ដោយៈ ភ្នំ​សន្ទុក / កំពង់ធំៈ លោក ងួន រតនៈ អភិបាលខេត្ត​កំពង់ធំ បាន​មាន ប្រសាសន៍ថាៈ ព្រឹត្តិការណ៍​ជិះ​កង់​ពី​ទី​រួម​ខេត្ត ឆ្ពោះ​មកកាន់​កាន់​រមណីយដ្ឋាន ប្រវត្តិសាស្ត្រ​សំបូរ​ព្រៃ​គុក​នេះ ទិសដៅ​សំខាន់ ដើម្បី​អបអរសាទរ​ខួប​លើក​ទី ១១១ នៃ​ទិវា​នារី​អន្តរជាតិ ៨ មីនា ២០២២ ដើម្បី​លើកកម្ពស់ និង​ការចូលរួម​អនុវត្ត ប្ដេជ្ញាចិត្ត​របស់​រដ្ឋបាល​ខេត្ត ក្នុងការ​អនុវត្ត​គោលនយោបាយ ពង្រឹងសមត្ថភាព យេនឌ័រ ដែល​បានចាត់ទុក​ស្ត្រី ជា​ឆ្អឹងខ្នង​នៃ​ការអភិវឌ្ឍ​សេដ្ឋកិច្ច និង សង្គមជាតិ​។​

​លោក ងួន រតនៈ បាន​បន្តថាៈ នេះ​គឺ​បង្ហាញ​ពី​សកម្មភាព ក្នុងការ​ជំរុញ​ចលនា ទេសចរណ៍ នៅក្នុង​ស្រុក ឲ្យ​ស្គាល់​ពី​រមណីយដ្ឋាន​ប្រវត្តិសាស្ត្រ សំបូរ​ព្រៃ​គុក ពិសេស​ដើម្បី​ឲ្យ​ប្រជាពលរដ្ឋ បាន​យល់ច្បាស់ អំពី​ការធ្វើ ទេសចរណ៍ តាម​រមណីយដ្ឋាន​នានា នៅក្នុង​ខេត្តកំពង់ធំ ។​

​ជាមួយគ្នានេះ លោក សេង អាន ប្រធាន​មន្ទីរ​ទេសចរណ៍ ខេត្តកំពង់ធំ បាន​អំពាវនាវ​ដល់ ក្រុម​កីឡាករ តាម​បណ្តា​ស្ថាប័ន​មន្ទីរ ក្រុមអាជីវករ និង​ប្រជាពលរដ្ឋ​ទាំងអស់ ដែល​ចូលរួម​ក្នុង ការ​ជិះ​កង់ ដើម្បី​អបអរសាទរ​ទិវា អន្តរជាតិ គឺ​សុំ​ឲ្យ​ក្រុម​អ្នកជិះ​កង់​ទាំងអស់នោះ ត្រូវអនុវត្ត តាម​ការណែនាំ​របស់ ក្រសួងសុខាភិបាល ដោយ​រក្សា បី​កុំ បី​ការពារ ជាពិសេស យើង​ត្រូវ​ចូលរួម ក្នុងការ​រក្សា​អនាម័យ​បរិស្ថាន នៅក្នុង​ទីតាំង​ផ្សេងៗ ពិសេស​នៅក្នុង​បរិវេណ រមណីយដ្ឋាន​សំបូរ​ព្រៃ​គុក​។​

​គួរបញ្ជាក់​ផងដែរ​ថា ក្នុង​ព្រឹត្តិការណ៍​នា​ថ្ងៃទី​៨ ខែមីនា ឆ្នាំ​២០២២ មានការ អញ្ជើញ​ចូលរួម ជិះ​កង់ លោក​អភិបាលខេត្ត អភិបាលខេត្តរង លោក​ប្រធាន​មន្ទីរ អនុប្រធាន​មន្ទីរ​នានា​ជុំវិញ​ខេត្ត ថ្នាក់ដឹកនាំ និង​សហការី រួមទាំង​ក្រុម​កីឡាករ ជិះ​កង់ ក្រុមអាជីវករ នៅក្នុង​ខេត្តកំពង់ធំ ប្រមាណ​ជាង ១០០ នាក់ ដោយ​ចេញដំណើរ ពី​ទី​រួម​ខេត្តកំពង់ធំ ឆ្ពោះទៅ​រមណីយដ្ឋាន ប្រវត្តិសាស្ត្រ ប្រាសាទសំបូរព្រៃគុក ចំងាយ​ប្រមាណ ៣០ គីឡូម៉ែត្រ​៕/V​-PC