ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រជាជន​កូរ៉េ​ខាងត្បូង​បាននិងកំពុង​បោះឆ្នោត​ជ្រើសរើស​ប្រធានាធិបតី​ថ្មី​នៅ​ថ្ងៃ​ពុធ​នេះ ដោយ​បេក្ខជន​គណបក្ស​សេរីនិយម​ដែល​កំពុងកាន់​អំណាច និង អតីត​រដ្ឋអាជ្ញា​មួយរូប ត្រូវបាន​ចាត់ទុក​ជា​បេក្ខជន​ឈាន​មុខ​នៅ​ក្នុង​ការ​ប្រណាំងប្រជែង​ដ៏​តឹងតែង ដែល​បាន​ធ្វើឱ្យ​បែកបាក់​ប្រជាជន​ក្នុងប្រទេស​កាន់តែ​ធ្ងន់ធ្ងរ​ឡើង​។​

​ការ​ស្ទាបស្ទង់​មតិ​មុន​ការបោះឆ្នោត​បាន​បង្ហាញ​បេក្ខជន​បក្ស​សេរីនិយម​លោក លី ជែ​ម្យុង (Lee Jae-myung) អតីត​អភិបាលខេត្តចឹង​ជី (Gyeonggi) ដែល​មាន​ប្រជាជន​រស់នៅ​ច្រើន​បំផុត​របស់​កូរ៉េខាងត្បូង និង​គូប្រជែង​អភិរក្សនិយម​ដ៏​សំខាន់​របស់​គាត់​គឺ អតីត​អគ្គ​រដ្ឋអាជ្ញា​លោក យូ​ន ស៊ុគ យ៉ូល (Yoon Suk Yeol) មាន​សំឡេង​គាំទ្រ​ស្មើគ្នា ដោយ​នាំមុខ​ឆ្ងាយ​លើ​គូប្រជែង ១០ នាក់​ផ្សេង​ទៀត​។

​អ្នកឈ្នះ​នឹង​ចូលកាន់​តំណែង​នៅ​ខែ​ឧសភា និង​បម្រើការ​មួយ​អាណត្តិ​គត់ ដែល​មាន​ប្រាំ​ឆ្នាំ ក្នុងនាម​ជា​មេដឹកនាំ​នៃ​មហាអំណាច​សេដ្ឋកិច្ច​ទី ១០ របស់​ពិភពលោក​។​

​លោក​លី​និង​លោក​យូ​ន​បាន​ធ្វើ​យុទ្ធនាការ​នយោបាយ​ដ៏​ជូរចត់​បំផុត​មួយ​នៅក្នុង​ប្រវត្តិសាស្ត្រ​ថ្មីៗ​នេះ​។​អ្នក​ទាំង​ពីរ​បាន​ព្រមព្រៀង​គ្នា​ថា ប្រសិន​បើ​ពួកគេ​ឈ្នះ​ពួកគេ​នឹង​មិន​ធ្វើ​ការស៊ើបអង្កេត​ដោយហេតុ​​ផល​នយោបាយ​ប្រឆាំង​នឹង​ភាគី​ម្ខាង​ទៀត​នោះ​ទេ​ប៉ុន្តែ​មនុស្ស​ជាច្រើន​ជឿថា​បេក្ខជន​ដែល​ចាញ់​អាច​នៅ​តែ​ប្រឈមមុខ​នឹង​ការ​ស៊ើបអង្កេត​បទល្មើស​លើ​រឿងអាស្រូវ​មួយចំនួន​ដែល​ពួកគេ​បាន​ជាប់​​ពាក់ព័ន្ធ​។​

​ពួក​អ្នក​រិះគន់​និយាយថា បេក្ខជន​ទាំងពីរ​មិន​បាន​បង្ហាញ​ពី​យុទ្ធសាស្ត្រ​ច្បាស់លាស់​អំពី​របៀប​ដែល​ពួកគេ​នឹង​បន្ធូរបន្ថយ​ការគំរាមកំហែង​ពី​កូរ៉េខាងជើង និង​អាវុធ​នុយក្លេអ៊ែរ​របស់​កូរ៉េខាងជើង​នោះទេ​។ អ្នកបោះឆ្នោត​មាន​ការងឿងឆ្ងល់​អំពី​របៀប​ដែល​អ្នក​ទាំង​ពីរ​នឹង​ដោះស្រាយ​ទំនាក់ទំនង​អន្តរជាតិ​ចំពេល​មាន​ការប្រកួតប្រជែងរ​វាង​សហរដ្ឋ​អាម៉េរិក​និង​ចិន​និង​របៀប​ដែល​ពួកគេ​នឹង​ដោះស្រាយ​វិសមភាព​សេដ្ឋកិច្ច​ដែល​រីក​កាន់តែ​ធំ​ឡើង​និង​តម្លៃ​ផ្ទះ​ដែល​ហក់​ឡើង​ខ្ពស់កប់ពពក​។​

​លោក ចាង សឿង​ជីន (Jang Seung-Jin) ជា​សាស្ត្រាចារ្យ​នៅ​សាកលវិទ្យាល័យ​គុក​មីន (Kookmin) នៃ​ទីក្រុង​សេ​អ៊ូ​ល​បាន​និយាយថា “​ទោះបី​ការបោះឆ្នោត​នៅ​ឆ្នាំ​នេះ​មាន​សារៈសំខាន់​ក៏ប៉ុន្តែ​​ការ​ប្រណាំងប្រជែង​បាន​ផ្តោត​សំខាន់​តែ​លើ​យុទ្ធនាការ​អវិជ្ជមាន​ខ្លាំងពេក​” ដោយ​បន្ថែម​ថា​គ្មាន​បេក្ខជន​ណា​ម្នាក់​ដាក់ចេញ​ផែនការមេ​អំពី​របៀប​ដែល​ពួកគេ​នឹង​ដឹកនាំ​កូរ៉េ​ខាងត្បូង​នោះ​ទេ​។​

​ការបោះឆ្នោត​នេះ​កើតឡើង​ខណៈ​កូរ៉េខាងត្បូង​កំពុង​ប្រឈម​នឹង​ការកើនឡើង​ករណី​ឆ្លងកូវី​ដ​១៩​ដែល​ជំរុញ​ដោយ​មេរោគ​អូ​មី​ក្រុង​។ កាលពី​ថ្ងៃ​ពុធ អាជ្ញាធរ​សុខាភិបាល​កូរ៉េខាងត្បូង​បាន​រាយការណ៍​ពី​ករណី​ឆ្លង​មេរោគ​ថ្មី​ចំនួន ៣៤២.៤៤៦ នាក់ ដែល​ជា​កំណត់ត្រា​ខ្ពស់​មួយ​ទៀត​៕

​បេក្ខជន​បក្ស​សេរីនិយម​លោក លី ជែ​ម្យុង និង​គូប្រជែង​អភិរក្សនិយម​ដ៏​សំខាន់​របស់​គាត់​គឺ អតីត​អគ្គ​រដ្ឋអាជ្ញា​លោក យូ​ន ស៊ុគ យ៉ូល