្យ​នៅ​បន្ត​ឆាបឆេះ​” ដោយ​បន្ថែម​ថា ឧបករណ៍​ជំនាញ​ដើម្បី​ពន្លត់​វា​កំពុង​ធ្វើដំណើរ​មក​ហើយ​។​

​គេ​មិន​ទាន់​ដឹង​ច្បាស់​ទេ​ថា​តើ​អាគុយ​បាន​បង្កឱ្យមាន​ភ្លើង​ឆាបឆេះ​ឬ​យ៉ាងណា​នោះ​៕

​នាវា Felicity Ace នៅ​បន្ត​ឆេះ​មិន​ទាន់​រលត់​ទេ