​ប្រែ​សម្រួលៈ​បំណង​(ST,​ស៊ីន​ហួរ​)៖ ប្រធានាធិបតី​ចិន​លោក ស៊ី ជីន​ភីង កាលពី​ថ្ងៃ​អង្គារ​ទី​០៨​មីនា​បាន​អំពាវនាវ​អោយ​មាន​«​ការអត់ធ្មត់​ជា​អតិបរមា​»​ក្នុង​ជម្លោះ​អ៊ុ​យក្រែន ហើយ​បាន​និយាយថា ចិន​«​ឈឺចាប់​ដោយ​ឃើញ​អណ្តាតភ្លើង​សង្គ្រាម​ឆាបឆេះ​នៅ​អឺរ៉ុប​» នេះ​បើ​តាម​ការផ្សាយ​របស់​សារព័ត៌មាន​រដ្ឋ​ចិន​។​

​លោក ស៊ី ជីន​ភីង ជួប​សន្ទនា​ជាមួយ​សម​ភាគី​បារាំង​លោក អេម​ម៉ានុយ​អែល ម៉ា​ក្រុង និង​អធិកា​ប​តី​អាល្លឺម៉ង់ លោក អូ​ឡា​ហ្វ ស្កូល​កាលពី​ថ្ងៃ​អង្គារ​

​ទូរទស្សន៍​រដ្ឋ​CCTV បាន​រាយការណ៍​ថា ថ្លែង​ក្នុង​ជំនួប​ជាមួយ​សម​ភាគី​បារាំង​លោក អេម​ម៉ានុយ​អែល ម៉ា​ក្រុង និង​អធិកា​ប​តី​អាល្លឺម៉ង់ លោក អូ​ឡា​ហ្វ ស្កូ​ល​(Olaf Scholz) លោក​ស៊ី បាន​និយាយថា​ ប្រទេស​ទាំង​បី​គួរ​រួម​គ្នា​គាំទ្រ​កិច្ចពិភាក្សា​ស្វែងរក​សន្តិភាព​រវាង​រុស្ស៊ី​និង​អ៊ុ​យក្រែន​។​

​បើតាម​CCTV លោក​ស៊ី​បាន​ពណ៌នា​ស្ថានការណ៍​នៅ​អ៊ុយ​ក្រែនថា​«​គួរអោយ​ព្រួយបារម្ភ​ណាស់​»​និង​ថា​អាទិភាព​នៅពេល​ឥឡូវ​គួរ​ជា​ការរារាំង​កុំ​អោយ​សភាពការណ៍​កាន់​តែ​អាក្រក់​ទៅ ឬ​«​ទៅ​ហួស​ពី​លទ្ធ​​ភាព​អាច​គ្រប់គ្រង​បាន​»​។​

​លោក​ក៏​បាន​និយាយថា ទាំង​បារាំង​និង​អាល្លឺម៉ង់​គួរ​ខិតខំ​កាត់បន្ថយ​ផលប៉ះពាល់​អវិជ្ជមាន​នៃ​វិបត្តិ​នេះ​និង​បាន​សម្តែង​ការព្រួយបារម្ភ​អំពី​ផលប៉ះពាល់​បណ្តាលមកពី​ការដាក់ទណ្ឌកម្ម​ទៅលើ​ស្ថិរភាព​​នៃ​ហិរញ្ញវត្ថុ​សកល ការផ្គត់ផ្គង់​ថាមពល គមនាគមន៍​និង​ខ្សែសង្វាក់​ផ្គត់ផ្គង់​។​

​ចិន​ដែល​មិន​ព្រម​ថ្កោលទោស​ប្រតិបត្តិការ​យោធា​រុស្ស៊ី​ចូល​អ៊ុយ​ក្រែនថា​ជាការ​”​ឈ្លានពាន​»​មួយ បាន​សម្តែង​ការជំទាស់​ម្តង​ជា​ពីរ​ដង​ចំពោះ​អ្វី​ដែល​ខ្លួន​ពណ៌នា​ថា​ជា​ការដាក់ទណ្ឌកម្ម​ខុស​ច្បាប់​លើ​រុស្ស៊ី​​បន្ទាប់​ពី​មិត្តភាព​ចិន​-​រុស្ស៊ី​ត្រូវបាន​ពង្រឹង​បន្ថែម​នៅ​ពេល​ប្រធានាធិបតី​រុស្ស៊ី​លោក​វ្ល៉ា​ឌី​មៀ ពូ​ទីន បាន​ទៅ​កាន់​ទីក្រុង​ប៉េកាំង​ដើម្បី​ចូលរួម​បើក​ព្រឹត្តិការណ៍​កីឡា​អូឡាំពិក​រដូវរងា​ក្រុង​ប៉េកាំង ចំពេល​​ដែល​ប្រទេស​ទាំង​ពីរ​ប្រកាស​«​ភាព​ជា​ដៃគូ​យុទ្ធសាស្ត្រ​”​គ្មាន​ព្រំដែន​” និង​កិច្ចសហកា​រលើ​គ្រប់​វិស័យ​។​

​រដ្ឋាភិបាល​ក្រុង​មូ​ស្គូ បាន​ហៅ​ចំណាត់ការ​យោធា​របស់​ខ្លួន​នៅ​អ៊ុយ​ក្រែនថា​ជា​«​ប្រតិបត្តិការ​ពិសេស​»​មួយ​ដើម្បី​ដក​អាវុធ​ពី​ប្រទេស​ក្បែរ​ខាង​ខ្លួន​មួយ​ដែល​ចង់​ចូល​ជា​សមាជិក​សហភាព​អឺរ៉ុប​និង​សម្ពន្ធភាព​​យោធា​ណា​តូ ដែល​ជា​ការ​គំរាម​សន្តិសុខ​ផ្ទាល់​ចំពោះ​ខ្លួន​។​

​ចិន​ក៏​បាន​លើកឡើង​ផងដែរ​ថា រដ្ឋាភិបាល​ក្រុង​ប៉េកាំង​គោរព​អធិបតេយ្យភាព​អ៊ុ​យក្រែន តែ​លោក​ខាងលិច​ក៏​មិន​ត្រូវ​មិន​អើពើ​នឹង​ការព្រួយបារម្ភ​ផ្នែក​សន្តិសុខ​របស់​រុស្ស៊ី​ដែរ​៕