ប្រែ​សម្រួលៈ​បំណង​(​ដេល្លី​ម៉េល​)៖​ក្រសួង​ការពារជាតិ​អាម៉េរិក​បាន​និយាយ​កាលពី​ថ្ងៃ​ចន្ទ​ថា​រុស្ស៊ី​កំពុង​ជ្រើសរើស​បណ្តុះបណ្តាល​ជន​ស៊ី​រី​និង​យុទ្ធជន​បរទេស​ផ្សេងៗ​ដើម្បី​បញ្ជូន​ទៅ​ប្រយុទ្ធ​នៅ​អ៊ុ​យក្រែន​​នៅពេល​រុស្ស៊ី​ប្រើ​កម្លាំង​ឈរជើង​តាម​ព្រំដែន​ជិត​អស់ហើយ​។​

​សូម​រំលឹក​ថា រុស្ស៊ី​បាន​ហក់​ចូល​ធ្វើ​សង្គ្រាម​នៅ​ស៊ី​រី​នៅ​ឆ្នាំ​២០១៥​ដើម្បី​គាំទ្រ​របប​របស់​ប្រធានាធិបតី បាស​សា អាល់​-​អា​សាដ​(Bashar al-Assad)​ហើយ​ប្រទេស​នេះ​បាន​ផុង​ក្នុង​ជម្លោះ​មួយ​ដែល​កត់​សំ​​គាល់​ដោយ​ការប្រយុទ្ធ​តាម​ទីក្រុង​ទីប្រជុំជន​អស់​ពេល​ជាង​មួយ​ទសវត្សរ៍​។​

​ឥឡូវ​មន្ត្រី​ក្រសួង​ការពារជាតិ​អាម៉េរិក​បាន​និយាយថា ប្រធានាធិបតី​រុស្ស៊ី​លោក​វ្ល៉ា​ឌី​មៀ ពូ​ទីន កំពុង​បង្កើត​បេសកកម្ម​ជ្រើសរើស​យុទ្ធជន​ស៊ី​រី​សំរាប់​សង្គ្រាម​នៅ​អ៊ុ​យក្រែន​។​

​យោង​តាម​កាសែត​ដឹ វ៉​ល​ស្ទ្រីត ច​រណល​(the Wall Street Journal)​មន្ត្រី​អាម៉េរិក​បាន​និយាយថា រុស្ស៊ី​នៅ​ប៉ុន្មាន​ថ្ងៃ​ចុងក្រោយ​នេះ​បាន​ជ្រើសរើស​អ្នក​ប្រយុទ្ធ​មក​ពី​ស៊ី​រី ដោយ​សង្ឃឹម​ពួកគេ​​អាច​ជួយ​វាយ​ដណ្តើម​យក​ទីក្រុង​គៀវ​និង​ទីក្រុង​ដទៃទៀត​។​

​មន្ត្រី​ម្នាក់​បាន​ប្រាប់​កាសែត​ថា យុទ្ធជន​ខ្លះ​បាន​ទៅ​ដល់​រុស្ស៊ី​សំរាប់​ការប្រយុទ្ធ​នៅ​អ៊ុ​យក្រែន ទោះជា​យ៉ាងណា​វា​មិន​ច្បាស់​ថា​តើ​យុទ្ធជន​ប្រភេទ​នេះ​ប៉ុន្មាន​នាក់​ត្រូវបាន​ជ្រើសរើស​។​

​អ្នកនាំពាក្យ​ក្រសួង​ការពារជាតិ​អាម៉េរិក​លោក ច​ន កឺ​ប៊ី បាន​ប្រាប់​អ្នកយកព័ត៌មាន​ថា «​យើង​ពិតជា​ជឿថា រុស្ស៊ី​ស្វះស្វែង​រក​យុទ្ធជន​ស៊ី​រី​ដើម្បី​បន្ថែម​កម្លាំង​របស់​ខ្លួន​នៅ​អ៊ុ​យក្រែន​។​យើង​ជឿ​ថា​វា​ជា​ការ​​ពិត​»​។​

​ទោះជា​យ៉ាងណា អ្នកនាំពាក្យ​អង្គការសហប្រជាជាតិ​បាន​និយាយថា លោក​មិន​មាន​ភស្តុតាង​បង្ហាញថា​រុស្ស៊ី​កំពុង​ជ្រើសរើស​ទាហាន​ស៊ីឈ្នួល​ទេ​និង​ថា​ជម្លោះ​នេះ​វា​មិន​ចាំបាច់​មនុស្ស​មកពី​ក្រៅ​ច្រើនឡើង​​មក​ចូលរួម​ឡើយ​។​

​តាមពិត​ពួក​យុទ្ធជន​បរទេស​បាន​ចូល​ក្នុង​ជម្លោះ​អ៊ុយ​ក្រែន​សំរាប់​ភាគី​ទាំងសងខាង​រួចស្រេច​ទៅ​ហើយ​។​ជន​ខ្លាំង​ឆេច​ឈ្នី រ៉ា​មហ្សា​ន់ កា​ឌី​រ៉ូវ​(Ramzan Kadyrov)​អតីត​សម្ពន្ធមិត្ត​របស់​វិមាន​ក្រឹម​​ឡាំង​បាន​បង្ហោះ​វីដេអូ​ពួក​យុទ្ធជន​ឆេច​ឈ្នី​ចូលរួម​ប្រយុទ្ធ​លើ​អ៊ុយ​ក្រែ​ន​និង​បាន​និយាយថា យុទ្ធជន​របស់​លោក​ខ្លះ​ត្រូវបាន​សម្លាប់​នៅ​អ៊ុ​យក្រែន​។​

​រដ្ឋមន្ត្រីការបរទេស​អ៊ុយ​ក្រែនក៏​បាន​អះអាង​ថា អ្នកស្ម័គ្រចិត្ត​បរទេស​ប្រមាណ​២០.០០០​នាក់​បាន​ធ្វើដំណើរ​មក​កាន់​ប្រទេស​លោក​ដើម្បី​ប្រយុទ្ធ​ទល់​នឹង​ទាហាន​រុស្ស៊ី​។​

​ដោយ​អំពាវនាវ​អោយ​ភាគី​ក្នុង​ជម្លោះ​នេះ​ទាំងអស់​អត់ធ្មត់ ឯកអគ្គរដ្ឋទូត​ចិន​ប្រចាំ​អង្គការ​សហប្រជាជាតិ​កាលពី​ថ្ងៃ​ចន្ទ​បាន​និយាយថា​ស្ថានភាព​ដ៏​អាក្រក់​ស្រាប់​នេះ​អាច​កាន់តែ​អាក្រក់​ឡើង​ដោយសារ​​តែ​ការដឹកជញ្ជូន​សព្វាវុធ​ទៅអោយ​អ៊ុ​យក្រែន ព្រមទាំង​ការបញ្ជូន​ចូល​ទាហាន​ស៊ីឈ្នួល​៕

ក្រុមហ៊ុនរុស្ស៊ីក៏ធ្លាប់បញ្ជូនទាហានស៊ីឈ្នួលទៅកាន់ស៊ីរី