​ប្រែ​សម្រួលៈ​បំណង​(​វ៉េ​អិន​អិច​ស្ព្រេ​ស​)៖ ជនជាតិ​វៀតណាម​ជាង​៣.៥០០​នាក់​ត្រូវបាន​ជម្លៀស​ចេញពី​អ៊ុយ​ក្រែន​ចាប់តាំងពី​រុស្ស៊ី​បើក​ប្រតិបត្តិការ​សឹក​ចូល​ក្នុងប្រទេស​ក្បែរ​ខាង​ខ្លួន​កាលពី​ពីរ​សប្តាហ៍​មុន​។​

​គិត​មក​ត្រឹម​ម៉ោង​៦​ល្ងាចម្សិលមិញ ជនជាតិ​វៀតណាម​ប្រមាណ​២.២០០​នាក់​ត្រូវបាន​ជម្លៀស​ចេញពី​អ៊ុយ​ក្រែន​ទៅដល់​ប៉ូឡូញ​និង​៨៣០​នាក់​ទៀត​ទៅ​ដល់​រ៉ូ​ម៉ានី ៣១០​នាក់​ទៅ​ដល់​ហុងគ្រី ១០០​នាក់​ទៅ​ដល់​​ស្លូ​វេនី​និង​២០​នាក់​ទៅ​ដល់​រុស្ស៊ី នេះ​បើ​តាម​ក្រសួង​ការបរទេស​វៀតណាម​។​

​យន្តហោះ​មួយ​បាន​ចេញដំណើរ​ពី​ទីក្រុង​ហាណូយ​ឆ្ពោះទៅ​កាន់​ទីក្រុង​ប៊ុយ​ដា​ប៉េស ប្រទេស​រ៉ូ​ម៉ានី​កាលពី​ថ្ងៃ​ចន្ទ ដើម្បី​នាំ​ជនជាតិ​វៀតណាម​២៨៣​នាក់​មក​ស្រុក​វិញ​។​យន្តហោះ​នេះ​ត្រូវ​គេ​រំពឹងថា​នឹង​មកដល់​​ទីក្រុង​ហាណូយ​វិញ​នៅ​ថ្ងៃ​អង្គារ​ហើយ​យន្តហោះ​ទី​ពីរ​នឹង​ចេញដំណើរ​នៅ​ថ្ងៃ​ពុធ​ឆ្ពោះទៅ​កាន់​ទីក្រុង​វ៉ា​សូវី​របស់​ប៉ូឡូញ​ដើម្បី​ដឹក​ជនជាតិ​វៀតណាម​ប្រមាណ​២៧០​នាក់​។​

​មុន​ជម្លោះ​រវាង​រុស្ស៊ី​និង​អ៊ុយ​ក្រែន​ផ្ទុះឡើង ជនជាតិ​វៀតណាម​ប្រមាណ​៧.០០០​នាក់​រស់នៅ​អ៊ុ​យក្រែន ភាគច្រើន​នៅ​ទីក្រុង​គៀវ ក្រុង​ខា​គី​វ​(Kharkiv)​និង​អូ​ដេស​សា​(Odessa)៕

​ស្ថានទូត​និង​សហគមន៍​វៀតណាម​នៅ​ហុងគ្រី ជួយ​ជនជាតិ​វៀតណាម​ដែល​ជម្លៀស​មក​ពី​អ៊ុយ​ក្រែន​កាលពី​ថ្ងៃ​៥​មីនា​