​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ តម្លៃ​ប្រេង​បាន​កើនឡើង​ប្រហែល ៤ ភាគរយ​កាលពី​ថ្ងៃ​អង្គារ​ទី​៨​មីនា ខណៈ​សហរដ្ឋ​អាម៉េរិក​បាន​ហាមឃាត់​ការ​នាំចូល​ប្រេង​ពី​រុស្ស៊ី​ហើយ​ចក្រភព​អង់គ្លេស​​បាន​និយាយថា ខ្លួន​នឹង​លុបចោល​ការនាំ​ចូល​ប្រេង​ពី​រុស្ស៊ី​នៅ​ចុងឆ្នាំ​នេះ ដែល​ការសម្រេចចិត្ត​នេះ​រំពឹង​ធ្វើ​ឱ្យ​រំខាន​ដល់​ទីផ្សារ​ថាមពល​ពិភពលោក​បន្ថែម​ទៀត​ទី​ដែល​រុស្ស៊ី​ជា​អ្នក​នាំចេញ​ប្រេង​ឆៅ​​ធំ​បំផុត​ទី​ពីរ​។​

​តម្លៃ​ប្រេង​បាន​កើន​ឡើង​ជាង ៣០ ភាគរយ ចាប់តាំងពី​រុស្ស៊ី​បាន​ឈ្លានពាន​អ៊ុ​យក្រែន ហើយ​សហរដ្ឋ​អាម៉េរិក​និង​ប្រទេស​ផ្សេងទៀត​បាន​ដាក់​ទណ្ឌកម្ម​ជា​បន្តបន្ទាប់​។​ការនាំ​ចេញ​ប្រេង​និង​ឧស្ម័ន​របស់​រុស្ស៊ី​​ត្រូវបាន​ព្រងើយកន្តើយ​រួចទៅហើយ មុន​ពេល​ការហាមឃាត់ ខណៈ​ដែល​ពួក​ពាណិជ្ជករ​ព្យាយាម​បញ្ចៀស​ដំណើរការ​ទណ្ឌកម្ម​នាពេល​អនាគត​។​

​ប្រធានាធិបតី​អាម៉េរិក ចូ បៃ​ដិន បានប្រកាស​ហាមឃាត់​ការនាំ​ចូល​ប្រេង​និង​ថាមពល​ផ្សេង​ទៀត​ពី​រុស្ស៊ី​។ ចក្រភព​អង់គ្លេស​បាន​និយាយថា​ខ្លួន​នឹង​បញ្ឈប់​ការនាំ​ចូល​ប្រេង​និង​ផលិតផល​ប្រេង​ពី​រុស្ស៊ី​នៅ​​ចុងឆ្នាំ ២០២២ ដោយ​ផ្តល់​ពេលវេលា​ដល់​ទីផ្សារ​និង​អាជីវកម្ម​ដើម្បី​ស្វែងរក​ជម្រើស​ផ្សេង​។​

​អនាគត​ប្រេង​ឆៅ​របស់​ទីផ្សារ Brent បាន​លក់​ចេញ​នៅ​តម្លៃ ១២៧,៩៨ ដុល្លារ​ក្នុង​មួយ​បារ៉ែល ពោលគឺ​កើន​ឡើង​ជាង ៣,៩ ភាគរយ ខណៈ​ប្រេង​ឆៅ​របស់​សហរដ្ឋ​អាម៉េរិក​បាន​លក់​ចេញ​នៅ​តម្លៃ ១២៣,៧០ ដុល្លារ​ក្នុង​មួយ​បារ៉ែល ពោលគឺ​កើនឡើង ៣,៦ ភាគរយ​។​

​រុស្ស៊ី​នាំចេញ​ប្រេង​ឆៅ​និង​ប្រេងឥន្ធនៈ​ពី ៧ ទៅ ៨ លាន​បារ៉ែល​ក្នុង​មួយថ្ងៃ​ទៅ​កាន់​ទីផ្សារ​ពិភពលោក​។ សម្ពន្ធមិត្ត​អឺរ៉ុប​មិន​រំពឹង​ចូលរួម​ជាមួយ​សហរដ្ឋ​អាម៉េរិក​ក្នុង​ការហាមឃាត់​នោះ​ទេ​ប៉ុន្តែ​អ្នកទិញ​​ធំៗ​នៅ​ទីនោះ​បាន​គេច​ចេញពី​ប្រេង​រុស្ស៊ី​រួចទៅហើយ​។ ក្រុមហ៊ុន Shell ជា​ក្រុមហ៊ុន​សំខាន់​មួយ​ដែល​បាន​ទិញ​ប្រេង​ឆៅ​របស់​រុស្ស៊ី​បាន​ប្រឈមមុខ​នឹង​ការរិះគន់​ជាច្រើន​រួម​ទាំង​ពី​រដ្ឋមន្ត្រី​ការបរទេស​​អ៊ុយ​ក្រែន​ផងដែរ​។ កាលពី​ថ្ងៃ​អង្គារ ក្រុមហ៊ុន Shell បាន​និយាយថា ខ្លួន​នឹង​មិន​ទិញ​ប្រេង​ពី​រុស្ស៊ី​ទៀត​ទេ​។​

​ការរអាក់រអួល​នេះ​អាច​នឹង​ផ្ទុះ​ឡើង​ចូល​ទីផ្សារ​ថាមពល​ផ្សេងទៀត ខណៈ​ប្រេង​និង​ផលិតផល​របស់​រុស្ស៊ី​ត្រូវបាន​ប្រើប្រាស់​សម្រាប់​ការ​ចម្រាញ់​ទៅជា​ទំនិញ​ផ្សេងទៀត​។​

​លោក រ៉ូ​ជើ ឌី​វ៉ាន់ (Roger Diwan) អនុប្រធាន​ផ្នែក​សេវាកម្ម​ហិរញ្ញវត្ថុ​នៅ​ក្រុមហ៊ុន S&P Global បាន​និយាយថា “​យើង​កំពុង​នៅ​កន្លែង​ចាប់ផ្តើម​នៃ​រលក​ផលប៉ះពាល់​នៅក្នុង​ទីផ្សារ​ថាមពល​”​។​

​រដ្ឋមន្ត្រី​ថាមពល​អាម៉េរិក​លោកស្រី ជេនី​ហ្វើ ហ្គ្រា​ន​ហូ​ម (Jennifer Granholm) បាន​និយាយ​បន្ទាប់​ពី​ការប្រកាស​ដាក់​ទណ្ឌកម្ម​ថា​សម្ពន្ធមិត្ត​មិន​ស្ថិតនៅ​ក្រោម​សម្ពាធ​ក្នុង​ការហាមឃាត់​ប្រេង​​រុស្ស៊ី​នោះទេ​៕

​ប្រេង​ឆៅ​របស់​ទីផ្សារ Brent បាន​លក់​ចេញ​នៅ​តម្លៃ ១២៧,៩៨ ដុល្លារ​ក្នុង​មួយ​បារ៉ែល ពោលគឺ​កើន​ឡើង​ជាង ៣,៩ ភាគរយ