ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ក្រុមហ៊ុន Apple បាន​បញ្ចេញ​ទូរស័ព្ទ​ស៊េរី 5G នៃ iPhone SE និង iPad Air ស៊េរី​ទាប​របស់​ខ្លួន ក៏ដូចជា​កុំព្យូទ័​រលើ​តុ Mac ដែល​បាន​រចនា​ឡើងវិញ និង​ប្រព័ន្ធ​ដំណើរការ​ថ្មី ដោយ​ចាប់ផ្តើម​នូវ​អ្វី​ដែល​ទំនង​ជា​ឆ្នាំ​ដ៏​ធំ​បំផុត​របស់​ខ្លួន​សម្រាប់​ការចេញ​ផលិតផល​ថ្មី​។​

​ក្រុមហ៊ុន Apple បានបង្ហាញ​ឧបករណ៍​ទាំងនេះ​ក្នុងអំឡុង​ព្រឹត្តិការណ៍​តាម​អន​ឡាញ​មួយ​កាលពី​ថ្ងៃ​អង្គារ ទី​០៨ មីនា ដែល​ខ្លួន​ហៅថា Peek Performance​។ នាយក​ប្រតិបត្តិ​លោក ធី​ម ឃុ​គ ក៏​បាន​ប្រកាស​អំពី​ផែនការ​នាំយក​ការប្រកួត Major League Baseball ទៅកាន់​សេវាកម្ម​ផ្សាយ​តាម TV+ របស់​ក្រុមហ៊ុន​ផងដែរ​។​

​ការបង្ហាញ​នេះ​រួម​មាន​បន្ទះ​ឈីប Apple ថ្មី​ដែល​មានឈ្មោះ​ថា M1 Ultra ដែល​ក្រុមហ៊ុន​ហៅថា​ជា​បន្ទះ​ឈីប​កុំព្យូទ័រ​ផ្ទាល់​ខ្លួនដ៏​មាន​ឥទ្ធិពល​បំផុត​មិន​ធ្លាប់​មាន​។​ផលិតផល​នេះ​គឺជា​ផ្នែក​មួយ​​នៃ​ការងា​ក​ចេញ​ជា​ច្រើន​ឆ្នាំ​របស់​ក្រុមហ៊ុន Apple ពី​ការប្រើប្រាស់​ប្រព័ន្ធ​ដំណើរការ​របស់ Intel ដើម្បី​មក​ប្រើ​របស់​ខ្លួន​ឯង​វិញ​។​

​កុំព្យូទ័រ​លើ​តុ​ថ្មី​ដែល​មានឈ្មោះ​ថា Mac Studio គឺ​បំពាក់​មក​ជាមួយ​បន្ទះ​ឈីប M1 Ultra និង​មាន​គោលបំណង​សម្រាប់​អ្នក​បង្កើត​កម្មវិធី អ្នក​កែ​រូបថត និង​អ្នក​បង្កើត​វីដេអូ​។ ក្រុមហ៊ុន Apple ក៏​បាន​បង្ហាញ​អេក្រង់​ម៉ូនីទ័រ​ដាច់ដោយឡែក​ផងដែរ​។​

​ភាគហ៊ុន​របស់​ក្រុមហ៊ុន Apple បាន​កើនឡើង​តិចជាង ១ ភាគរយ​គឺ​ត្រឹម ១៦០,៥០ ដុល្លារ​អាម៉េរិក នៅ​ម៉ោង ១៖៣២ រសៀល​នៅ​ទីក្រុង​ញូវយ៉ក​។ ភាគហ៊ុន​បាន​ធ្លាក់ចុះ​ប្រហែល ១០ ភាគរយ​នៅ​ឆ្នាំនេះ ស្រប​តាម​ការធ្លាក់​ចុះ​ដ៏​ទូលំទូលាយ​។​

​ព្រឹត្តិការណ៍​នេះ​គឺជា​លើក​ទី​មួយ​នៃ​អ្វីដែល​គេ​រំពឹងថា​នឹង​មាន​ការចេញលក់​ផលិតផល​ជាច្រើន​នៅ​ឆ្នាំ​នេះ ដោយ​ក្រុមហ៊ុន Apple ក៏​បាន​ត្រៀម​ចេញ​នូវ​កុំព្យូទ័រ Mac និង iPad បន្ថែម​ទៀត​ព្រមទាំង iPhone 14 និង​នាឡិកា​ឆ្លាត​វៃ​ថ្មីៗ​ផងដែរ​។ ហើយ​ក្រុមហ៊ុន​អាច​នឹង​បង្ហាញ​វ៉ែនតា VR ដំបូង​របស់​ខ្លួន​នៅ​ចុងឆ្នាំ​នេះ​៕

ទូរស័ព្ទ​5Gស៊េរី​iPhone SEតំលៃជាង៤០០ដុល្លាររបស់Apple​

iPad Air ស៊េរី​ទាប​ត្រូវបាន​បង្ហាញ​កាលពី​ថ្ងៃ​អង្គារ