​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ខ្សែប្រយុទ្ធ​អន្តរជាតិ​ប៉ូឡូញ រ៉ូបឺត ឡេ​វ៉ាន់ដូ​វស្គី (Robert Lewandowski)​របស់​ក្លិប Bayern Munich​បាន​កាត់​ផ្តាច់ទំនាក់ទំនង​ជាមួយ​ក្រុមហ៊ុន​ឧបត្ថម្ភ Huawei ចំ​ពេល​មាន​ការអះអាង​ថា ក្រុមហ៊ុន​បច្ចេកវិជ្ជា​យក្ស​របស់​ចិន​មួយ​នេះ​បាននិងកំពុង​ជួយ​រុស្ស៊ី​ក្នុង​ការការពារ​បណ្តាញ​របស់​ពួកគេ​ពី​ការវាយប្រហារ​តាម​អ៊ី​ន​ធឺ​ណេត​បន្ទាប់​ពី​ការលុកលុយ​លើ​​អ៊ុ​យក្រែន​។​

​ភ្នាក់ងារ​របស់​កីឡាករ​បាល់ទាត់​រូប​នេះ​គឺ​លោក ថូ​ម៉ាស ហ្សា​វី​ស្លាក់ (Tomasz Zawislak) បាន​និយាយ​នៅក្នុង​សេចក្តីថ្លែងការណ៍​មួយ​ទៅកាន់​ទីភ្នាក់ងារសារព័ត៌មាន​បារាំង ថា “​យើង​បាន​សម្រេច​​ចិត្ត​នៅ​ថ្ងៃនេះ​ដើម្បី​បញ្ចប់​កិច្ចសហប្រតិបត្តិការ​ទីផ្សារ​រវាង​រ៉ូបឺត ឡេ​វ៉ាន់ដូ​វស្គី​និង​ក្រុមហ៊ុន Huawei”​។​

​លោក​ហ្សា​វី​ស្លាក់ បាន​បន្ថែមថា “​ដូច្នេះ​ការអនុវត្ត​សេវាកម្ម​ផ្សព្វផ្សាយ​ទាំងអស់​ត្រូវបាន​ផ្អាក​នៅ​ខាង​ពួកយើង​”​។​

​យោងតាម​ប្រព័ន្ធ​ផ្សព្វផ្សាយ​ប៉ូឡូញ ការសម្រេចចិត្ត​នេះ​ត្រូវ​បាន​ផ្សារភ្ជាប់​ជាមួយនឹង​អត្ថបទ​មួយ​នៅក្នុង​កាសែត​ដេល្លី​ម៉េល របស់​អង់គ្លេស​ដែល​ចោទប្រកាន់​ក្រុមហ៊ុន Huawei​ថា​បាន​ជួយ​រុស្ស៊ី​ឱ្យ​​មាន​សុវត្ថិភាព​ផ្នែក​អ៊ី​ន​ធឺ​ណេត​របស់​ខ្លួន​ប្រឆាំង​នឹង​ការវាយប្រហារ​ដោយ​ពួក Hacker ដែល​គាំទ្រ​អ៊ុ​យក្រែន​។​

​ក្រុមហ៊ុន​ចិន​នេះ​បាន​បញ្ជាក់​ពី​ការបញ្ចប់​ភាព​ជា​ដៃគូ​របស់​ពួកគេ​ជា​មួយឡេ​វ៉ាន់ដូវ​ស្គីក្នុង​សេចក្តីថ្លែងការណ៍​ខ្លី​មួយ​។​

​ក្រុមហ៊ុន Huawei បាន​និយាយ​នៅក្នុង​អ៊ីមែល​ទៅកាន់​ទីភ្នាក់ងារ​សារព៍ត៌មាន​បារាំង ថា “​ក្រុមហ៊ុន Huawei CBG Poland សោកស្តាយ​ចំពោះ​ការបញ្ចប់​ភាពជា​ដៃគូ​ជាមួយ​រ៉ូបឺត ឡេ​វ៉ាន់ដូ​វស្គី​។ យើង​ដឹងគុណ​ចំពោះ​កិច្ច​សហប្រតិបត្តិការ​ជាច្រើន​ឆ្នាំ​របស់​យើង ហើយ​សូម​ជូនពរ​ឱ្យ​គាត់​ទទួលបាន​ជោគជ័យ​នាពេល​អនាគត​”​។​

​សាខា​ក្រុមហ៊ុន​ចិន​នៅ​ប៉ូឡូញ​បាន​ច្រានចោល​របាយការណ៍​របស់​កាសែត​នេះ​ថា​ជា “​ព័ត៌មាន​ក្លែងក្លាយ​” ។​

​ឡេ​វ៉ាន់ដូ​វស្គី​បាន​សម្តែង​ការគាំទ្ររ​បស់​គេ​សម្រាប់​ប្រជាជន​នៃ​ប្រទេសជិតខាង​អ៊ុយ​ក្រែន​បន្ទាប់​ពី​ការលុកលុយ​របស់​រុស្ស៊ី ដោយ​ពាក់​ស្លាក​ដៃ​ពណ៌​ទង់ជាតិ​អ៊ុ​យក្រែន​ក្នុងអំឡុងពេល​ប្រកួត​។​

​កីឡាករ​ឆ្នើម​ប្រចាំឆ្នាំ ២០២០ និង ២០២១ របស់ FIFA រូបនេះ​និយាយថា “​ពិភពលោក​មិន​អាច​ទទួលយក​នូវ​អ្វី​ដែល​កំពុង​កើតឡើង​នៅ​ទីនោះ​បាន​ទេ​។ ខ្ញុំ​សង្ឃឹមថា​ពិភពលោក​ទាំងមូល​នឹង​គាំទ្រ​អ៊ុ​យក្រែន​”៕

ឡេ​វ៉ាន់ដូវ​ស្គីពា​ក់ស្លា​កដៃ​ពណ៌ទង់​ជាតិ​អ៊ុ​យក្រែ​ន​អំឡុង​ការប្រកួត​