​ដោយៈ​សាត​ចាន់​បុត្រ​/​មណ្ឌលគិរីៈ​ មន្ត្រី​ជំនាញ​និង​អាជ្ញាធរ​ក្រុង​សែន​មនោ​រម្យ​ដំឡើង​ជញ្ជីង​យុត្តិធម៌​នៅក្នុង​ផ្សារ​ក្រុង​សែន​មនោ​រម្យ​ចំនួន​ពីរ​ទីតាំង ប្រយោជន៍​ទុកឱ្យ​សាធារណជន​ប្រើប្រាស់​សម្រាប់​ថ្លឹង​ទំនិញ​នានា​ដើម្បី​បញ្ជាក់​ពី​ភា​ព្រឹម​ត្រូវ​នៃ​ភ្នែក ជញ្ជីង​របស​អ្នកលក់​ដែល​ខ្លួន​បាន​ទិញ​ពី​អាជីវករ​ក្នុង​ផ្សារ​។ ខណៈ​រកឃើញថា មិន​ត្រឹមត្រូវ​អ្នកទិញ​អាច​នឹងធ្វើ​តវ៉ា​បាន​។​

​លោក សុខ ប៊ុនធឿន អនុប្រធាន​មន្ទីរ ឧស្សាហកម្ម វិ​ទ្យ​សាស្ត្រ បច្ចេកទេស និង​នវានុវត្តន៍​ខេត្តមណ្ឌលគិរី នៅ​ព្រឹក​ថ្ងៃទី ២១ ខែកុម្ភៈ ឆ្នាំ ២០២២ បាន​ឲ្យ​ដឹងថា មន្ត្រី​ជំនាញ​សហការ​ជាមួយ​អាជ្ញាធរ មូលដ្ឋាន និង​គណៈកម្មការ​ផ្សារ សែន​មនោ​រម្យ ដើម្បី​ដំឡើង​ជញ្ជីង​យុត្តិធម៌​ដែលមាន​សុក្រឹតភាព​ច្បាស់លាស់​ចំនួន​ពីរ​ទីតាំង ប្រយោជន៍ ដល់​បងប្អូន​ប្រជាពលរដ្ឋ​ដែល​ទិញ​ទំនិញ​ត្រី​សាច់ បន្លែ ផ្លែឈើ នៅក្នុង​ផ្សារ​នេះ អាច​ប្រើប្រាស់ ក្នុងការ​ថ្លឹង​ផ្ទៀងផ្ទាត់​គីឡូ​ជាមួយនឹង​ភ្នែកជញ្ជីង​របស់​អ្នកលក់​ដើម្បី​ជៀសវាង​ការខាតបង់​នានា​។​

​លោក​បាន​បន្តថា​មន្ទីរជំនាញ​មិន​ត្រឹមតែ​មានការ​ដំឡើង​ជញ្ជីង​យុត្តិធម៌​នេះ​ក្នុង​ផ្សារ​សែន​មនោ​រម្យ​ទេ​គឺ​នៅ​គ្រប់​បណ្ដា​ស្រុក​ផ្សេងទៀត​ក៏មាន​ការដំឡើង​ជញ្ជីង​នេះ ដើម្បី​ឆ្លើយតប​ទៅនឹង​ការប្រើប្រាស់​និង​ភាពត្រឹមត្រូវ ក្នុងការ​ជួញដូរ​ទំនិញ​នានា ។​

​លោក​អនុប្រធាន​មន្ទីរ​ក៏បាន​សំណូមពរ​ដល់ អាជីវករ​ទាំងអស់ សូម​យក​ជញ្ជីង ដែល​ប្រើ​សម្រាប់​ថ្លឹង​ទំនិញ​ត្រី​សាច់ បន្លែ ផ្លែឈើ នានា ទៅ​មន្ទីរ​រៀងរាល់​ម៉ោង​ធ្វើការ​ដើម្បី​ត្រួតពិនិត្យ បច្ចេកទេស​និង​លក្ខណៈ​ត្រឹមត្រូវ​ឲ្យ​បានច្បាស់លាស់ ដើម្បី​ទំនុកចិត្ត​ដល់​អតិថិជន​របស់ខ្លួន​។​

​លោក ឃុន អូន អភិបាលរងក្រុង​មនោ​រម្យ បាន​ថ្លែងអំណរគុណ​ដល់​មន្ទីរ​ឧស្សាហកម្ម ដែល​បាន​យកចិត្តទុកដាក់ បំពាក់​ជញ្ជីង​យុត្តិធម៌ ក្នុង​ផ្សារ​ក្រុង​សែន​មនោ​រម្យ ដែលជា​ផ្សារ​ធំ​របស់​ខេត្ត​។ លោក​ថា នេះ​គឺជា រឿង​ដ៏​ល្អ​មួយ​សម្រាប់ អ្នកលក់​និង​អ្នកទិញ អាច​ទទួលយកបាន របៀប​ត្រឹមត្រូវ​រៀន​ខ្លួន​។

​លោក​អភិបាលរងក្រុង​ក៏បាន​សំណូមពរ​ដល់​ប្រជាពលរដ្ឋ​ទាំងអស់​ត្រូវ​ចូល​តែ​ប្រកាន់យក​ភាព​ទៀងត្រង់​និង​យុត្តិធម៌​នេះ ឲ្យ​បានល្អ ។ ក៏​សូម​ថែរក្សា​ជញ្ជីង​នេះ​ឱ្យបាន​ល្អ ដើម្បី​ប្រើប្រាស់​បានយូរ​អង្វែង ដើម្បី​ជា​ប្រយោជន៍​រួម​ទាំងអស់គ្នា​។

​ស្ត្រី​មេផ្ទះ​ពីររូប​បាន​យក​ទំនិញ​ដែល​ខ្លួន​ទិញ ទៅ​ថ្លឹង​នៅ​ជញ្ជីង​យុត្តិធម៌ លើកឡើង​ដូចគ្នា​ថា គាត់​សប្បាយចិត្ត នៅពេលដែល​ជញ្ជីង​នេះ ត្រូវបាន​មន្ត្រី​ជំនាញ​ដំឡើង​នៅក្នុង​ផ្សារ​។ មាន​ជញ្ជីង​នេះ​គាត់​អាច យក​ទំនិញ ដែល​ទិញ ទៅ​ថ្លឹង​ផ្ទៀងផ្ទាត់​ជាមួយនឹង​ជញ្ជីង​របស់​អ្នកលក់ ថា​តើ​គ្រប់​គីឡូ​ដែរ​ឬ​អត់ ?​ដូច្នេះ​ធ្វើ​ឲ្យ​ពួកគាត់ មានការ​ចំណេញ មិន​ខាតបង់​ថវិកា ឬ​ចាញ់បោក​គេ​៕​សរន​/PC