ប្រែ​សម្រួល : កញ្ញា​ដា​លី​ស (​ដេល្លីម៉េល​) ៖ សហរដ្ឋ​អាម៉េរិក​បាន​ក្រើនរំលឹក​ដល់​អង្គការ​សហប្រជាជាតិ​ថា ខ្លួន​មាន​ព័ត៌មាន​ថា រុស្ស៊ី​មាន​បញ្ជី​ជនជាតិ​អ៊ុ​យក្រែន “​ត្រូវ​សម្លាប់ ឬ​បញ្ជូន​ទៅ​ជំរំ​”​នៅក្នុង​ព្រឹត្តិ​​ការណ៍​នៃ​ការ​លុកលុយ នេះ​បើ​យោងតាម​លិខិត​ដែល​ផ្ញើ​ទៅ​ប្រធាន​សិទ្ធិមនុស្ស​របស់​អ​.​ស​.​ប និង​ទទួលបាន​ដោយ​ទីភ្នាក់ងារ​សារព័ត៌មាន AFP​កាលពី​ថ្ងៃអាទិត្យ​ទី​២០​កុម្ភៈ​។​

​សំបុត្រ ដែល​បាន​កើតឡើង​ខណៈ​ក្រុង​វ៉ាស៊ីនតោន​ព្រមាន​អំពី​ការឈ្លានពាន​ជិត​មក​ដល់​ដោយ​ទាហាន​រុស្ស៊ី​ដែល​ប្រមូលផ្តុំ​នៅ​ជិត​ព្រំដែន​អ៊ុ​យក្រែន បាន​និយាយថា សហរដ្ឋ​អាម៉េរិក​”​មានការ​ព្រួយ​​បារម្ភ​យ៉ាងខ្លាំង​” និង​ព្រមាន​អំពី “​មហន្តរាយ​សិទ្ធិមនុស្ស​” ដែល​អាច​កើតមាន​។​

​លិខិត​នោះ​បាន​និយាយថា សហរដ្ឋ​អាម៉េរិក​មាន “​ព័ត៌មាន​គួរឱ្យ​ទុកចិត្ត ដែល​បង្ហាញ​ថា​កងកម្លាំង​រុស្ស៊ី​កំពុង​បង្កើត​បញ្ជី​ឈ្មោះ​ជនជាតិ​អ៊ុយ​ក្រែន​ដែល​ត្រូវបាន​កំណត់​អត្តសញ្ញា​ណ​ត្រូវ​សម្លាប់​ឬ​បញ្ជូន​​ទៅកាន់​ជំរំ​បន្ទាប់​ពី​ការកាន់កាប់​ដោយ​យោធា​”​។​

​សារ ដែល​ផ្ញើ​ទៅកាន់​ឧត្តម​ស្នងការអ​.​ស​.​ប​ទទួលបន្ទុក​សិទ្ធិមនុស្ស​លោកស្រី មី​សែ​ល បា​ឆេ​ឡេ (Michelle Bachelet)​បាន​និយាយថា “​យើង​ក៏​មាន​ព័ត៌មាន​គួរឱ្យ​ជឿជាក់​ផងដែរ​ថា​កងកម្លាំង​​រុស្ស៊ី​ទំនងជា​នឹង​ប្រើ​វិធានការ​ដ៍​សាហាវ​ដើម្បី​បំបែក​ការតវ៉ា​ដោយ​សន្តិវិធី​ឬ​បើ​មិន​ដូច្នេះ​ទេ វាយប្រហារ​លើ​ការជំទាស់​ដោយ​សន្តិវិធី​ពី​ប្រជាជន​ស៊ីវិល​”​។​

​លិខិត ដែល​ចុះហត្ថលេខា​ដោយ​លោកស្រី បា​សេ​បា នែ​ល ក្រុក​ឃើ (Bathsheba Nell Crocker) ជា​ឯកអគ្គរដ្ឋទូត​អាម៉េរិក​ប្រចាំ​អ​.​ស​.​ប​នៅ​ទីក្រុង​ហ្សឺ​ណែ​វ បាន​ព្រមាន​ថា​ការឈ្លានពាន​របស់​​រុស្ស៊ី​លើ​អ៊ុយ​ក្រែន​អាច​នាំមក​នូវ​ការរំ​លោភ​បំពាន​ដូច​ជា​ការ​ចាប់ពង្រត់​ឬ​ការ​ធ្វើ​ទារុណកម្ម ហើយ​អាច​កំណត់​គោលដៅ​អ្នកនយោបាយ​ជំទាស់​និង​អ្នក​កាន់​សាសនា​នានា ព្រមទាំង​ជនជាតិភាគតិច​។​

​សហរដ្ឋ​អាម៉េរិក​និង​សម្ពន្ធមិត្ត​លោក​ខាងលិច​បាន​ប៉ាន់ស្មាន​ថា រុស្ស៊ី​បាន​ដាក់ពង្រាយ​ទាហាន​ជាង ១៥ ម៉ឺន​នាក់​នៅ​ជិត​ព្រំដែន​អ៊ុយ​ក្រែន​ក្នុងរយៈពេល​ប៉ុន្មាន​សប្តាហ៍​ថ្មីៗ​នេះ​។​

​ទីក្រុង​មូ​ស្គូ​បាន​បដិសេធថា​ខ្លួន​មិន​មាន​គម្រោង​វាយប្រហារ​ប្រទេស​ជិតខាង​របស់​ខ្លួន​ទេ ប៉ុន្តែ​កំពុង​ស្វែងរក​ការធានា​ថា អ៊ុយ​ក្រែន​នឹង​មិន​អនុញ្ញាត​ឱ្យ​ចូល​រួម​ជាមួយ​អង្គការ​ណា​តូ​ហើយ​ឱ្យ​សម្ពន្ធ​មិត្ត​​លោកខាងលិច​ដក​កង​កម្លាំង​ចេញ​ពី​អឺរ៉ុប​ខាងកើត ជា​ការទាមទារ​មួយ​ត្រូវបាន​លោក​ខាងលិច​បដិសេធ​៕

​ទាហាន​អ៊ុយ​ក្រែន​ដើរល្បាត​នៅ​ភូមិ​មួយ​នៅ​ជិត​តំបន់​ដូណិត​ស៍​