​ប្រែ​សម្រួលៈ​បំណង​(​ដេល្លី​ម៉េល​)៖ ក្រុមហ៊ុន​McDonald’s, Coca-Cola និង Starbucks​កាលពី​ថ្ងៃ​អង្គារ​ទី​០៨​មីនា​បាន​ចុះចាញ់​នឹង​សម្ពាធ​សាធារណៈ ដោយ​ប្រកាស​បញ្ឈប់​ការ​រកស៊ី​នៅ​រុស្ស៊ី​​ដោយ​ចូលរួម​ជាមួយ​ក្រុមហ៊ុន​សារ​ជីវ​កម្ម​អន្តរជាតិ​ដទៃទៀត​ក្នុង​ការឆ្លើយតប​ទៅនឹង​ការ​ដែល​រដ្ឋាភិបាល​ក្រុង​មូ​ស្គូ​ចូល​ឈ្លានពាន​អ៊ុ​យក្រែន​។​

​ជាច្រើន​នៃ​ក្រុមហ៊ុន ដែល​ជា​និម្មិត​រូប​នៃ​ឥទ្ធិពល​វប្បធម៌​អាម៉េរិក​នៅក្នុង​លោក បាន​ក្លាយ​ជា​កម្មវត្ថុ​នៃ​ការអំពាវនាវ​តាម​បណ្តាញ​សង្គម​អោយ​ធ្វើ​ពហិការ​ការរក​ស៊ី​នៅក្នុង​ប្រទេស​រុស្ស៊ី​ដោយសារតែ​ការ​​ឈ្លានពាន​ចូល​អ៊ុ​យក្រែន​។​

​ក្រុមហ៊ុន​អាហារ​ឆ្អិន​ស្រាប់​ភ្លាម​McDonald’s​បាន​និយាយថា​«​យើង​មិន​អាច​ធ្វើ​មិនដឹងមិនឮ​ការ​រងទុក្ខវេទនា​រប​ស់មនុស្ស​នៅ​អ៊ុយ​ក្រែន​បានទេ​។​យើង​ប្រកាស​បិទ​ហាង​ទាំង​៨៥០​ជា​បណ្តោះអាសន្ន​នៅ​​រុស្ស៊ី ដោយ​ប៉ះពាល់​បុគ្គលិក​កម្មករ​ប្រមាណ​៦២.០០០​នាក់​»​។​

Starbucks, Coca-Cola និង PepsiCo ក៏​ប្រកាស​ការសំរេចចិត្ត​ផ្ទាល់​របស់​គេ​ក្នុងការ​បញ្ឈប់​ឬ​កំហិត​ការ​រកស៊ី​របស់​គេ​នៅ​រុស្ស៊ី​បន្តបន្ទាប់​គ្នា​ភ្លាមៗ​ផងដែរ ។​

​ក្រុមហ៊ុន​PepsiCo បាន​និយាយថា ទោះជា​បញ្ឈប់​ការលក់​ភេសជ្ជៈ​Pepsi​ក៏ដូចជា 7Up​និង Mirinda​នៅ​រុស្ស៊ី ក៏​ខ្លួន​នៅ​បន្ត​លក់​ផលិតផល​ដូចជា ទឹកដោះគោ​និង​អាហារ​កូនក្មេង​ដើម្បី​បន្ត​ទ្រទ្រង់​​ការរស់នៅ​របស់​សហ​ការី​ប្រមាណ​២០.០០០​នាក់​និង​កម្មករ​កសិករ​រុស្ស៊ី​ប្រមាណ​៤០.០០០​នាក់​នៅក្នុង​ខ្សែសង្វាក់​ផ្គត់ផ្គង់​។​

Starbucks​ដែល​មាន​ហាង​កាហ្វេ​ប្រមាណ​១៣០​នៅ​រុស្ស៊ី បាន​និយាយថា​រាល់​ប្រតិបត្តិការ រួម​ទាំង​ការដឹកជញ្ជូន​ផលិតផល​នឹងត្រូវ​ផ្អាក​។​

​ក្រុម​មួយ​មក​ពី​សកល​វិទ្យាល័យ​យ៉េល​(Yale)​បាន​និយាយថា ក្រុមហ៊ុន​ប្រមាណ​២៩០​បាន​ដកខ្លួន​ឬ​ផ្អាក​ការ​រកស៊ី​នៅ​រុស្ស៊ី​ចាប់តាំងពី​ពេល​ទាហាន​រុស្ស៊ី​ចូល​ឈ្លានពាន​អ៊ុយ​ក្រែន​កាលពី​ថ្ងៃ​២៤​កុម្ភៈ​មក​៕

McDonald’s, Coca-Cola KFC, Pizza Hut​និង Starbucks​សុទ្ធ​តែ​ក្រុមហ៊ុន​ល្បីៗ​ដែល​បាន​បញ្ឈប់​ឬ​ផ្អាក​ការរកស៊ី​បណ្តោះអាសន្ន​នៅ​រុស្ស៊ី​