ដោយៈ​តារា​រិ​ទ្ធ​/​ភ្នំពេញៈ​សម្តេច​អគ្គមហាសេនាបតី​តេ​ជោ​ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា និង​ជា​អនុប្រធាន​កិត្តិយស​នៃ​ក្រុមប្រឹក្សា​ជាតិ​កម្ពុជា​ដើម្បី​ស្ត្រី​នៅ​ព្រឹក​ថ្ងៃទី​២១​ខែកុម្ភៈ​នេះ​បាន​អញ្ជើញ​ចូលរួម​ជា​អធិបតីភាព​ដ៏​ខ្ពង់ខ្ពស់ ក្នុង​កិច្ចប្រជុំ​បូកសរុប​លទ្ធផល​ការងារ​ឆ្នាំ​២០២២ របស់​ក្រុមប្រឹក្សា​ជាតិ​កម្ពុជា​ដើម្បី​ស្ត្រី នៅ​វិមាន​សន្តិភាព

​ក្នុងឱកាស​នេះ​សម្តេច​តេ​ជោ​ហ៊ុនសែន​បាន​ថ្លែង​នូវ​ការកោតសរសើរ​និង​វាយតម្លៃ​ខ្ពស់​ចំពោះ​ការខិតខំ​ប្រឹងប្រែង​រប​ស់​ក្រុមប្រឹក្សា​ជាតិ​កម្ពុជា​ដើម្បី​ស្ត្រី​ដែល​បានរួម​ចំណែក​យ៉ាងសកម្ម​ក្នុងការ​កសាង​និង​អភិវឌ្ឍ​សង្គមជាតិ​។​សម្តេច​តេ​ជោ​បាន​បញ្ជាក់ថា បច្ចុប្បន្ន ស្ត្រី​បាន​ចូលរួមចំណែក​ក្នុង​កិច្ចការងារ​ជាច្រើន​ក្នុង​វិស័យ​ផ្សេងៗ ដូចជា​វិស័យ​សុខាភិបាល វិស័យ​សេវាកម្ម ដូចជា ធនាគា សណ្ឋាគារ ភោ​ជនី​ដ្ឋា​ន និង​គ្រូបង្រៀន រួមទាំង​វិស័យ​យោធា​ផងដែរ​។​

​នៅក្នុង​កិច្ចប្រជុំ​នេះ លោកស្រី ជូ ប៊ុន​អេង តំណាង​លោកស្រី អ៊ឹង កន្ថាផាវី រដ្ឋមន្ត្រីក្រសួង​កិច្ចការនារី និង​ជា​ប្រធាន​ក្រុមប្រឹក្សា​ជាតិ​កម្ពុជា​ដើម្បី​ស្ត្រី បាន​ថ្លែងថា «​ការអភិវឌ្ឍ​សមត្ថភាព​ស្តី​ជា​ថ្នាក់ដឹកនាំ​នៅ​ថ្នាក់ជាតិ និង​ថ្នាក់ក្រោម​ជាតិ​ការអភិវឌ្ឍ​សមត្ថភាព​ដល់​ស្ត្រី​ជា​ថ្នាក់ដឹកនាំ និង​មន្ត្រីរាជការ​ជានា​រី នៅ​ថ្នាក់ជាតិ ត្រូវបាន​យកចិត្តទុកដាក់​ខ្ពស់​ដោយ​ថ្នាក់ដឹកនាំ​ស្ថាប័ន ។ ពី​ឆ្នាំ​២០២០-២០២១ ស្ត្រី​ចំនួន​២២៣៥ នាក់ នៃ​ចំនួន​អ្នកចូលរួម​សរុប​៣៨៧១​នាក់ បាន​ចូលរួម​សិក្ខាសាលា វគ្គ​បណ្តុះបណ្តាល និង​ជំនាញ​នានា​ទាំង​ក្នុងប្រទេស និង​ក្រៅប្រទេស​»​។​នៅ​រដ្ឋបាល​ថ្នាក់ក្រោម​ជាតិ ក្រសួង​កិច្ចការនារី បានរៀបចំ​កម្មវិធី​អភិវឌ្ឍន៍​សមត្ថភាព​ម​ន្ត្រី​កិច្ចការនារី​ក្នុងការ​អនុវត្ត​ការងារ ការស្វែងរក​ការគាំទ្រ​មតិ ការបញ្ជ្រាប​យេនឌ័រ និង​បរិ​យាប​ន្ន សីលធម៌​សង្គម និង​ភាពជា​អ្នកដឹកនាំ និង​ដាក់បញ្ចូល​ទៅក្នុង​កម្មវិធី​វិនិយោគ​ឃុំ សង្កាត់ និង​សមាហរណកម្ម​ផែនការ​ឃុំ សង្កាត់ ថ្នាក់ ក្រុង ស្រុក ខណ្ឌ​។ ក្រសួង​បាន​បើក​វគ្គ​តាម​ប្រព័ន្ធ​អន​ឡាញ ដើម្បី​ពង្រឹង​តួនាទី​ស្ត្រី​ក្នុង​ភាពជា​អ្នកដឹកនាំ និង​ភារកិច្ច​របស់​គណៈកម្មាធិកា​រ​ពិគ្រោះ​យោបល់​កិច្ចការ​ស្ត្រី និង​កុមារ អ្នកចូលរួម ១ ១២៣ នាក់​(​ស្ត្រី​៨៤០​នាក់​)»​។

​លោកស្រី ជូ ប៊ុន​អេង បន្តថា នៅ ឆ្នាំ​២០២២ នេះ ក្រុមប្រឹក្សា​ជាតិ​កម្ពុជា​ដើម្បី​ស្ត្រី បាន​សម្របសម្រួល​រៀបចំ​របាយការណ៍​វឌ្ឍនភាព​ឆ្នាំ​២០២០-២០២១ និង​ផែនការ​សកម្មភាព​ការងារ​ឆ្នាំ​២០២២ ដោយមាន​ការចូលរួម​ផ្តល់​ធាតុ​ចូល​របាយការណ៍​ពី​ក្រសួង ស្ថាប័ន អាជ្ញា​ធរមាន​សមត្ថកិច្ច​គ្រប់លំដាប់​ថ្នាក់ និង​ការផ្តល់​យោបល់​ពី​ក្រុមការងារ​បច្ចេកទេស​យេនឌ័រ ព្រមទាំង​ការឯកភាព​ពី​សមាជិក សមាជិកា នៃ​ក្រុមប្រឹក្សា​ជាតិ​កម្ពុជា​ដើម្បី​ស្ត្រី ៕​សរន​