ដោយៈ សុ​ផានី​តា / កោះកុងៈ លោក​ឧ​ត្ត​ម​សេនីយ៍​ទោ ស្នងការ​នគរបាល ខេត្តកោះកុង អះអាងថា ថ្វី​ដ្បិត​កម្លាំង​នគរបាល​ជានា​រី ពុំមាន​កម្លាំងកាយ ខ្លាំង​ជាង​បុរស ក៏​ពិតប្រាកដ ប៉ុន្តែ​ខាង​ផ្នែក​ស្មារតី​ប្រាជ្ញា សុទ្ធតែ​ឆ្លាត​វៃ​មុតមាំ ដូចនឹង​បុរស​ដែរ​។ ការលើកឡើង​យ៉ាង​ដូច្នេះ របស់លោក​ឧ​ត្ត​ម​សេនីយ៍​ទោ គង់ មនោ ស្នងការ​នគរបាល ខេត្តកោះកុង នៅពេលនេះ ធ្វើឡើង​នៅ​រសៀល ថ្ងៃទី​៨ ខែមីនា ឆ្នាំ​២០២២ ចំ​ថ្ងៃ​អបអរសាទរ​ទិវា​សិទ្ធិនារី​អន្តរជាតិ ៨ មីនា លើក​ទី​១១១​។​

​លោក​ឧ​ត្ត​ម​សេនីយ៍​ទោ គង់ មនោ បាន​បន្ថែមថាៈ កម្លាំង​នគរបាល ជានា​រីៗ ដែល​ទើបតែ​ចូល បម្រើ​ការងារ នៅក្នុង​ខេត្ត គឺ​សុទ្ធតែ​ទ​ទូល​បានការ​បណ្តុះ បណ្តាល​ជំនាញ យុទ្ធវិធី​ការពារ និង​ថែរក្សា​សន្តិសុខ សណ្តាប់ធ្នាប់ ជូន​ដល់ ប្រជាពលរដ្ឋ និង​ថ្នាក់ដឹកនាំ សំខាន់​ដែល​អញ្ជើញ បេសកកម្ម ក្នុង​កម្មវិធី​តូចធំ ទាំងអស់ ដោយ​ឥត​រុញ​រា​នោះទេ​។ ត្បិត​ពួកគេ​ជានា​រី​ក៏​ពិតប្រាកដ ប៉ុន្តែ​ស្មារតី ប្រាជ្ញា​ឆ្លាត​វៃ​មុតមាំ​ដូចនឹង​បុរស​ដែរ​។ ទោះយ៉ាងណា លោក​ក៏​ស្នើ សុំ​ដល់​កម្លាំង នគរបាល ជា​នារី​វ័យក្មេង បន្ត​ពង្រឹងសមត្ថភាព​បន្ថែម ដើម្បី​ឈានដល់​សម្រេច គោលដៅ ដែល​ខ្លួន​ពេញចិត្ត​ទៅ​ថ្ងៃមុខ​។​

​បើតាម​លោកស្នងការ​នគរបាល​ខេត្តកោះកុង សព្វថ្ងៃ កម្លាំង​នគរបាល​នារី បែង​ចែកជា ២ ផ្នែក រួមមានៈ ទី​១-​កម្លាំង​នគរបាល​ស្ត្រី​វ័យ​ចំណាស់ ែ​ណ​នាំ ដល់​ពួកគាត់ ជួយ​ពង្រឹង​នូវ​វិធានការ សុខាភិបាល ដើម្បី​ទប់ស្កាត់​ជំងឺ​កូ​វីដ​១៩ ក្នុង​បរិវេណ​ស្នងការដ្ឋាន​នគរបាល និង​ជុំវិញ​មូលដ្ឋាន រស់នៅ​។ ទី​២-​កម្លាំង​នគរបាល​ជា​នារី​វ័យក្មេង ត្រូវបាន​ចូល​អប់រំ​បណ្តុះបណ្តាល ផ្នែក​យុទ្ធវិធី​ការពារ សិក្សា​ជំនាញ​បច្ចេកវិទ្យា និង​ផ្នែក​រដ្ឋបាល​ជំនាញ​ផ្សេងៗ ដើម្បី​ពង្រឹង សមត្ថភាព​បន្ថែម មុននឹង​ចូល​បម្រើ​ការងារ នៅតាម​ការិយាល័យ​នានា​។​

​គួរ​ជម្រាប​ដែរ​ថា សព្វថ្ងៃ ស្នងការដ្ឋាន​ខេត្តកោះកុង មាន​កម្លាំង​នគរបាល ជា​ស្ត្រី​ប្រមាណ​ជិត ៧០ នាក់ ដែល​កំពុង​បំពេញ​កិច្ចការងារ តាម​ការិយាល័យ ជំនាញ​រៀងៗ​ខ្លួន ដោយ​មិន​រាប់ បញ្ចូល កងកម្លាំង​នគរបាល​វរៈ​ការពារ​ព្រំ​ដែនទឹក ឬ​ផែន​អន្តោប្រវេសន៍​នោះទេ​។​

​លោកស្រី​ឧ​ត្ត​ម​សេនីយ៍​ត្រី ពេជ្រ ស្រី​ពី ស្នងការរង​នគរបាល​ខេត្ត បានឱ្យដឹងថាៈ ដំណើរការ យ៉ាងសកម្ម​របស់ ក្រុមប្រឹក្សា​ជាតិ​កម្ពុជា ដើម្បី​ស្ត្រី គណៈកម្មាធិការ ជាតិ លើ​កម្ពស់​សីលធម៌ សង្គម តម្លៃ​ស្ត្រី និង​គ្រួសារ​ខ្មែរ ក៏ដូចជា យន្តការ​បញ្ជ្រាប យេនឌ័រ នៅ​គ្រប់​កម្រិត​គ្រប់​វិស័យ បាន​នឹង​កំពុង​រួមចំណែក​ដ៏​សំខាន់ ក្នុងការ លើកកម្ពស់ ស្ថានភាព​សិទ្ធិ ឋានៈ​តួនាទី និង​តម្លៃ​ស្ត្រី រួមទាំង​សីលធម៌​សង្គម វប្បធម៌ និង​ប្រពៃណី​ដ៏ ល្អ​ផូរផង់​របស់​កម្ពុជា​។​

​លោកស្រី បាន​ថ្លែង​បន្ថែមថាៈ រាជរដ្ឋាភិបាល ក្រសួង​កិច្ចការនារី និង​ក្រុមប្រឹក្សា ជាតិ​កម្ពុជា ដើម្បី​ស្ត្រី គឺ​បាន​ប្រឹងប្រែង​ជំរុញ លើកកម្ពស់​សមភាព​យេនឌ័រ ដើម្បី​ស្ត្រី​បានទទួល​នូវ កិច្ចការពារ​សិទ្ធិ និង​ផលប្រយោជន៍ តាមរយៈ​ការកែប្រែ ឥរិយាបថ​សង្គម ឱ្យទទួល​ស្គាល់ ព្រមទាំង​ចាត់ទុក​ស្ត្រី ជា​ដៃគូ​ដ៏​សំខាន់ ក្នុងការ​អភិវឌ្ឍន៍​គ្រួសារ សង្គម និង​វិស័យ​កងកម្លាំង ប្រដាប់អាវុធ​ជាដើម​៕/V​-PC