ដោយៈ ប​.​ជ័យ -បាយ័ន / បន្ទាយ​មាន​ជ័​យៈ នៅតាម​ស្រុក​មួយ​ចំ​នួ​ក្នុង​ខេត្តបន្ទាយមានជ័យ និងសៀមរាប មាន​ភ្លៀង​លាយឡំ​ជាមួយ ខ្យល់​កន្ត្រាក់ បង្ក​ឱ្យ​ខូចខាត​ផ្ទះ សាលារៀន និង​មាន​រន្ទះបាញ់ បុរស​ម្នាក់ ឱ្យ​របួសធ្ងន់​។

​ជាក់ស្ដែង ភ្លៀង​មួយ​មេ​ធំ លាយឡំ​ជាមួយ​ខ្យល់​កន្ត្រាក់ នា​វេលា​ម៉ោង ៥:៣០ ដល់​ម៉ោង ៦:៣០ នាទី ល្ងាច ថ្ងៃទី​៧ ខែមីនា ឆ្នាំ​២០២២ បាន​បង្ក​ឱ្យ​ខូចខាត​ផ្ទះ សាលារៀន មួយចំនួន នៅ​ឃុំ​សំរោង ស្រុក​អូរជ្រៅ​។​

​មន្ត្រីនគរបាល បានអោយដឹងថាៈ ករណីនេះ បាន​បង្ក​ឱ្យ​ខូចខាត​ផ្ទះ សាលារៀន និង​សំណង់ មួយចំនួន ប៉ុន្តែ​មិនទាន់មាន​របាយការណ៍ ពី​មនុស្ស​រងគ្រោះ​នៅឡើយ ដោយនៅ​ព្រលប់​នេះ ភ្លៀង​មិនទាន់​រាំង​។​

​ដោយឡែក នៅវេលា​ម៉ោង ៦ ល្ងាច ថ្ងៃទី​៧ មីនា​នេះដែរ រន្ទះ​បាន​បាញ់​ឱ្យ​បុរស​ម្នាក់ រងរបួស​ធ្ងន់ នៅពេល​គាត់ បាន​កំពុង​ដេញគោ ទៅ​ឃ្វាល នៅ​ចំណុច​ខ្លា​គ្រ​ហ៊ឹម ស្ថិតក្នុង​ភូមិ​ស្ពាន​ក្មេង ឃុំ​ភ្នំ​ដី ស្រុក​ភ្នំស្រុក ។

​មន្ត្រីនគរបាល នៃ​អធិការដ្ឋាន​នគរបាល ស្រុក​ភ្នំស្រុក បាន​ឲ្យ​ដឹងថាៈ បុរសរងគ្រោះ ឈ្មោះ ស្ងៀម សួ​ប អាយុ ៦២ ឆ្នាំ រស់នៅ​ភូមិ​ត្រពាំង​ប្រិ​យ៍ ឃុំ​ភ្នំ​ដី ស្រុក​ភ្នំស្រុក ខេត្ត​បន្ទាយ​មាន ជ័យ​។ ជនរងគ្រោះ ស្ថិតនៅក្នុង​ការសង្គ្រោះ នៅ​មន្ទីរពេទ្យបង្អែក ភ្នំស្រុក​។​

​ចំណែក​នៅ​ភូមិ​ក្បាល​ក្របី ឃុំ​បន្ទាយឆ្មារ ស្រុក​ថ្មពួក កាលពី​យប់ ថ្ងៃទី​៦ មីនា កន្លងទៅនេះ ភ្លៀង​កក់ខែ លាយឡំ​ខ្យល់​កន្ត្រាក់ បង្ក​ខូចខាត​ផ្ទះ ប្រាំមួយ​ខ្នង​។ នេះ​បើតាម​លោក ហេង សុភ​ក្តិ មេឃុំ​បន្ទាយឆ្មារ បានអោយដឹង កាលពី​ថ្ងៃទី​៧ ខែមីនា ឆ្នាំ​២០២២ នេះ​។ នៅ​យប់នោះ និង​នៅ​ព្រឹក ថ្ងៃទី​៧ ខែមីនា កងកម្លាំង​នគរបាល កងទ័ព កងរាជអាវុធហត្ថ និង​មន្ត្រី​អាជ្ញាធរ បាន​ទៅពិនិត្យ និង​ជួយ​ជួសជុលផ្ទះ​របស់​ប្រជាពលរដ្ឋ ឡើងវិញ ។​

​ជាមួយគ្នា​នោះដែរ លោក អ៊ុំ រាត្រី អភិបាលខេត្ត​បន្ទាយមានជ័យ និង​មន្ត្រី ក៏បាន​ចុះ​ពិនិត្យមើល កងកម្លាំង​ដែល​ជួយ​ធ្វើ​ផ្ទះ ជូន​ប្រជាពលរដ្ឋ​រងគ្រោះ ដោយសារ​ខ្យល់​កន្ត្រាក់ នៅ​ភូមិ​ក្បាល​ក្របី ឃុំ​បន្ទាយឆ្មារ ស្រុក​ថ្មពួក នោះ ដោយបាន​ផ្តល់​ស័ង្កសី ជា​អំណោយ​ដ៍​ថ្លៃថ្លា​របស់លោក​បណ្ឌិត ហ៊ុន ម៉ា​ណែ​ត និង​លោកស្រី ជូន​គ្រួសារ​រងគ្រោះ ទាំង​ប្រាំមួយ​គ្រួសារ ហើយ​លោក​ផ្ទាល់ បានផ្តល់​ថវិកា សម្រាប់​គ្រឿងសំណង់ និង​ថ្លៃ​អាហារ​កងកម្លាំង​។

ដោយសារតែភ្លៀង និងខ្យល់កន្រ្តាក់ នាល្ងាចថ្ងៃទី៧ ខែមីនា នេះដែរ ផ្ទះមួយចំនួន ត្រូវបានបាក់រលំ និងកុមារម្នាក់ អាយុ ៣ ឆ្មាំ បានស្លាប់ ដោយសារផ្ទះរលំសង្កត់ពីលើ និងរបួសមួយចំនួនទៀត ព្រមទាំងដើមឈើ រាប់សិបដើម ត្រូវបានដួលរលំ​នៅភូមិខ្នារក្រៅ ឃុំកន្ទួត ស្រុកស្វាយលើ ខេត្តសៀមរាប៕/V​