​ប្រែ​សម្រួលៈ​បំណង​(ST)៖​ទេសចរ​រុស្ស៊ី​រាប់ពាន់​នាក់​កំពុង​ជាប់​នៅ​ថៃ​នៅ​ពេល​ទណ្ឌកម្ម​លោកខាងលិច​ដោយសា​រ​បញ្ហា​អ៊ុ​យក្រែ​ន​កំពុង​ធ្វើអោយ​ជនជាតិ​រុស្ស៊ី​ពិបាក​រក​យន្តហោះ​និង​ថវិកា​ដើម្បី​ធ្វើដំណើរ​​ត្រឡប់​ទៅ​ស្រុក​វិញ នេះ​បើ​តាម​ការបញ្ជាក់​របស់​មន្ត្រី​ថៃ​កាលពី​ថ្ងៃ​អង្គារ​ទី​៨​មីនា ។​

​ប្រធាន​អាជ្ញាធរ​ទេសចរណ៍​ថៃ​បាន​និយាយថា ការលុបចោល​ជើងយន្តហោះ ការធ្លាក់​ថ្លៃ​ប្រាក់​រូបល៍​និង​បញ្ហា​កាត់ផ្តាច់​ការផ្ទេរ​ប្រាក់​ចេញពីប​ណ្តា​ធនាគារ​រុស្ស៊ី​តាម​ប្រព័ន្ធ​វ៉េ​ប្រាក់​សកល​Swift បាន​នាំ​​អោយ​ជនជាតិ​រុស្ស៊ី​ជាង​៧.០០០​នាក់​ជាប់​នៅក្នុង​ប្រទេស​ថៃ​មិន​ដឹង​គិត​យ៉ាង​ណា​នៅក្នុង​ទីតាំង​ទេសចរណ៍​ជាច្រើន​ដូចជា កោះ​ភូ​កេត កោះ​សាម៊ុ​យ​(Koh Samui)​ក្រុង​ប៉ាត់​តា​យ៉ា​(Pattaya )​និង​កោះ​ក្រា​ប៊ី​(Krabi)​។​

​លោក យុ​ត្ថា​សាក់ ស៊ូផា​សន​(Yuthasak Supasorn)​បាន​ប្រាប់​សារព័ត៌មាន​រ៉​យ​ទ័​រថា « យើង​ត្រូវតែ​ធ្វើជា​អ្នក​ទទួល​ភ្ញៀវ​ដ៏​ល្អ និង​យកចិត្ត​មើលថែ​គ្រប់​គ្រប់គ្នា​។​នៅ​មាន​ទេសចរ​រុស្ស៊ី​កំពុងធ្វើដំណើរ​​មក​ទី​នេះ​នៅឡើយ​ទេ​»​។​

​ស្ថានទូត​រុស្ស៊ី​នៅ​ក្រុង​បាងកក​មិនបាន​ឆ្លើយតប​នឹង​សំណួរ​អ្នកសារព័ត៌មាន​អំពី​ស្ថានភាព​ពលរដ្ឋ​ខ្លួន​នៅ​ថៃ​ទេ​។​

​កាលពី​ឆ្នាំ​២០១៩ ថៃ​បាន​ទទួល​ទេសចរ​រុស្ស៊ី​ប្រមាណ​១,៤​លាន​នាក់​។​កាលពី​ខែ​មករា​ជនជាតិ​រុស្ស៊ី​ប្រមាណ​២៣.០០០​នាក់​បាន​មក​ទស្សនា​ថៃ​ដែល​តំណាងអោយ​មួយ​ភាគ​ប្រាំ​នៃ​ទេសចរ​បរទេស​ដែល​បាន​​មក​ទស្សនា​ព្រះរាជាណាចក្រ​ថៃ​ក្នុង​អំឡុង​ពេល​នេះ​។​

​សូមបញ្ជាក់​ថា ក្នុងចំណោម​ជនជាតិ​រុស្ស៊ី​ជាប់​ដំណើរ​ទាំងនេះ ប្រមាណ​ពាក់កណ្តាល​នៅ​កោះ​ភូ​កេត​។​

​ក្នុងពេល​ជាមួយគ្នា ប្រធាន​សមាគម​ទេសច​រណ៍​ថៃ​បាន​និយាយថា លោក​បាន​ស្នើសុំ​អោយ​បណ្តា​សណ្ឋាគារ​បញ្ចុះ​ថ្លៃ​និង​បន្ត​អោយ​ពួកគេ​ស្នាក់នៅ​។​

​ទេសចរ​ខ្លះ បាន​ងាក​ទៅប្រើ​កាត​បើកប្រាក់​UnionPay​របស់​ចិន ក្រោយ​ពី​បណ្ណ​ឥណទាន​Visa​និង Mastercard​របស់​ក្រុមហ៊ុន​អាម៉េរិក​ដែល​ចេញ​ដោយ​ធនាគារ​រុស្ស៊ី​បញ្ឈប់​ប្រតិបត្តិការ​។​

​សូមបញ្ជាក់​ថា ទោះជា​ថៃ​ស្ថិត​ចំណោម​ប្រទេស​១៤១​ដែល​គាំទ្រ​សេចក្តីសំរេចចិត្ត​របស់​អង្គការសហប្រជាជាតិ ដែល​អំពាវនាវ​អោយ​រុស្ស៊ី​ដកទ័ព​ចេញពី​អ៊ុ​យក្រែន ក៏​ខ្លួន​មិន​ដាក់​ទណ្ឌកម្ម​ណាមួយ​លើ​រដ្ឋា​ភិ​​បាល​ក្រុង​មូ​ស្គូ​ដែរ​៕

​ទេសចរ​រុស្ស៊ី​ពាក់កណ្តាល​ជាប់​នៅ​កោះ​ភូ​កេត​។​ពួកគេ​ឥឡូវ​លែង​សប្បាយចិត្ត​នឹង​ការសម្រាកលំហែ​កាយ​ដោយ​គិតតែ​ចុច​ទូរស័ព្ទ​តាមដាន​សភាពការណ៍​សង្គ្រាម​