​ដោយៈ បាយ័ន / សៀមរាបៈ ភ្លៀង​និង​ខ្យល់​កន្ត្រាក់ បាន​បង្ក​ឱ្យ​ខូចខាត​ផ្ទះ​របស់​ប្រជាពលរដ្ឋ នៅ​ភូមិ​ខ្នារ​ក្រៅ ឃុំ​កន្ទួត ស្រុក​ស្វាយ​លើ ចំនួន​១៤​ខ្នង ស្លាប់​ម្នាក់ និង​របួស​២​នាក់ កាលពី វេលា​ម៉ោង ៤​និង​៣០​នាទី រសៀល​ថ្ងៃទី​៧ ខែមីនា ឆ្នាំ​២០២២ ។ នេះ​បើតាម​ការបញ្ជាក់ ដោយ​លោក​វរសេនីយ៍ទោ ស៑ុន ថៃ អធិការរង​ស្រុក​ស្វាយ​លើ ទទួល​ការងារ​សន្តិសុខ នៅ​ព្រឹក​ថ្ងៃទី​៨ ខែមីនា នេះ​។​

​លោក​វរសេនីយ៍ទោ ស៑ុន ថៃ បាន​និយាយថាៈ នៅ​ព្រឹក​ថ្ងៃទី​៨ ខែមីនា ឆ្នាំ​២០២២ នេះដែរ នាយ​ឧ​ត្ត​ម​សេនីយ៍ ខេង សុមេធ អគ្គ​ស្នងការរង នគរបាលជាតិ និង​ជា​មេបញ្ជាការ នគរបាលជាតិ ប្រចាំ​ទិស​ភូមិភាគ​ទី​៤ និង​ទី​៥ បាន​ចាត់តាំង ឱ្យ​លោក​ឧ​ត្ត​ម​សេនីយ​ទោ ខេង រ៉ា មេបញ្ជាការរង នគរបាលជាតិ ប្រចាំ​ទិស​ភូមិភាគ​ទី​៤ នាំយក​នូវ​គ្រឿងឧបភោគ បរិភោគ និង​ថវិកា ទៅ​ប្រគល់ជូន​គ្រួសារ​សព​កុមារ​ម្នាក់ ដែល​ស្លាប់​ដោយសារ​ខ្យល់ព្យុះ រលំ​ផ្ទះ​សង្កត់​លើ កាលពី​រសៀល ថ្ងៃទី​៧ ខែមីនា នៅ​ភូមិ​ខ្នារ ឃុំ​កន្ទួត ស្រុក​ស្វាយ​លើ ខេត្តសៀមរាប និង​ចូលរួម​រំលែក​ទុក្ខ ។​

​លោក​វរសេនីយ៍ទោ ស៑ុន ថៃ បាន​និយាយ​បន្តថាៈ ថ្ងៃកើតហេតុ​នោះ បណ្ដាលឱ្យ​មនុស្ស រងរបួស ចំនួន ពីរ​នាក់ និង​កុមារា ស្លាប់​ចំនួន មួយ​នាក់​។ ជន​គ្រោះ រួមមាន ទី​១ ឈ្មោះ ភ​ន់ ភី ភេទ​ស្រី ឆ្នាំ​កំណើត ០៤.០៥.១៩៨៩ រងរបួស​បែកក្បាល ទី​២ ឈ្មោះ ថី ហ៊ីង ភេទ​ស្រី ឆ្នាំ​កំណើត ១៦.១០.១៩៩៧ រងរបួស​បែកក្បាល បែក​ភ្នែក​ឆ្វេង និង​ជើង​ស្តាំ និង​កុមារា​ម្នាក់ ដែល​បាន​ស្លាប់ មានឈ្មោះ ឡូយ សូរិយា ឆ្នាំ​កំណើត ១០.០៦.២០១៧ ។ អ្នក​ទាំងបី នៅ​ភូមិ​ឃុំ​កើតហេតុ ខាងលើ ។ ក្នុងនោះដែរ ក៏មាន​ដើមឈើ រាប់រយ​ដើម ត្រូវបាន​កាច់​បាក់ និង​រលើង​ឫស​៕/V​