​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ មន្ទីរ​បញ្ច​កោណ​កាលពី​ថ្ងៃ​អង្គារ​ទី​០៨​មីនា​បាន​ច្រាន​ចោល​ការប្រកាស​ដ៏​គួរឱ្យភ្ញាក់ផ្អើល​មួយ​ពី​ប្រទេស​ប៉ូឡូញ​ថា ខ្លួន​នឹង​ផ្តល់​ឱ្យ​សហរដ្ឋ​អាម៉េរិក​នូវ​យន្តហោះ​ចម្បាំង MiG-29 របស់​ខ្លួន​សម្រាប់​ប្រើប្រាស់​ដោយ​អ៊ុ​យក្រែន ដែល​ជា​ការបង្ហាញ​ការមិនចុះសម្រុង​គ្នា​ដ៏​កម្រ​ខណៈ​ដែល​សម្ពន្ធមិត្ត​ណា​តូ​ស្វែង​ជួយ​យុទ្ធជន​អ៊ុយ​ក្រែន​ក្នុងការ​ទប់ទល់​នឹង​ទាហាន​រុស្ស៊ី​។​

​អ្នកនាំពាក្យ​មន្ទីរ​បញ្ច​កោណ​លោក ច​ន កឺ​ប៊ី បាន​និយាយថា ការប្រកាស​របស់​ប៉ូឡូញ​ថា​ខ្លួន​មាន​បំណង​បញ្ជូន​យន្តហោះ​ចម្បាំង​ទាំង​២៨ គ្រឿង​ទៅ​កាន់​មូលដ្ឋាន​ទ័ពអាកាស​រ៉ា​ម​ស្តេន (Ramstein) របស់​អាម៉េរិក​នៅ​អាល្លឺម៉ង់​បាន​លើកឡើង​អំពី​លទ្ធភាព​នៃ​យន្តហោះ​ចម្បាំង​ចាកចេញ​ពី​មូលដ្ឋាន​របស់​សហរដ្ឋ​អាម៉េរិក​និង​អង្គការ​ណា​តូ​ដើម្បី​ហោះហើរ​ចូលទៅ​ក្នុង​ដែនអាកាស​ដែល​មាន​ជម្លោះ​ជាមួយ​​រុស្ស៊ី​នៅក្នុង​ជម្លោះ​អ៊ុ​យក្រែន​។​

​លោក​កឺប៊ី​បាន​និយាយ​នៅក្នុង​សេចក្តីថ្លែងការណ៍​មួយ​ថា “​យើង​នឹង​បន្ត​ពិគ្រោះ​យោបល់​ជាមួយ​ប៉ូឡូញ​និង​សម្ពន្ធមិត្ត​ណា​តូ​ផ្សេង​ទៀត​របស់​យើង​អំពី​បញ្ហា​នេះ​និង​បញ្ហា​ប្រឈម​ផ្នែក​ភស្តុភារ​ដ៏​លំបាក​​ដែល​បាន​លេចឡើង ប៉ុន្តែ​យើង​មិន​ជឿ​ថា សំណើ​របស់​ប៉ូឡូញ​គឺជា​សំណើ​ដែល​មិន​អាច​អនុវត្តបាន​នោះឡើយ​”​។​

​អំណោយ​យន្តហោះ​ចម្បាំង​ដែល​បាន​ស្នើ​ឡើង​នេះ​នឹង​ក្លាយជា​ការជំរុញ​ខាង​ស្មារតី​សម្រាប់​អ៊ុ​យក្រែន ដែល​ឥឡូវនេះ​កំពុង​ស្ថិត​ក្រោម​ការវាយលុក​របស់​រុស្ស៊ី​អស់​រយៈពេល​ជិត​ពីរ​សប្តាហ៍​។ ប៉ុន្តែ​វា​ក៏​បង្កើន​ហានិភ័យ​នៃ​សង្គ្រាម​ដែល​ពង្រីក​ហួស​ពី​ប្រទេស​អ៊ុយ​ក្រែន​ផងដែរ​។​

​រុស្ស៊ី​បានប្រកាសថា ការគាំទ្រ​កម្លាំង​ទ័ពអាកាស​របស់​អ៊ុយ​ក្រែន​តាម​វិធី​នេះ​នឹង​ស្មើ​នឹង​ការចូលរួម​ក្នុង​សង្គ្រាម ហើយ​អាច​ជំរុញ​ឱ្យ​មាន​ការ​សងសឹក​។​

​ក្រុមមន្ត្រី​សេត​វិមាន​មាន​ការស្រឡាំងកាំង​ចំពោះ​សេចក្តីប្រកាស​របស់​រដ្ឋាភិបាល​ប៉ូឡូញ​ស្តី​ពី​យន្តហោះ MiG ។ សំណើ​ខាងលើ​មិន​បាន​កើត​ឡើង​ទេ​ក្នុងអំឡុងពេល​ពិភាក្សា​ជាមួយ​រដ្ឋមន្ត្រី​ការបរទេស​អាម៉េរិក​លោក អ៊ែន​ថូ​នី ប្លីង​កិន នៅពេលដែល​លោក​កំពុង​ស្ថិត​ក្នុង​ប្រទេស​ប៉ូឡូញ​ថ្មីៗ​នេះ នេះ​បើ​យោង​តាម​មន្ត្រី​អាម៉េរិក​ម្នាក់​ដែល​ដឹង​ពី​កិច្ចពិភាក្សា​នេះ​។​

​អនុ​រដ្ឋមន្ត្រីការបរទេស​អាម៉េរិក​លោកស្រី វិក​ធឺ​រៀ នូ​លែ​ន (Victoria Nuland)​បាន​ប្រាប់​សមាជិកសភា​នៅក្នុង​សវនាការ​គណៈកម្មាធិកា​រ​ទំនាក់ទំនង​បរទេស​របស់​ព្រឹទ្ធសភា​ស្តីពី​វិបត្តិ​អ៊ុ​យក្រែន​​កាលពី​ថ្ងៃ​អង្គារ​ថា លោកស្រី​បាន​ដឹង​ពី​ផែនការ​របស់​ប៉ូឡូញ​ពេល​កំពុង​បើកបរ​ទៅ​សវនាការ​របស់​ព្រឹទ្ធសភា​ប៉ុណ្ណោះ​។​

​លោកស្រី​នូ​លែ​ន​បាន​ប្រាប់​សមាជិកសភា​ថា “​តាម​ដែល​ខ្ញុំ​បានដឹង សំណើ​នេះ​មិន​ត្រូវ​បាន​ពិគ្រោះ​យោបល់​ជា​មុន​ជាមួយ​យើង​នោះទេ​”៕

​ប៉ូឡូញ​ចង់​ផ្តល់​យន្តហោះ MiG​អោយ​អ៊ុយ​ក្រែន​តែ​មិន​ចង់​ជួយ​ផ្ទាល់​ទេ គឺ​ចង់​បញ្ជូន​វា​ទៅកាន់​មូលដ្ឋានទ័ព​អាម៉េរិក​សិន​ទុកអោយ​អាម៉េរិក​ចាត់ចែង​តាម​ក្រោយ តែ​គំនិត​នេះ​ត្រូវ​រដ្ឋាភិបាល​ក្រុង​វ៉ា​ស៊ីន​​តោន​បដិសេធ​