ដោយ​: ពៅ​និមល / ភ្នំពេញៈ នៅ​ចុងខែ​មេសា ឬ​ដើមខែ​ឧសភា ខាងមុខនេះ អគ្គនាយកដ្ឋាន​ពន្ធដា​រ នឹងដាក់​ឲ្យ​ប្រើប្រាស់ ប្រព័ន្ធគ្រប់គ្រង​លេខ​កូដ សម្គាល់​អចលនទ្រព្យ ដើម្បី​ឲ្យ​ក្រុមហ៊ុន សហគ្រាស ដែល​សាងសង់​ជា​បុរី ឬ​ជា​ផ្ទះ ក្នុងករណី​មិន​បង់ពន្ធ នឹង​មិនអាច​កាត់ឈ្មោះ ផ្ទេរកម្មសិទ្ធិ​បានទេ ហើយ​ការបង្កើត​ប្រព័ន្ធ​នេះ ដើម្បី​ឲ្យ​មាន​តម្លាភាព សម្រាប់​អ្នក​បង់ពន្ធ​។​

​លោក ច្រឹ​ក សុខ​នី​ម ប្រធាន​សមាគម​អ្នកវាយតម្លៃ និង​ភ្នាក់ងារ​អចលនវត្ថុ​កម្ពុជា កាលពី​ល្ងាច ថ្ងៃទី​៧ ខែមីនា ឆ្នាំ​២០២២ កន្លងទៅ បាន​មានប្រសាសន៍​គាំទ្រ ក្នុងការ​បង្កើត​កម្មវិធី​ថ្មី របស់ ពន្ធដារ​នេះ និង​បាន​លើកឡើងថា សម្រាប់​ការគ្រប់គ្រង​ដោយ​ទិន្នន័យ ចង់​ឬ​មិន​ចង់ ត្រូវតែមាន ហើយ ព្រោះថា ប្រទេស​កាន់តែ​រីកចម្រើន ការស្វែងរក​លំនៅឋាន ឲ្យ​មាន​ភាពងាយស្រួល ត្រូវតែមាន​ប្រព័ន្ធគ្រប់គ្រង​ទិន្នន័យ ឲ្យ​ល្អ និង​ត្រឹមត្រូវ ព្រោះថា បណ្តា​ប្រទេស​ផ្សេងៗ​ទៀត គេ​មាន​រួច​អស់​ទៅហើយ​។​

​លោក​បាន​បន្តថាៈ ជាទូទៅ ម្ចាស់​បុរី​ភាគច្រើន គាត់​បាន​គោរព តាម​គោលនយោបាយ​បង់ពន្ធ ទៅតាម​ការកំណត់ យ៉ាង​ល្អប្រសើរ ជាពិសេស តាម​ប្រព័ន្ធ​ទិន្នន័យ សព្វថ្ងៃនេះ ដែល​រដ្ឋាភិបាល បានដាក់​ឲ្យ​ប្រើប្រាស់​រួចហើយ តាមរយៈ ឃ្យូ​អរ កូដ (QR Code) នៃ​ប្លង់ គ្រាន់តែ​ប្លង់​យើង អាច​មើល​ដឹងថា ទីតាំងនៅ​កន្លែង​ណា ទាំង​ឈ្មោះ និង​ម្ចាស់​អចលន ទ្រព្យ អញ្ចឹង​ពី​នឹង​ទៀត វា​តែងតែ​អាច​រៀបចំ​ទៅបាន តាម​ប្រព័ន្ធ​ឌីជីថល នៅក្នុង​ពេលអនាគត ផងដែរ​។​

​ដោយឡែក លោក​តំណាង​ឲ្យ​បុរី​សុខសាន្ត ភ្នំពេញ បាន​និយាយ​គាំទ្រ​ដូចគ្នា និង​អំពាវនាវ ដល់​អ្នក​សាងសង់​លំនៅឋាន​ដទៃ​ផ្សេងទៀត ឲ្យ​ចូលរួម​អនុវត្ត និង​ផ្តល់​ភាពស្មោះត្រង់ ទាំងអស់គ្នា ព្រោះនេះ​ជា​កាតព្វកិច្ច យើងទាំងអស់គ្នា ត្រូវតែ​គោរព​តាម ដើម្បី​រួមចំណែក ក្នុងការ​អភិវឌ្ឍន៍​សេដ្ឋកិច្ចជាតិ ឲ្យ​កាន់តែ​រីកចម្រើន​ថែមទៀត​។​

​លោក គង់ វិបុល អគ្គនាយក នៃ​អគ្គនាយកដ្ឋាន​ពន្ធដារ កាលពី​កន្លងទៅ បាន​មានប្រសាសន៍ ថាៈ កម្មវិធី​ប្រព័ន្ធគ្រប់គ្រង​លេខ​កូដ សម្គាល់​អចលនទ្រព្យ​នេះ នៅពេលដែល​សហគ្រាស ដែល​សាងសង់​ជា​បុរី ឬ​សាងសង់​ជា​ផ្ទះ បើ​ថា​អត់​បានមក​បង់ពន្ធ ហើយ​អត់​មាន​លេខ Tax QR កូដ​ទេ មានន័យថា មក​កាត់ឈ្មោះ លក់​អត់​ចេញ​ទេ ខណៈដែល​កន្លងមក មាន​ក្រុមហ៊ុន សង់​បុរី ឬ​ផ្ទះល្វែង​ខ្លះ បានប្រកាស​ពន្ធ​ថា ធ្វើ​ផ្ទះ ឬ វីឡា ចំនួន​តែ ១០០ ប៉ុន្ដែ​នៅពេល​ទៅ ត្រួតពិនិត្យ ជាក់ស្ដែង គឺ​ធ្វើ​លើស​រហូតដល់ ១៥០ ទៅ ២០០ ផ្ទះ ដែល​ធ្វើ​ឲ្យ​ការបង់ពន្ធ អត់​ស្មើភាព​គ្នា ដោយ​ខ្លះ​បង់ពន្ធ​ត្រឹមត្រូវ និង​ខ្លះទៀត បង់ពន្ធ​មិន​ត្រឹមត្រូវ​។
​ដើម្បី​មាន​ភាពស្មើគ្នា អគ្គនាយកដ្ឋាន​ពន្ធដា​រ បានរៀបចំ​ប្រព័ន្ធគ្រប់គ្រង លេខ​កូដ​សម្គាល់ អចលនទ្រព្យ ដោយមាន ឃ្យូ​អរ កូដ (QR Code) រាល់​ផ្ទះ​នីមួយៗ ដែល​អភិវឌ្ឍន៍​ទៅ ចេញ​ជា​ប្រព័ន្ធ ដើម្បី​ឲ្យ​ដឹងថា អ្នកនឹង​មក​ទិញ​ផ្ទះ​ពី​ម្ចាស់​បុរី មានអី ឃ្យូ​អរ កូដ​ហើយ បើ​អ្នកណា ទិញ​ដោយ​គ្មាន ឃ្យូ​អរ កូដ​នេះ មានន័យថា ម្ចាស់​បុរី​អត់​បង់ពន្ធ និង​អត់​បាន​ចុះ បញ្ជី​នោះទេ​៕/V​