​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ សេដ្ឋកិច្ច​ថៃ​បាន​ត្រឡប់​ទៅរក​កំណើន​វិញ​ក្នុង​ត្រីមាស​ទី​បួន​ឆ្នាំ​២០២១ ដោយ​ស្ទុះ​ងើប​ឡើងវិញ​លឿន​ជាង​ការរំពឹងទុក​ដោយ​សារ​ការនាំ​ចេញ​ដ៏​រឹងមាំ​និង​ការ​ស្ទុះ​​ងើប​ឡើងវិញ​នៃ​សកម្មភាព​ក្នុងស្រុក​បន្ទាប់ពី​ការបន្ធូរបន្ថយ​ការទប់ស្កាត់​មេរោគ​កូរ៉ូណា និង​នៅពេល​ដែល​ព្រំដែន​បាន​បើក​ឡើង​វិញ​សម្រាប់​ភ្ញៀវ​បរទេស​។​

​រដ្ឋាភិបាល​បាន​រក្សា​នូវ​ទស្សនវិស័យ​កំណើន​សេដ្ឋកិច្ច​របស់​ខ្លួន​ក្នុង​រង្វង់​ពី ៣,៥​ភាគរយ​ទៅ ៤,៥​ភាគរយ ដោយសារ​តែ​ផលប៉ះពាល់​មាន​តិចតួច​ពី​ការ​ផ្ទុះឡើង​នៃ​មេរោគ​អូ​មី​ក្រុង​តម្រូវការ​ក្នុងស្រុក​កាន់​​តែ​ស្ទុះ​ខ្លាំង ការ​ស្ទុះ​ងើប​ឡើងវិញ​នៃ​វិស័យ​ទេសចរណ៍ និង​ការគាំទ្រ​ជា​បន្ត​ពី​ការនាំចេញ​និង​ការ​វិនិយោគសាធារណៈ​។​

​នៅ​ឆ្នាំ ២០២១ សេដ្ឋកិច្ច​ថៃ​បាន​កើនឡើង ១,៦ ភាគរយ ដែល​ជា​សេដ្ឋកិច្ច​យឺត​បំផុត​មួយ​នៅក្នុង​តំបន់​អាស៊ីអាគ្នេយ៍ បន្ទាប់ពី​បាន​ធ្លាក់ចុះ ៦,១ ភាគរយ​ក្នុង​ឆ្នាំ ២០២០​។​

​ទិន្នន័យ​ពី​ក្រុមប្រឹក្សា​អភិវឌ្ឍន៍​សេដ្ឋកិច្ច​និង​សង្គមជាតិ (NESDC)​បានបង្ហាញ​ថា សេដ្ឋកិច្ច​ធំ​ទី​ពីរ​របស់​អាស៊ីអាគ្នេយ៍​បាន​កើនឡើង ១,៨ ភាគរយ​នៅក្នុង​ត្រីមាស​ខែធ្នូ​ធៀប​នឹង​បី​ខែ​មុន​នោះ​ដោយ​លើស​​ការ​ព្យាករណ៍​អំពី​កំណើន ១,៤ ភាគរយ​នៅក្នុង​ការស្ទង់មតិ​របស់​ទីភ្នាក់ងារ​សារព័ត៌មាន​រ៉យ​ទ័​រ និង​បន្ទាប់​ពី​ព្យាករណ៍​ឃើញ​ការធ្លាក់ចុះ ០,៩ ភាគរយ​នៅក្នុង​ត្រីមាស​ទី​បី​។​

​លោក ដា​នូ​ចា ពី​ចៃ​យ៉ាណា​ន (Danucha Pichayanan) ប្រធាន NESDC បាន​ប្រាប់​សន្និសីទ​សារព័ត៌មាន​មួយ​ថា សេដ្ឋកិច្ច​ទំនងជា​ដំណើរការ​ល្អ​នៅក្នុង​ត្រីមាស​ទី​មួយ​នៃ​ឆ្នាំ​២០២២​ដោយ​ផ្អែក​​លើ​សូចនាករ​នានា​រហូតមក​ទល់​ពេល​នេះ ប៉ុន្តែ​មាន​សម្ពាធ​អតិផរណា​ខ្លះ​។​

​លោក​បាន​បន្តថា “​កត្តា​ជំរុញ​សំខាន់​គឺ​ការនាំចេញ​និង​ការបញ្ចេញ​មូលនិធិ​សារពើពន្ធ ដោយ​មាន​វិស័យ​ទេសចរណ៍​និង​ការប្រើប្រាស់​ក្នុងស្រុក​ជួយ​គាំទ្រ​បន្ថែម​”​។​

​ធៀប​នឹង​ឆ្នាំ​២០២០ ផលិតផល​ក្នុងស្រុក​សរុប (GDP)​បាន​កើនឡើង ១,៩ ភាគរយ​ក្នុង​ខែតុលា​ដល់​ខែ​ធ្នូ ដោយ​ផ្តួល​ការ​ព្យាករណ៍​អំពី​កំណើន​ត្រឹម ០,៧​ភាគរយ​និង​បញ្ច្រាស់​ការ​ទស្សន៍ទាយ​អំពី​ការធ្លាក់ចុះ​​សេដ្ឋកិច្ច ០,២ ភាគរយ​ក្នុង​រយៈពេល​បី​ខែ​មុន​នោះ​។​

​ការនាំចេញ ដែល​ជា​កត្តា​ជំរុញ​ដ៏​សំខាន់​នៃ​កំណើន​របស់​ថៃ បាន​កើនឡើង ២១,៣ ភាគរយ​នៅក្នុង​ត្រីមាស​ខែធ្នូ ធៀប​នឹង​ឆ្នាំមុន ខណៈ​ដែល​ការប្រើប្រាស់​ឯកជន​បាន​កើនឡើង ០,៣ ភាគរយ​។ មាន​ភ្ញៀវទេសចរ​បរទេស​ប្រហែល ៣៤០.០០០ នាក់​នៅក្នុង​ត្រីមាស​ទី​បួន ឆ្នាំ ២០២១ គឺ​កើនឡើង​ពី ៤៥.០០០ នាក់​នៅក្នុង​រយៈពេល​បី​ខែ​មុន​នោះ​។​

​ថៃ​បាន​បន្ត​អនុវត្ត​ឡើង​វិញ​នូវ​ការលើកលែង​ចត្តា​ឡីស័​ក​សម្រាប់​ភ្ញៀវទេសចរ​បរទេស​ក្នុង​ខែ​នេះ​ដើម្បី​ជួយ​ស្តារ​វិស័យ​ទេសចរណ៍​ដ៏​សំខាន់​របស់​ខ្លួន ដែល​ជា​ធម្មតា​មាន​ចំណែក​ប្រហែល ១២ ភាគរយ​នៃ GDP ថៃ​។​

​ទីភ្នាក់ងារ​ផែនការ​រដ្ឋ​រំពឹងថា​នឹង​មាន​ភ្ញៀវទេសចរ​ចំនួន ៥,៥ លាន​នាក់​នៅ​ឆ្នាំ ២០២២ ដោយ​កើនឡើង​លើស​ពី​ការព្យាករណ៍​ចំនួន ៥ លាន​នាក់​កាលពី​ខែ​វិច្ឆិកា​។ ប៉ុន្តែ​វា​នៅតែមាន​ភ្ញៀវទេសចរ​បរទេស​តិច​ជាង ៤០ លាន​នាក់​ក្នុង​ឆ្នាំ ២០១៩ ដែល​នេះ​បង្ហាញ​ថា​ការ​ស្ទុះ​ងើប​នៃ​សេដ្ឋកិច្ច​នឹង​មាន​ភាពយឺត​យ៉ាវ​និង​មិន​ស្មើគ្នា​។​

​ទីភ្នាក់ងារ​នេះ​បាន​រក្សា​ការ​ព្យាករណ៍​កំណើន​ការនាំចេញ​របស់​ខ្លួន​នៅ​អត្រា ៤,៩ ភាគរយ​នៅ​ឆ្នាំនេះ​។​

​រដ្ឋាភិបាល​បាន​ដាក់ចេញ​នូវ​វិធានការ​សង្គ្រោះ​រាប់​ពាន់​លាន​ដុល្លារ​ដើម្បី​ស្តារ​សេដ្ឋកិច្ច​ឡើងវិញ ខណៈ​ដែល​ធនាគារ​កណ្តាល​បាន​រក្សា​អត្រា​ការប្រាក់​សំខាន់​របស់​ខ្លួន​មិន​ឱ្យ​ផ្លាស់ប្តូរ​ក្នុង​កម្រិត​ទាប​បំផុត ០,៥០ ភាគរយ​ចាប់តាំងពី​ខែ​ឧសភា ឆ្នាំ ២០២០៕

សកម្មភាព​សេដ្ឋកិច្ច​ថៃ​ចាប់ផ្តើម​រស់​រវើក​ឡើង​វិញ​ក្រោយ​ការបន្ធូរបន្ថយ​ការទប់ស្កាត់​កូវី​ដ