​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ប្រទេស​រុស្ស៊ី​និង​អ៊ុយ​ក្រែន​មានចំណែក ២៩ ភាគរយ​នៃ​ការនាំចេញ​ស្រូវ​សាលី​ជា​សកល ប៉ុន្តែ​ដោយសារ​ជម្លោះ​រវាង​ពួកគេ​កាន់តែ​តានតឹង​ឡើង​ការផ្គត់ផ្គង់​​អាច​នឹង​ត្រូវ​ធ្លាក់​លើ​ឥណ្ឌា ដែល​ជា​ប្រទេស​ផលិត​ស្រូវ​សាលី​ធំ​ទី​ពីរ​របស់​ពិភពលោក​។​

​ប្រទេស​មួយចំនួន​ធំ​ដែល​នាំចូល​ស្រូវ​សាលី​ដូចជា​ហ្វីលីពីន អេ​ហ្ស៊ី​ប ម៉ារ៉ុក និង​លី​បង់ កំពុង​ស្វែងរក​ការជំនួស​ការនាំចេញរ​បស់​រុស្ស៊ី​និង​អ៊ុយ​ក្រែន​ដែល​ឥឡូវនេះ​ការផ្គត់ផ្គង់​ស្រូវ​សាលី​ត្រូវ​បាន​ជាប់គាំង​​នៅក្នុង​ប្រទេស​អ៊ុ​យក្រែន ហើយ​ការដាក់ទណ្ឌកម្ម​បានធ្វើ​ឱ្យ​ប្រទេស​នានា​ពិបាក​ទិញ​ពី​រុស្ស៊ី​។​

​អង្គការ​ស្បៀងអាហារ​និង​កសិកម្ម​បាន​រកឃើញ​ថា នៅ​ឆ្នាំ​២០២០ ប្រទេស​លី​បង់​បាន​ប្រើប្រាស់​ស្រូវ​សាលី​នាំចូល​ពី​អ៊ុ​យក្រែន ៨១ ភាគរយ និង ១៥ ភាគរយ​ពី​រុស្ស៊ី​។ អេ​ហ្ស៊ី​បបាន​ទិញ​ស្រូវសាលី ៦០​ភាគរយ​​ពី​រុស្ស៊ី និង​២៥ ភាគរយ​ពី​អ៊ុ​យក្រែន​។ ហើយ​ប្រហែល ៦៦ ភាគរយ​នៃ​ការនាំ​ចូល​ស្រូវ​សាលី​របស់​តួ​ក​គី​គឺ​បានមក​ពី​ប្រទេស​រុស្ស៊ី និង​១០​ភាគរយ​ពី​អ៊ុ​យក្រែន​។​

​សូម្បី​មុនពេល​មាន​សង្គ្រាម​នៅ​អ៊ុ​យក្រែន ក៏​ឥណ្ឌា​បាន​ខិតខំ​ប្រឹងប្រែង​ផ្តោត​ការយកចិត្តទុកដាក់​ដើម្បី​ពង្រីក​ការនាំចេញ​ស្រូវ​សាលី​របស់​ខ្លួន​រួចជាស្រេច​ទៅហើយ​។​

​រដ្ឋមន្ត្រី​ស្បៀងអាហារ​ឥណ្ឌា លោក ស៊ូ​ហាន​ស៊ូ ផាន​ឌី (Sudhanshu Pandey)​បាន​និយាយថា ការនាំចេញ​ស្រូវ​សាលី​សរុប​ពី​ប្រទេស​ឥណ្ឌា​បាន​កើនឡើង​ដល់ ៦,៦ លាន​តោន​ចាប់តាំងពី​ខែ​តុលា នៅពេល​ដែល​រដូវ​កាល​បច្ចុប្បន្ន​បាន​ចាប់ផ្តើម ហើយ​អាច​ឡើងដល់​៧​លាន​តោន​ត្រឹម​ខែមេសា​។​

​ឥណ្ឌា​ផលិត​ស្រូវ​សាលី​ប្រហែល ១០៨ លាន​តោន​ក្នុង​មួយឆ្នាំ ដែល​សឹងតែ​ស្មើ ១៤ ភាគរយ​នៃ​ទិន្នផល​សរុប​នៅ​ក្រៅប្រទេស ប៉ុន្តែ​ភាគច្រើន​នៃ​ស្រូវ​សាលី​ទាំងនេះ​ត្រូវបាន​ប្រើប្រាស់​តែ​ក្នុងស្រុក​ប៉ុណ្ណោះ​៕

​ឥណ្ឌា​រំពឹង​នាំចេញ​ស្រូវ​សាលី ៧ លាន​តោន​នៅត្រឹម​ខែមេសា​